المشاركة الأصلية كتبت بواسطة توته وزوجها بالنسبه لريحته اذا دخل وريحته زجاير حافظ الدرس هو يدخل للحمام ربي يعزكم وانا اودي له الفوطه

السلام عليكم ورحمه الله وبركاته،

اعجني الموضوع ولا قدرت اقاوم، قلت لازم ارد

قبل لا اكتب اي شي، ابيكم تفهمون اني مع ان: التدخين عادة سيئه، ومضرة بالصحة...

لكن في نقاط ذكرت وودي اعلق عليها بإختصار(مع احترامي لجميع الاعضاء والردود):


* التدخين موت بطيئ:

هذه العبارة من الناحية الطبية غير صحيحة اطلاقا!!!
التدخين يزيد نسبة الاصابة بأمراض عدة، مثل سرطان الرئه، وامراض الرئه والقلب والشرايين...الخ
يعني التدخين ما يسبب امراض معينه، لكنه يزيد خطر الاصابة فيها...


* رائحه السجائر(الدخان) كريهه:

انا اتصور هذي مسأله شخصية، مثال: فيه ناس تفضل انواع معينه من الروائح، اشخاص اخرين ما يقدرون يتحملون ريحتها، تجيب لهم الغثيان.

مثلا: انا ما احب رائحة الحليب اطلاقا، وفيه ناس مثل القطاوة اذا شموا ريحته يسعبلون...

وطبعا فيه عامل ثاني وهو نوع الدخان، فيه انواع كريهه وفي انواع ريحتها بالنسبة لي على الاقل حلوه، مثل بعض انواع السجائر والسجار خصوصا والمعسل...الخ


* رائحه المدخن كريهه:

مع احترامي للجميع، لكن الخايس خايس...
فيه ناس بدون ما يدخنون ريحتهم تطلعك من البيت، فإذا الانسان نظافته الشخصية سيئة ريحته اكيد بتكون سيئه...

الا يمكن بالعكس، الناس اللي ريحتهم خايسة، الدخان يمكن يغطي شوي على ريحتهم
مثل ان ياكل الواحد بصل او ثوم يجلس كم يوم ما غسل اسنانه، بالله كيف تبون تصير ريحته زينه!!!

لكن الانسان النظيف صدقوني وانا انسان مدخن(وناوي ان شاء الله ابطل) محد يتضايق من الرائحة الا اذا يمكن كنت تدخن في نفس المكان اللي جالس فيه، وريحه الدخان اللي تضايقة موب ريحتك انت يالمدخن.


* المدخنين انانيين ولا يفكرون الا بانفسهم:

غير صحيح، بالعكس تماما، الغير مدخنين هم الانانيين لانهم دائما ينظرون للمدخنين بدونيه، وكانهم افضل منهم، وبالمقابل دائما المدخن اذا كان في مكان ما فيه احد يدخن يسحب نفسه بكل ادب ويطلع برا يدخن عشان ما يضايق احد...

بعدين في احد الاخوان ذكر ان في الدول المتقدمة والمتحضرة في عقوبات تفرض على المدخنين في الاماكن العامة وهذا صحيح.

لكن اتصور ان هالشخص ماقد سافر برا وشاف مثل مافي عقوبات فيه ايضا اماكن خاصة مجهزة للمدخنين، فيها مراوح شفط ومكيفة صيف وشتاء، موب مثل عندنا الواحد كل شوي يطلع برا في ذا الحر تجيه ضربت شمس

حتى الاماكن العامة عندنا مثل الكوفي شوبات والمطاعم قليل جدا اللي تلقى فيها قسم خاص للمدخنين!!!

بعدين كثير من المدخنين وانا منهم، ما يدخنون في البيت، ولما يرجعون للبيت على طول يروحون للحمام وانتم بكرامه، ويغسلون اسنانهم ويدينهم ووجههم ويغيرون ملابسهم عشان ما يضايقون اهلهم من ريحه الدخان.


على العموم انا اتصور ان المسأله مسأله شخصية تختلف من شخص لآخر، وكل شخص له الحق في ابداء رائيه الشخصي في اي مسأله بدون اي زعل ولا عصبيه...

لكن حقيقتا بعض الردود اللي قريتها مع احترامي للجميع مبالغ فيها بشكل غريب جدا، يعني اللي تقول مستحيل اتزوج واحد يدخن، واللي تقول بتطلق عشان زوجها مدخن...

والانسان اللي يحكم على الاشخاص بالانانيه او اي صفة ثانيه عشانهم بس يدخنون، هذا انسان اتصور مفروض يعيد النظر في طريقة تفكيرة...

واخيرا اتمنى اني ما اكون زعلت احد،
ولكم مني كل المودة والتقدير،
أخوكم
Mort Vivant