السلام عليكم.

بعد قرائتي لقصة حياتك الي اشوفها طبيعيه وطبيعيه جداً، ابي أسألك بكل صدق، وين المشكله، اتمنى تقولين المشكله كذا وكذا.

كل الي صاير بينكم مجرد شد اعصاب وتحامل على الثاني بسبب افعال تبدر من الشخص مبنيه على وجهة نظر خاصه فيه.

يعني وش المشكله لو خصم 500 من مصروفك، صدق فكري بكل عقلك، وبعدين وش راح يصير، ماراح يستقبلونك اهلك، او ما راح تستانسون، رحتوا وجيتوا وانبسطتوا ورجعتي لزوجك وسويتوا الي سويتوا ، وكل الامور ماشيه.

عن الغلط؟؟؟ لنفرض انه غلطان، ولكن من ابسط حقوقك انك اذا رجعتي تقولين له كل الي تبين ، ولا اتوقع انه رااح يصدك با الكلام.

لاتخلين حياتكم توصل لدرجة ان كل واحد منكم يدور على الثاني زله او يتصيد عليه الزلات عشان يجيب الاول والتالي، وشوفي وين وصل تفكيرك، للأنفصال، يعني للطلاق.

تعرفين وش معنى الطلاق، يعني عنصر من عناصر المجتمع انهدم وعيال ضاعوا ، وبنت فقدت كل سطوتها وملكيتها على شخص وبيت وابناء كانت تتمتع بكل معاني التملك الحسي والمعنوي.ورجل فقد الاستقرار والراحه، واصبح مثله مثل غيره، بدون هدف.

يمكن اكون مبالغ من كلامي، لكن وربي هذا الي صاير، انا اتكلم ها الكلام لأني اقارن بين حياتي الان وقبل الزواج.

تخيلي با الله لو تسألين نفسك، هل فعلاً انا تطلقت عشان 500؟؟؟ موب شي يفشل ، واعذريني على الكلمه، اوكي فيه اشياء كثيره، ولكن انتي بينك وبين نفسك هي كانت الشراره الي اوقدت النار.

اذا تكلم عليك، يعتذر، ولو بعذر غير مباشر، وكلنا نخطي.
اذا قصرتي بحقه، تعوضينه، مافي احد منا كامل.

شباب اخذوا الحياه بكل بساطه، يعني استمتعوا فيها، انتي توك صغيره على قولتك، واذا بتقضين شباب انوثتك وصغر سنك في النكد والهواش وتكبير الامور ، ماراح تعيشين ، لا انتي ولا هو.

ليش ماتكونين انتي السبب في تغير حياتكم، من ناحيتك ومن ناحيته ومن ناحية حياتكم كلكم، هو بيقصر، هو ما يهتم، يعني وش الحل، انكد على نفسي؟؟؟ لااا والف لاا، حاولي مره ومرتين ، وحطي في بالك مالك الا اجر.

المهم تعوذي من ابليس ، واقضبي ارضك، واستمتعي بحياتك وحياتكم جميع، ترى بيجينا يوم وتنتهي صلاحيتنا.

المهم اذا بنصحك بشي، انك تكثرين من الاستغفار قبل وبعد كل شي.

الله يوفقنا ويوفقكم.