ياخي مدري ليه سبحان الله حسيت انك طيب وابن حلال .. يعلم الله هذا اللي حسيت فيه وانا اقرا كلامك ..
أول شي مسألة الطلاق حاول انها تكون آخر الحلول مو على طول الله يهديك ..
ثاني شي البنت تبيك ولو ما تبيك كان نشبت لك عند النقل ووافقت انك تطلق ..
ثالث شي انا عتبان عليك بخصوص الرسايل لانه يمكن جوالها ما شافته بعد ساعه او يمكن الرساله ما وصلت الا في الوقت اللي قالته .. حتى اخوها يمكن صدق ما شافها الا الاربعاء أو يمكن كان جواله مقفل في الدوره والرساله كانت في الانتظار لحد ما يفتح جواله يوم الاربعاء وانت وصلك انها وصلته حسب التقرير .. يعني الاحتمالات كثيره ولا تعتمد على التقارير في مسألة التصديق والتكذيب .. ونصيحه من أخ لأخوه انت مبين عليك حساس مره فلذلك ألغي تقارير الرسايل علشان ما تصيبك بالشك .. والله هذا أفضل لك ..
رابع شي أخوها شكله ما بعد تزوج وجرب المرمطه اللي تجي فترة الملكه ويفكر ان الحق كله مع أخته .. فالمفروض أنه ما يصدقها أبد حتى لو ان معها الحق لان هذي امور عاديه ولا يكبر المسأله وبعدين الحرمه ما لها الا رجالها تروح وين ما راح .. يعني بالعقل لو كان ماخذ أختك .. هل من العقل والمنطق أنه بينقل لها الشرقيه علشان أهلها ويترك أهله والمكان اللي مستقر فيه .. أتوقع لو تقول له هالكلام بيقتنع الا اذا كان غبي << مع فائق احترامي ... وهو صدقني راح يجرب ويتمرمط وتقول ما قلته .. لكن انت اذا اخذتها عندك راح تقدر تحكمها وتفتك من تدخلات اخوها لانها والله العالم فيه احد يعطيها شورها وما عندها ثقه بنفسها وهذا شي طبيعي لان النساء ناقصات عقل ودين ومسكينات في نفس الوقت .. فأنا حاس انها اذا صارت معك بتنحل هالامور وانت مبين عليك قدها وقدود ..
أخيراً إذا خالفتك في شي حاول تسحب عليها يوم او يومين وصدقني بيلين راسها واذا رجعت كلمتها بعد التطنيشه جيبها باسلوب حلو وانك تعزها وتقدرها لانها بتكون منتظره اتصالك وانك ما اخترت هالشي الا انك تشوفه الافضل لك ولها وحاول تجيب لها اسباب حلوه خلتك تسوي هالشي ..
بالنسبه للزواج اقديت يومك استأجرت القاعه مع ان الاتفاق من اول كان غير كذا لكن عادي لو استأجرت ومو شرط يحضرون العائله كامله .. لكن اقل شي علشان تمشي اوضاعك وما تقلقك بعدين لان البنات عندهم الحفله والقاعه اهم شي ويحبون المظهريات .. فالله يعينك ..
انا ادري انها مندبله كبدك لكن وش تسوي انا حالي نفس حالك بس احاول امشي لامور حدها تمشي وصدقني حنا اللي نبيه بيصير بس باسلوب والواحد ما ييأس ويختار آخر الحلول .. يعني الطلاق لا تعودها على هالشي والكلمه هذي لانه لازم يكون في شي اكبر من كذا علشان تعرف قيمة هالكلمه ...
وانا والله اني اعاني مثلك وحتى النوم ما يجيني بس الشكوى لله ان شاء الله تتيسر امورنا ونرتاح .. وبعدين اشتر لها اشرطه وكتب وخلها تقرا علشان تفهمك صح ..
وفقك الله أخوي
13-04-2009, 01:45 PM
ضوابط المشاركة
العرض الشجري