بنت طيبة الطيبة: أنا ما تهمني لكن حقرانها لي الغير مبرر وكلامها مع باقي الزميلات يحسسني بالإهانة والإحراج قدام مسؤولتي وباقي الزميلات.. تحسسهم اني ما أستاهل انهم هم يكلموني بعد، وهذي أول مرة أتعامل مع شخصية معقدة زي كذا لذلك انا تضايقت وما زلت متضايقة من اسلوبها معاي. والحين انا ما أكلمها ومكتفية بالسلام مثل ما قلتي بس هي حتى سلام ما ترد وتسوي نفسها ما تسمع! والحين قاعدة اكتب الرد هذا وهي توها داخلة المكتب، ولا كأنها شافتني... أول مرة اشوف حقد بدون سبب!!

ذو الفقار: شكراً جزيلاً... أعجبني كثير البيت اللي كتبته وراح أطبقه من هذي اللحظة.

روجي فوشي: تسلمين، كلامك صحيح وانا بديت احقرها بس اللي يضايقني انها من النوع اللي كل ما حقرتيها كل ما حقدت زيادة وزادت في تكبرها علي وانا اتضايق اذا اشوف هالنوعية كل يوم بوجهي!!!

بشائر فجر قادم: انا ماراح أعاملها بالمثل، انا بس بترفع عنها لأنه باين انها مريضة نفسياً، وعلى طاري الغيرة؛ هي فعلاً فيها غيرة ويقلب وجهها اذا شافت المديرة تمدحني أو أي أحد ثاني يثني علي واذا شافتني كاشخه يوم أو مبسوطة. وكثر ما هي قاهرتني كثر ما أشفق عليها لأنه شكلها فاقدة الثقة بالنفس.

night2005: صح، فعلاً كثروا الحاقدين وانتشر الحسد بهالزمن بشكل مؤلم. فكرة حلوة اني أدعي ان الله يرد كيدها لنحرها لأني احس انها تنتظر زلة مني وخطأ وودها اني أترك الشغل وتتضايق من حضوري.
بالنسبة لشغلنا اذا مختلط أو لا، لا مو مختلط، انا موظفة حكومية واشتغل في قسم نسائي والرجال بقسم لحالهم. ومن ناحية نقل الكلام؛ كنت أشوف الناس على نياتي مثلي بس اكتشفت بعد ما اشتغلت بل انصدمت في بعض الزميلات، لأنه صار لي موقف مع المديرة ومرة مع المسؤولة المباشرة علي بعد ما نقلوا كلام عني وعطوني ملاحظات وعرفت بحدسي من اللي نقلوا كلام بس سويت نفسي ما أدري عشان ما ينبسطون ويتشمتون فيني.
فعلاً أنا محتاجة للراتب وقعدت فترة طويلة في البيت لين لقيت هذي الوظيفة وكثير من صديقاتي وقريباتي يتمنون مكاني بس بنفس الوقت متضايقة مرة منها ومابي اشوف وجهها اللئيم كل يوم واتصبح بأخلاقها الزفت. الوظايف صارت نادرة بهالوقت بس ببحث عن وظيفة ثانية هالفترة.

قمة البراءة: شكراً على مرورك.

عابرة سبيل: والله فعلاً حسيت انها تغار مني وتحسدني، لأني مثقفة أكثر منها رغم انها جامعية بس انا لي خبرة أكثر منها واشتغلت من قبل كثير أما هي فهذي أول وظيفة لها، وانا كاتبة في الجرايد ومديرتي دايماً تمدح في كتاباتي ويمكن هالشي هو اللي قاهرها، غير كذا انا مملوحة وهي عادية وانا الوحيدة اللي بالشغل جسمي حلو والباقي يعانون من السمنة والزوائد وهي من أول ما اشتغلت عريضة ومليانة والحين حامل وبشهورها الأخيرة وشكلها استغفر الله العظيم، ما ابي اعيب على خلقة ربي بس هي حسيت انها من جد من النوع اللي اذا حس بالنقص يتصرف بجفاف وقسوة مع الغير. وغير كذا هي أغنى مني بس ما عندها ذوق في اللبس أبداً وفيها بخل، وانا اللي من ذوي الدخل المحدود بس اشيك منها والبس ماركات، حتى شنطة لابتوبي ماركة، لأني مدلعة نفسي وما احب اقصر على روحي بشي وهي اذا شافتني لابسة شي جديد احس تنقهر زيادة، بس انا والله يشهد علي مو مغرورة بالعكس فوق المميزات اللي فيني، طيبة حيل ومتواضعة مع الكل، واحب الناس والدنيا وعارفة ان الحياة قصيرة والعمر واحد عشان كذا ما أحب احط في خاطري أو اشيل على أحد أو اجرح إنسان بس هم الدنيا أكبر همهم وقلوبهم سودا ومليانة حسد كأنهم يبون الدنيا لهم لحالهم أو يبون يكونون هم الأحسن والأفضل في كل شي وبس.