مساكم الله بالخير


اسف ماقدرت ادخل امس واقولكم وش صار

انشغلت امس بالاستخاره والتفكير والاهل



الحمد لله تمت الشوفه وارتحت للبنت وتقبلت شكلها وقبلتها


مثل ماتوقع بعضكم ماجلست اكثر من ثلاثين ثانيه اصلا ماجلست قدمت لي العصير ووقفت عند الباب!!
كيف الحال شلونك والدراسه كيف التفت عشان اخليها تشوفني ورجعت التفت عليها الا وهي تروح
المهم قلت لاخوها ماش خلها ترجع وفعلا رجعها قلت لها شفيك مستعجله ههههه نزلت راسها
قال اخوها شوفوا بعض زين باركت لها الشهر وبصوت خافت جدا قالت الله يبارك فيك وراحت

المهم حسيت بارتياح ناحيتها رغم اني ماشفتها زين كانت واقفه عند الباب كنت ابيها تجلس اقرب


اقولكم نفسيتي بعد ماطلعت حسيت بارتياح حتى اني اتذكر وجها وابتسم اتصلت بالوالده هاه صلحت لك
قلت ايه صلحت لي بس فيه ملاحظه (ماقدر اقولها)
راح افكر الليله اتنازل عنها واقولكم قراري النهائي بكره الي هو اليوم

من البارح لليوم وانا استخير واستخير وافكر احس اني اميل للموافقه بس مو 100% تقريبا 80%

علما ان الشرط الي ابي اتنازل عنها موجود فيها بس مو بالشكل الي كنت احلم فيه واتمناه

اقول في نفسي لايكون اقبل واتنازل بس خوف اني ما القى احلى منها واطول في البحث غير انه مايصير اشوف بنات الناس ولا اوافق
لا ابي اقبل وانا مقتنع قناعه تامه

انتظركم دعمكم النفسي قبل ساعات من اتخاذ قرار العمر

والله يكتب لي الخيره

__________________

اللهم اني أردت البائه والعفاف فاغنني بحلالك
اللهم يسر امور زواجي واتمه على خير
واكتب لي الخير والسعاده وارضى عني