السلام عليكم ورحمة الله وبركاته اخواني واخواتي ...

بدون اي مقدمات .. سأطرح لكم موضوع وحاب اسمع وجهة نظركم فيه .. موضوع مهم بالنسبة لنا ك بشر بشكل عام و كأزواج بشكل خاص....


نحن البشر ( بشكل عام ) نرى القشور بشكل اوضح من الجوهر ؟ كيف ؟ بعطيكم امثله

1- لما يجي واحد من الشباب ويمدح على سبيل المثال صالون رجالي .. يقول والله هالحلاق ابد ماشفت منه .. تصورو انه يهتم فيك اهتمام .. يسوي لك مساج حق راسك ورقبتك ويحط لك الكريمات ويحط منشفه فيها ماء على وجهك مجانا؟ صحيح انه مايعرف يحلق زين .. بس صراحة محد يسوي مثله .. علشان كذا انا عطيته بقشيش من عندي ...وانصحكم اتروحوله

(( في المثال السابق لو اتلاحظون ان الشخص المتحدث ركز على نقاط تعتبر هامشية ؟ وهو بالاصل كان رايح يحلق وماذكر لو كانت الحلاقة جيده او مش جيده ))

2- كثييييير كثيييير نسمع ان بعض الشباب لي جلسوا مع بعض يقولون احسن وافضل زوجات هم الزوجات اليابانيات ؟ ليش يا ترى ؟ لانها اذا مشت ماتعطيك ظهرها .. وتسمع الكلام ولما تجي من الدوام تعبان تستقبلك بابتسامة .. (و اتحط رجلك في ماي حار وتهمزك شوي .. وتكون مزهبتلك الحمام اجلكم الله) ..

((في المثال السابق تكلموا عن حاجات لو يقارنونها بالحاجات الي تعملها حريمهم .. مايجي حتى ربع الاشياء الي ذكرها عن اليابانية .. بالعكس حريمهم طباخات .. يربون عيالهم على الاخلاق الحميدة.. ويدرسونهم ويوم يجي البيت يلقاه نظيف مرتب ماعليه شي ." وش فيها ريحة الثوم والبصل دام هي جالسة تخدمك بهالشي بطيب خاطرها مو غصبن عليها "

3- يوم نروح مطعم .. اتعرفون اكثر المطاعم الي انروحلها .. يا نروح عشان فيها منظر جميل .. او ان المطعم يسوي حركات حلوة في المقبلات او غيره من الاشياء .. مثل اول ماتجلس يجيب لك فوطة حارة .. او ان يشوي الربيان قدامك ..( شواه قدامك وله بالمطبخ نفس الشي! ) بس لما بنروح انقول حق ربعنا عن هالمطعم بنركز على انه والله الربيان شواه قدامنا ! وننسى طعم الربيان سواء حلو او مش حلو !


4- حتى يوم نشتري تلفون .. لما يجيب لنا تلفون فيه مواصفات متعددة .. نشتريه مع ان نحنا عارفين ان ماراح نستخدم هالمواصفات .. بس مجرد ترتاح نفسيتنا لي جانا احد اصدقاءنا وعرضنا عليه الجهاز وقلنا انه فيه وفيه ..




ياترى ليش نحنا دائما انركز على قشوور الموضوع وننسى الاصل او الصلب ؟؟ هل تعتبر قشور فعلا ؟ ام هي ملح الحياة ؟ .. وانا متأكد ان فيه بعضكم راح يتقيد بس بالامثله الي انا حاطها ويجاوب على هالامثله الي هي تعتبر مجرد امثله ....اي قشور ) ...

اسف على الاطالة واحس موضوعي مبعثر .. بس لاتلوموني وانا اكتب الموضوع حسيت بالنعاس


تحياتي