مهرة

حياك الله ،، كلامك منطقي جدا ووجهة نظرك أعجبتني ..

شاكرة لك مرورك وردّك المميز عزيزتي ..

الأخت القديرة / جنّة الدنيا

آمل أن تسمحي لي على هذا التطفل لأن الموضوع للنساء فقط ..

لكن ما دعاني أشارك لأنه يتعلق بالرجال ..

جميع الردود من وجهة نظري طبيعية جداً لسبب بسيط وجوهري :

(( المرأة في حالة زواج الرجل عليها بأخرى ليس في يدها لا حل ولا عقد وإذا أراد الرجل الزواج لن تغير هي

أو غيرها ما أراد يعني لا تقدم ولا تأخر ))

من هذا المنطلق قد تبدو بعض الردود مضحكة وبعضها الآخر غير مقنع ..

لكن والله لو في يدها حل وعقد (( لتخزم الرجل خزم وتحشره حشر)) ..

أحياناً أقول لأم ماجد وش تسوين لو أتزوج عليك ؟؟

تقول : والله ما أقعد عندك دقيقة وحدة وأترك عيالك عندك الخ......طبعاً أنا أضحك من قلب

قلت لها هذا الكلام للاستهلاك المحلي ولا إذا جاء الصحيح زعلتي يومين شهر وبعدين ترضين ..

والدليل الواقع الذي نعيشه كم من شخص تزوج ثانية على زوجته والنتيجة رضت بالأمر ..


طبعاً بعض الأمور قد نراها نحن الرجال سخافة ولكن عند النساء من المسلمات ..

طبعاً أم ماجد بنت عمي ..

أقول لها لو تزوجت (( أهلك يحضرون العرس )) استهبل عليها ..

قالت لا لا لا والله .. لا أمي ولا خواتي ..

قلت سبحان الله عمي وعيال عمي لازم يحضرون لا ويعطوني العانية بعد ..

قالت أنتم يالرجال بكيفكم !!

قلت أجل وأمك وأخواتك ( بنات عمي ) وين تروحون ؟

قالت نقعد في البيت ( بربطة المعلم ) ندعي عليها !! صارت هي اللي تستهبل على..


باختصار أختي الكريمة ..

هذه الردود طبيعية لأن الزوجة ليس في يدها شيء ولا سيما أن العرف والشرع في هذه الحالة يقف في

صف الرجل..

لذلك هذا الأمر يكتمها بنسبة 100% فضلاً عن أنّه يجرح أنوثتها وكبريائها واعتزازها بنفسها ..

وتقف مجبرة مكتوفة اليدين لا تستطيع أن تفعل شيئاً ..

لكن والله لو في يدها شيئ كان شفتي الردود اللي عليها الكلام ..

الردود اللي تفحم ..

الردود اللي تعلم كل واحد حده وتجعله يقف عنده ..



احترامي لشخصكم الكريم ولبقية الأخوات ..

__________________

(( سترى حروفي تسير في عقلك !! ))

الزعيــــم

حياك الله أستاذي ومرحباً بعودتك ...

يعني ليش تقول كذا ؟؟!! تتشفّى

خنقتني العبرة وأنا أقرأ ردّك ،، أحس صعبت علي نفسي
حتى إني ماقدرت أعيد قراءته مرة ثانية ..!

عموماً بقولك سرّ من أسرار الحريم وفي اعتقادي إنه صحيح ولكل قاعدة شواذ:

إذا شفت الحرمة تاخذ وتعطي معك إذا فتحت لها موضوع التعدد فهذي إن شاء الله مامنها خوف مثل أم ماجد الله يحفظها ولايجعلك تشوف غيرها ،، يعني ممكن لو طرى عليك تتزوج بتزعل شهر شهرين ثم تتأقلم ..
أقول يمكن !!

أما إذا كانت مثلي ماتاخذ ولاتعطي في هالموضوع ولاعندها إلا كلمة "الشيخ الي يعقد لك هو الي يطلقني منك" فاعرف إنها جااااااااادة وماعندها لعب
وبالفعل أنا مستعدة أضحي بكل شي ولاإني يكون لي ضرة ..
حتى أبوي إذا زعل مني يقول ترى بدعي إن فلان يعرس أقوله مو أحسن لك يصير عندك بنت مطلقة ..

بعض الرجال الله يهديهم يحسبون كل الحريم مثل بعض "يزعلون يومين ويرضون" أعرف من الحريم من زوجها له 5سنوات متزوج وزوجته منكدة عليه عيشته إلى الآن وخلته يعض أصابع الندم إنه فكر يوم بالزواج ..
حتى تشوفها مسكينة تقول زواج زوجها الليلة !! يعني 5سنوات مابردت جرحها ولاكانت كفيلة بأنها تخليها تتأقلم وتتكيف ..
إذاً ،، مو كل الحريم مثل بعض ..

ومثل ماتفضلت أنا مو بيدي أمنع زواج زوجي لكني مو مجبورة إني أعيش باقي عمري عيشة ماأرضاها لنفسي ولاتعجبني ،، فأقوى ماعندي هو إني أخلي له العيال يقعدون بكبده وأروح أعيش حياتي مثل ماأحب ..

الله يحفظك لأم ماجد ويجعلها زوجتك في الدنيا والآخرة ،، والله لايجعلها تشوف الضرة .. آآآآآآمين ...

على فكرة ..!

أحد محارمي كان عايش حياة سعيــــــدة مع زوجته وكان دائما يمزح معها يقول: "اخطبي لي ياأم محمد" ترى بعرس ياأم محمد"
وهذي المرأة إما لأنها عزيزة نفس بطبعها أو لأنها كانت ترى الموضوع مزح كانت ترد عليه: "رح تزوج الله يوفقك" "أشر عاللي تبيها وأنا أخطبها لك" ومن هالكلام ..

المهم إن الرجال ماكان عنده نية يعرس لكن أثرو عليه بعض أصدقاءه وتزوج ،، وزوجته يوم شافت الموضوع جد نكدت عليه نكد مابعده نكد !! وهو لأنه يحبها رحمها مررررة لكنه قد تزوج وحملت زوجته ومابيده شي !!

وإلى الآن في شيل وحط مع زوجته الأولى !! يداريها على حساب الثانية ويبذل كل الي يقدر عليه وحتى الي مايقدر عليه عشان ترضى وتنسى ..

يقولي هذا الرجال: انتبهي إذا قالك زوجك "شرايك أتزوج؟" تاخذك عزة نفسك وتقولين "سو الي تبي!"
قولي له: "والله لأوريك شغلك !! والله لأروح لأهلي وأرمي عليك عيالك ...... الخ من التهديدات"
لأني ـ والكلام له ـ ماتزوجت إلا يوم شفت أم محمد سامحة لي وإلا لو كنت أدري عن عدم جديتها في كلامها ماسهل الأمر علي أبداً ..

وهذي ـ يابنات ـ نصيحة من رجل صريــــــح ويحب لكم الخير ،، الله يسعدكم مع أزواجكم ولايجعلهم يشوفون غيركم ..