جزاكم الله خير على الرد
انا ماحط صور بغرفة نومي وفي بيتي كله ماحط ادري انها تمنع الملايكه
ولمن كنت اكتب امس مشكلتي في المنتدى وانا ميته رعب كنت برع الغرفه ومشغله البقره من النت وبصوت واطي علشان مايزعج زوجي لان نومه خفيف وعارفته مايحب يسمع قران وقت النوم ويقولي اطفي القران ابي انام هو ينزعج من أي شي وقت النوم ولو كان قرآن ويرفض اشغل القران وهو نايم
اما تقولون لي ليش اخاف منه ؟؟ فلأنه يكون بصوت وشكل مرعب وبنفس الوقت كانه شخص مجنون وماقدر اتحمل شكله وصوته وخاصه انه تكرر منه كثير وصوته ينسمع حتى لو كنت برع الغرفه وانغز عنده بس علشان يصحى ويسكت
وشلون تبوني اواسيه واخفف عنه وهو مو حاس بمعاناه يعني لو قالي كنت حلمان بكابوس وحفت والخ من الامور اللي تبين انه يعاني من الكابوس كنت طمنته وحظنته وخففت عنه وقريت عليه وكل شي ب
س هو عادي عنده انا اللي اكلها وهو يرد ينام وعاااااااادي عنده ويمكن اكون انا اللي ازعجته لاني مسكته بالقوه وصحيته اما هو مادرى عن نفسه واذا صحيته عادي بيرد ينام ومو خايف ولا قلبه يرجف ولا شي بيدخل بسابع نومه وانا اللي اكون مرعوبه من اللي شفته وسمعته
انا لمن كان يجيني كابوس قبل كنت ارتعب واصحي زوجي واحضنه وجزاه الله خير يحضني ويطمني واتطمن منه احس انه يحميني مع اني كنت اقرا المعوذات قبل النوم وبعد الكابوس الا اني كنت اظل خايفه واتطمن بوجود زوجي ولو راح الحمام اروح وراه واقوله لاتقفل الباب ولا تتأخر علي وانتظره لين يطلع وانام بحضنه واحس معاه بالامان
بس اللحين وقفت مني الكوابيس من زمان واللحين هو اللي يحلم ويخوفني ويصيح بطريقه تخوف ويهذي ومافهم له ويالله يصحى بعد ماكان يطمني وكان ملاذي الآمن صار هو اللي يرعبني واخاف منه
مع اني انا اللي اقوم بنفسي من الكابوس واحضنه بالقوه واحكيله حلمي وانا خايفه ولا عمره سمع مني شي او صحاني من النوم وقالي شفيج مثل ما انا اسوي له
ولمن تكرر منه هالشي صرت اتروع منه الصوت اللي اسمعه بطريقه بكاء عالي وكلام كثير بس مافهم منه ولا كلمه احيانا كنت احاول اركز وش يقول افهم منه وش مشكلته بس اللي يصير اني مافهم ولا كلمه وكأنه بعالم ثاني وبالمقابل يدخل فيني روع احسه بيوقف قلبي واقوم بطريقه هستيريه من الخوف اصرخ عليه باسمه ابيه يقوم وامسكه بكل قوتي اصحيه بالقوه ابيه يصحى وابي اشوف زوجي طبيعي واللي اشوفه واسمعه منه ابيه يختفي بسرعه لانه يطول في البكى ولو مايصحى بسرعه انا اللي بموت ولاتقولوا لي اني اطمنه انا ماقدر وانا اللي ابي من يطمني
وانا اللي كلتها منه من امس ماقدرت انام معاه هاربه من الغرفه بكبرها ومانسيت صوته وياليت على كذا بس نايمه بغرفة عيالي الصغار وقاعده اقرا المعوذات ومشغله البقره بس كنت للحين مرعوبه وارتجف مو بس قلبي اللي يرجف كنت احس جسمي كله يرجف من داخل طير النوم مني مادري ليش ظليت متروعه وبالمقابل هو كمل نومه وراح الشغل وانا يمكن مانمت الا ساعتين وبعدين قمت وقعدت اجهز عيالي للمدرسه
واللحين اوكي ارتحت بس خايفه يتكرر منه مره ثانيه وانا ماعدت اتحمل اشوفه بهالشكل وهو مايهتم لهذي المشكله واسهل جواب عندي صحيني !!!
وبالنسبه للتسجيل سجلت صوته في الجوال ووقتها ماكنت اخاف منه بهذي الطريقه لانه ماكان يصيح كان كلام طوييييييييييييل بعضه مفهوم وبعضه لا بس بصوت عالي وتدرجات في الصوت وطريقة كلامه كأنه مجنون او اهبل وماصدقني الا لمن سمعته وكنت ميته ضحك عليه وهو صدقني بعدين لانه صوته واستغرب من نفسه وانحرج وقالي امسحيه لان كان كأنه كلام واحد من المجانين !!
وش بستفيد من التسجيل انا ادري انه يصدقني انه كان يصيح بس انا وش بيصبرني وقت مايكون هو بهالحاله المخيفه !!
ومشكلتي ان زوجي مايعاني ولا حاس بمشكله انا اللي اعاني من اللي اشوفه اما هو مايدري عن نفسه ومو حاس بمشكله وعادي بيكمل نومه المشكله عندي انا !!
اما بالنسبه للسؤال متى هالشي بدى عنده من اللحين والا من زمان فالجواب الصياح بهالطريقه مو من زمان من اللحين من شهور مو متأكده بالضبط من متى بس ماكان فيه هالبكى والكلام الغريب وماكنت اخاف منه بهالطريقه اللي ترعبني واحسها تقتلني !!!

__________________