اخي مازن محمد

انا قريت موضوعك والردود كلها.. وبصراحه ترددت اكتب مشاركتي هذي ولا لا

لان ما ودي احد يفهم مشاركتي غلط او تأثر مشاركتي على قرارك..

انا راح اكتب لك قصة صديقتي..

على لسانها تقول :

انا كنت ضد العلاقات قبل الزواج
لكن
قبل تقريبا 3 سنوات وكنت لسه متخرجه من الثانويه تعرفت على شاب
من الانترنت .. وكلمته عن طريق المسنجر بشكل متقطع وكلامنا كان قليل جدا
ومن البداية قال لي ان غرضه الزواج .. ماقلت له اي شي عني لا اسمي ولا عائلتي
ولا شي ابدا ولا حتى شاف صورتي ولا كلمته بالتلفون ابدا

بس بعد فترة طويلة قلت له على اسمي وعائلتي
في زواج بنت عمي جوا اهله وشافوني

وبعدها صارت عدة لقاءات بين الاهل بعضها مخطط له وبعضه بالصدفه
وكنا نتواصل عن طريق المسجات بالجوال بدون المكالمات

وبعد فتره كلمته تلفون

وبعد سنه وكم شهر تقدم لي وتمت الخطبه
والعقد

احنا الحين مخطوبين صار لنا 10 اشهر ..

نحب بعض بجنون

فيه مشاكل بينا اكيد بس مالها علاقه لا بالشك ولا بالغيره.. خلافات عاديه تحصل بين اي اثنين
والحمدلله بعد هالمشاكل نرجع وقلوبنا متصافيه لان الحب موجود..

وكل المشاكل الا واجهتنا مالها علاقه اصلا بـ انو كانت لنا علاقه ببعض قبل الزواج..

اختلاف آراء لا اكثـر وبعضها دلع

انا قلت القصه باختصار

بصراحه انا قبل الخطوبه كنت في حاله نفسيه مايعلم فيها الا الله

ندم وخوف من المستقبل وقلق وتعب نفسي واحاتي

كانت نفسيتي متدمره كلياً.. ابدا ما كنت مرتاحه.. مع اني كنت واثقه منه

بس احيانا كان يخالجني الخوف من اشياء كثيره

لو مثلا ماصار نصيب او ما حبينا بعض بعد الخطوبه او او ...


بس ماشافني الا بالنظره الشرعيـه..

ولما اسئله انت كيف قررت تتزوج وحده ماتعرف عنها شيء
( طبعا بعد ما قلت له اسمي سئل عني وعن اهلي ) يقول لي انه مايبغا يتزوج وحده مايعرف كيف تفكيرها و انه مايبغا يتزوج وحده بطريقة تقليديه

مع انه انسان ملتزم جدا واهله محافظين..


قصه غريبه صح؟! بس واقعيه جداً..

وفي اشياء كثيره وتفاصيل ماذكرتها

وزي ما قلت ان العلاقه دامت 3 سنوات ..

يعني هذا المختصر


وانا مو ندمانه ابدا اني اخترته كـ زوج لي
وبصراحه في نفس الفترة الا كان بيتقدم لي فيها تقدم لي شخص اخر
وانا اخترته هو

واحيانا بيني وبين نفسي افكر ان مستحيل احد يفهمني او يسعدني غيره



وانا بصراحه ما استمريت معاه في هذي العلاقه الا لما قال لي انه ناوي على الزواج

وكنت اعتبرها وقتها مغامره شديدة الخطورة من قبلي

واكثر شي كنت خايفه عليه سمعتي

وكنت دائما اخاف بما انه يعرف اسمي ممكن يروح يفضحني او شيء من هذا القبيل



في الاخير اتمنى انك تدعي لصديقتي انو يتمم لهم على خير ويوفقهم ويسعدهم..


وانت بعد الله يوفقك ويهديك للقرار السليم ويريح بالك..

تحياتي لك..