اولا : زوجي ما جبرني اني اشتغل والعمل اختياري بالنسبه له

وثانيا : انا معاكم ان الزوجه لازم اتعاون زوجها في المصروف لكن انا متحمله كل مصروفي وثلاث ارباع مصروف اعيالي ... يا جماعه انا اتضايق لما شوفه يهرب وقت الدفع ... اتضايق لما يتعذر لي عن هديه لانه مجمع افلوسه لاسهم او امشارك ابمشروع او مدخر لسياره .... انا مااطلب منه فوق طاقته يعني اذا هو امجمع 20000 لغرض معين ما بيخسر اذا اشترا لي هديه ب 500 او حتى عطر بس ابيه يدخل عليه بهديه

هو يدري اني كلش مو امقصره معاه واني اصرف كل اللي عندي تقريبا علي وعلى العيال لكنه مش مهتم

انا كتبت مشكلتي مره في المنتدى وطرحوا علي بعض الاخوان اني اشترك ابجمعيه واشتركت تدرون لما قلت له اني بستلم الفلوس ابشهر سبعه قال لي : تمام يعني بتخلينها لتذاكر السفر

ومره جمعت لساعه اشتريها لي وهو يدري حتى اني كنت استشيره وأخذ رايه في الساعه لكن تفاجأت لما يالي وقال لي ترى لما انسافر مصروفج عليج ... وطبعا مو بس مصروفي .... مصروفي ومصروف العيال والهدايا كلها ... ولما خلصت افلوسي في السفر وطلبت منه قال لي انا عندي بس المشكله انني ابغي ادفع للفندق كاش وعطاني مبلغ بسيط جدا وبعدين انا استحيت اطلب لاني مش من النوع اللي يحن ويطلب

صدقوني ما قط مره شريت قميص او ملابس ماركةاو غاليه لا لي ولا لعيالي واذا اشتريت له هديه اشتريها غاليه وهو يقدرها ويعرف غلاتها لكن .....

صدقوني انا مايهمني اني اوفر ولا يهمني اشتري لي ساعه كثر ما يهمني انه يحسسني انني زوجته وملزوم ابصرفي

يا جماعه انا تعبت والمح له انه لازم يساعدني لكن بلا فايده وكثر التلميح مو زين

يا جماعه انا احيانا افكر اني اترك الشغل عشان هو يعطيني كل شهر راتب ولو حتى بسيط وما يكفي مع اني ادري اني في وقتها بكون مرتاحه اكثر وهو ما بيقصر علي اذا طلبت ولا بيقصر ..... ودايما اتلمس اي عذر عشان اترك الشغل وهو امخليني على راحتي

يا جماعه دلوني شسوي ... دايما اقول ما اعطيه هديه لكن مااقدر ... صدقوني مااقدر ... احس انه ينتظر الهديه ... وما ابي اخيب ظنه ... انا هالشهر اشتركت في جمعيه جديده وهو امشجعني اني اشترك فيها والله يعيني هالشهر على الصرف لان الصرف بيكون للعيد بس انا ادري اني بجبره انه يصرف عالاقل على العيال بحكم قلة المادة عندي

ادري طولت بس حبيت اوضح