اخوي اذكر إنه كان المفروض اجتماعكم بعد اسبوعين ؟؟؟
لكن إذا كان الإجتماع غدا مثل ما قلت .. فبرأيي الذهاب من باب إنك خلاص عملت كل اللي عليك و لاحد يلومك بعد كذا
و اكيد بيجهزوا حالهم ، فما يصير إذا كان بكرة تخلف بوعدك ..

بس إذا دقيت و اعتذرت عن موعد الغد و قلتله الكلام هذاك
راح يفهموا إنه تهديد و هم اصلا ما اتضحت الرؤية عندهم و ما عندهم غير كلام اختهم عنك
و راح يثبت عليك الكلام و التهم اللي هي جالسة تنشرها


إذا اجتماعكم بكرة إن شاء الله ..
- روق اعصابك اليوم ، و روح الحلاق و البس و تعطر بكرة .. و شماغ و كذا
خليك ريلاااااااااااااااااااااااكس .. كأنه ( غيابها ما أثر فيك ) .. إذا رحت لهم تعبان و نحفان ووو إلخ
على طول راح يقولوا ، نحفففف من الهم ..

- بعد كذا .. خلي الإبتسامة في وجهك ، مو ابتسامة الخايف من المواجهة ( و ادري انك مو كذا بس تذكير )
ابتسامة الواثق من حاله ، ابتسامة الشخص المرتاح و مبسووووووط نفسيا ..
حط احتمال 1 في الموية إنه مظهرك راح يوصل لهم ،،
نحن الحريم ترى نهتم في التفاصيل هذه ، و ام زوجتك يمكن راح تسأله ( كيف لبسه جاء و شكله ) ؟

- مادري على ايش كان اتفاقكم إنكم تتقابلوا ؟؟؟ بس التزم انت بالإتفاق ..
مثلا اتفقتوا تتقابلوا بزمان او مكان .. خلاص استنى اخوها على حسب اتفاقكم
اتأخر هو ؟ أو اخلف بالوعد .. لا تلاحقهم .. خلاص عملت اللي عليك و سعيت بما فيه الكفاية
و الله التزم بالوعد و تقابل معك على حسب اتفاقكم .. خلاص شئ كويس ..و روح معاهم و قابلهم

- ما تقاابلتوا فرضا و ما دق عليك و اخلفوا بالوعد ..
خلاص عملت اللي عليك و كفيت و وفيت

- و الله تقابلتوا و الحمد لله .. خلي الرسايل على جنب ..
حاول إنك تخليهم هم يتكلموا و إنت تسمع .. علشان تعرف ايش في قلوبهم بما إنه اخوها ساكت اغلب الوقت
و انت ما تدري إيش نيته من سكوته ؟ خليهم هم يتكلموا و لا تحط مبررات لنفسك كل شوي امامهم ..
إنت انسان منصف و تنصف الاخرين .. لكن اعترافك بأي غلط لنفسك خليه لنفسك لحد ما تشوف منهم مبادرة كذلك
لا يخلوها حجة لنفسهم بمكابرتهم و تبرير اخطاء اختهم

- يوم تبدأ تتكلم معهم .. قول له :
يا بو فلان .. أنا جاي اليوم علشان الصراحة كل اناء بما فيه ينضح ..
( هذه المقدمة ، تبين إنك مانت جاي علشان اعتذار .. جاي علشان تحط حدود لبنتهم و المهزلة هذه )

قول له ، ياخي كل بيت و فيه مشاكل و اختلافات بسيطة .. لكن مو كل حرمة تدق على اهلها و تنقل كل شئ
هذا الشئ عيب و ماحد يرضى بالعيب ..

قول له ، انا بانقل لكم الجانب التاني من حياتنا علشان تكون الصورة واضحة و لإن النساء كافرات للعشير
و الله ما أبغى أمن عليها ،، لكن حتى تعرفوا إنها عايشة في بيتها ملكة و تنقل لكم صورة معاكسة
( عاد إنت تعرف إيش موفر لها ،، و إيش الصورة المعاكسة اللي هي تنقل لهم )

قول لهم ، لا احترام و لا تقدير و لا و لا و لا .................. إلخ
( حط هنا كل عيوبها اللي ما يتحملها أي شخص اخر غيرك )
حتى يعرفوا إنك متحمل و صابر على بنتهم

ثم قول ، و الله إني كل شوي اكبر عقلي و اقول يمكن بعدين تتغير و تعقل ..
و علشان معزتها ( و تكلم هنا إنك ما صبرت إلا بسبب انك تكن لها مشاعر )
لكن الرجال يتحمل و في الأخير يتبدل الحب لكره ( هنا علشان تخويف من تبدل مكانتها عندك )

قول لهم مافيش أي رجال يتحمل إنه زوجته تنقل كل شئ لاهلها و تشتمه بالألفاظ هذه ..
( هنا قول لهم إيش تتلفظ عليك )

.............................

ثم خليهم يتكلموا و اسمع لهم ..


بعدين ، قول لهم حكاية الطرد و سكوت الوالدة و الجميع .. و السفر من غير إذن و الرسايل المستفزة و رمي بنتها عليك
و قص صورتك و رميها على الأرض و الأحداث الأخير ..
كانت القشة اللي قصمت ظهر البعير و هذا سبب كلامي معكم ،، لإنه لحد هنا و ما راح أصبر اكثر مما صبرت ..


( تقصدت اخلي المواقف الأخيرة في نهاية كلامك .. لإنهم متوقعين بتروح تكلمهم علشان النقطتين هذولا ..
فمجهزين حالهم و مجهزين مبررات و كذا و خاصة إنه الصورة عندهم نصها مو واضح .. )