السلام عليكم. .
انا طرحت مشكلتي سابقاً في المنتدى. .http://www.66n.com/forums/showthread.php?t=261099
هذا الرابط
واشكر كل من رد علي جزيل الشكر. . وبالأخص bulldozer
اشكرك جزيل الشكر لتفاعلك معي..

الآن انا مازلت بيت اهلي .. طبعاً زوجي قاطع علاقته فيني نهائي من يوم ماكنت عن اهلي لم يتصل ولا يسأل نهائي واذا بغى بناته اتصل على اخوي او ابوي وياخذهم عنده ينامون يوم ويرجعهن ..

ولما قاله اخوي ليش ماتتصل على زوجتك وتقولها باخذالبنات .. قال مالي كلام معها المراه الي ماتحترم زوجها مالي كلام معاها..

طبعاً صار كل يوم يطلع مع عمامي و خوالي صار يتلزق فيهم ويعزم هذا ويخلص حاجة هذا
واخوي الكبير كل يومين مسمعن كلام ويقولي ليش ماتتفاهمين مع زوجك عاجبك الوضع

طبعاً انا صرحت له اني ماعادابيه واكره العيشة معه ولو يبي يطلق ماعندي مانع انا ما ابيه
قالي اخوي متأكده انك ماتبينه قلت ايه مابيه وانا عايفته من زمان لاكن تعبت اصبر نفسي قالي عادي عندك بناتك يتشتتن
قلت الحمدلله مافي احد بيتشتت انا ماني جالسة بالشارع انا جالسه بيت ابوي..

طبعاً اهلي مقررين يسافرون عشان اختي لهاشغل ومقررين يجلسون 20 يوماً. .
فرحت معهم وابوي قال لاخوي عط زوجي خبر لان بناخذ البنات معنا وقلت لاخوي مره وحده خله يحولي فلوسي الي بحسابه ...
اخوي قال لزوجي ...
وفجأه قال انا ابغى احل الموضوع وابغا اتفاهم ..
وجاء بمجلس اهلي وجايب معاه الفلوس و اغراض للبنات وقال لاخوي ابغى الوالد وينه بتفاهم معاه ...
ابوي قال انا مشغول واذا يبي يتفاهم يتفاهم مع زوجته المشكلة بينه وبينها..
المهم رحت انا وبناتي مع اهلي ..
امي كلمت خالتي(اخت امي) وحنا بالسفر وقالت لها اني مسافره معهم وقالت لها السالفه امي احسها تأثرت بكلام خالتي ..
خالتي قالت لها كل الناس بينهم مشاكل ولازم تصبر مهما كان .....وو
ومن يومها وامي الله يهديها تتهمني بالدلع وقلت الصبر على اطرف موقف يحصل
وتلمح وتحسسني بأني انا المشكلة وليس زوجي! !!

غير اخوي الكبير الي اتهمني اني ما احترم ودلوعه وماابي اصبر ..
وقالي انتي تطولين صوتك على امي و ابوي
انا هنا دمعت عيوني غصب عني حسيت بالغصه ماقدرت اكمل حتى كلامي. .
انسدحت على اقرب كنبه وبكييت بصمت وبدون صوت لدرجة كانو يحسبوني نايمة ..
جاء ابوي وشافني سألهم وش فيني وامسكته امي تكلمه..

وجاني وقالي قومي وارفعي راسك محد له دخل والي تبينه
انتي سويه ومن اليوم ورايح اخوك ماله دخل فيك..

جتني غصة ثانيه ماقدرت اتحمل قمت على طول لجل خاطر
اغلا رجل في حياتي ..

لما قمت تفاجئو اني كنت ابكي ورجع ابوي يكرر كلامه..

انا الحين مع اهلي مسافرين .. واتصل اخوي وقال انه زوجي يسولف عليه ويقوله انه بيسافر لنفس المدينه الي احنا فيها ومعاه امه وخواته..

انا الآن وضعي مع اهلي نفسيتي مرتاحه وبين خواتي الحمدلله
لاكن امي اسلوبها يضايقني شوي واختي الصغيرة تتمشكل مع بناتي وتغار ومنهن
والحمدلله مرتاحة حالياً كثييير كثييير
وافضل مما كنت عليه

انا كرهت زوجي من اسمع طاريه اتضايق افكر بالطلاق كثييير
انا حاليآ من ناحية الماده معي كم قرش ممشيه حالي فيه بهالسفره
ادعولي اتوظف وافرح قلب ابوي وافرح يارب وامشي حالي بالوظيفه يارب..

ايش رايكم ؟؟
واذا اصرو اهلي اني ارجع له ايش اسوي ؟؟ هل ارفض
ارجوكم انا بحاجة لرائيكم..
اللهم اجعل التوفيق بدرب كل من يرد علي 💕

مستجدات
الرد 72
http://www.66n.com/forums/showpost.p...3&postcount=72

مستجدات
الرد 93
http://www.66n.com/forums/showpost.p...3&postcount=93