(تخرجت بتخصص لا يناسب طموحي)
السلام عليكم ورحمة الله وبركاته

عندى مشكلة او مشاكل كتير وعايزة اللى يوجهنى صح وينصحنى ويدينى امل لانى محبطة جدا

انا عندى 22 سنة متخرجة من كلية الآثار والحضارة الاسلامية ..
مشكلتى انى بعد ما اتخرجت واجهتنى مشاكل كتير فى التقديم لاى عمل لانى اما بروح اقدم بحس بعدم تقدير للمؤهل بتاعى ويقولولى دة نادر ومالوش شغل .. رغم انها كلية من كليات القمة
انا كنت جايبة فى الثانوية 93.5 وكان نفسى ادخل اعلام لكن فرقت معايا على نص درجة فاخترت اللى بحبه بعد الاعلام وهوا التاريخ فدخلت اثار رغم انه كله قالى ادخل كلية ألسن ودى كلية خاصة باللغات ومجموعها اعلى من الاثار بس انا رفضت
واما دخلت الكلية اللى انا عاوزاها اللى هيا الاثار الصراحة انى محبتهاش واتخنقت من مناهجها اللى كلها تعقيد وحتى الطلبة مكنتش مرتاحة معاهم ومكونتش اصحاب كتير منها ومع كدة مفكرتش انى احول منها معرفش ليه .. بس كنت حاسة انى مش عارفة انا عايزة ايه ولا بحب ايه فاستسلمت للامر الواقع

دلوقتى بعد ما اتخرجت وبدات ادور على شغل احبطت من النظرة السيئة للكلية بتاعتى ومش بلاقى ليها شغل اصلا فى مجالها وبلاقى فى مجال اللغات كتير فبندم انى مدخلتش كلية اللغات ..

انا دايما بحس انى قدراتى عالية الحمد لله فى الذكاء والطموح لكن مش عارفة انا عايزة ايه

فكرت ارجع اقدم تانى فى كلية اللغات لكن الموضوع مش سهل لانى خريجة .. فكرت بما انى فى اثار اخد لغة اجنبية واعمل دبلومة ارشاد سياحى وابقى مرشدة سياحية لكن لقيت دة مش هينفع مع المسئوليات المستقبلية زى الزواج وتربية الاولاد

فكرت اقدم فى التعليم المفتوح اداب انجلش بس مترددة لان التعليم المفتوح شهادته مش قوية زى شهادات الجامعات الاساسية

فكرت فى حاجات كتير وعمالة افكر لحد ما تععبت من التفكير ومش عارفة لسه انا عايزة ايه وخايفة حتى لو خدت لغات ارجع محبهاش وافكر ادرس حاجة تانية غيرها

انا فعلا انسانة مترددة جدا بس الحاجة الوحيدة اللى واثقة منها انى نفسى ابقى حاجة كبيرة واسعد اهلى لانهم تعبوا كتير عشانى انا واخواتى

ياريت تساعدونى

(تم التعديل ليتناسب مع المضمون)