مشكلة البخل والسفر..ساعدوني
انا عضوة جديده هنا ولكني كنت
اتابعكم بصمت كانت تعجبني ردودكم وطريقة حلكم
لمشاكل الاعضاء
فانا تائهه ومحتاجه ليد تساعدني...قد تكون
مشكلتي ليست كبيره لكنها مشاكل صغيره وانا
اعلم ان هذه المشاكل سوف تكبر يوما ما
وتتفاقم ولا اعرف اسيطر عليها ...
لا اعرف من فين ابدا مشكلتي
انا تزوجت من سنه من شاب طيب
سوف اعطيكم بعض التفاصيل عن حياتنا:::
انا اهلي بمنطقه واهله بمنطقه اخرى وهو
يعمل بمنطقه ثالثه وسكنت معه بمقر عمله..
عندي بعض الامور لابد من توضيحها ويوجد
بداخلها المشاكل التي اعاني منها
::::
1- احس زوجي بخيل
لما اطلبه مصروف يهاوش ويزعل لما اروح
لديرة اهلي واحنا بالسياره اقوله عطني
300 ريال او 250 لانه عيب ان اهلي
يقعدون يصرفون علي يعصب ويقعد يتأفف
ويلعن الساعه اللي تزوج فيها وبعد ماينكد
علي يطلعها ويعطيني اياها وانا خلاص
اكون شبعانه بكاء لاني ماتعودت عند اهلي
كذا لان اللي ابيه اخذه وبعدين يقولي
انت ليش زعلتي...
2- هو ع الزواج
طلع قرض وبقي منه مبلغ محترم ع اساس
يشتغل فيه انبح صوتي وانا اقوله دور لك
مشروع واعمل شي لعيالك لاتسوي مثل ابوك
حتى بيت ملك
ماعنده رحت اشتكيت لامي وقالت لي انا عندي
مشروع
واتشارك انا واياه هو يستفيد وانا استفيد حتى
راس مال امي اكثر بكثير من راس ماله..احيانا
يوافق على مشاريعي وبعدين يغير رايه
ما ادري ليه
..مايبيني اتدخل بمستقبلنا رغم اني
انسانه حكيمة واعرف اتصرف.واذ جيت اخطط معه
مستقبلنا يقعد يتريق
ويغير الموضوع..
ومايحب يشاورني باي شي يحب انه يمشي
رأيه رغم انه فتره الخطوبه ماكان كذا ...
3- جاء اشتكالي من ان
مايبقى معه لاخر
الشهر شي من الراتب قلت له خلاص عطني 400 ريال
وانا امسك ميزانية البيت واوفر لك بدل صرفك
الفاضي ذا قالي خلاص وبعدين غير رايه قال لي
ماباقي غير اعطيك فلوس!!!!!
مع العلم ان اللي يبقى من راتبه من بعد
الاقساط والايجار 2800 ريال!!!
وعلى الرغم اني ورب الكعبه ما اطلبه شي
الا حق الثلاجه وادوات التنظيف انا موب من
النوع اللي كل يوم بالاسواق مكياج وماركات
ومدري وش كله مراعيه ظروفه...
4- دايم اهديله هدايا
غاليه من مالي الخاص وطلبته مره يهديني ولو
مره قالي انت تعرفي انا ما احب الهدايا وهدايا
مافي..حتى البارح راح اشتراله 4 عطور وربي لما
دخل علي بالكيس قلت بس جاب لي هديه وطلع العطر
وقام يتعطر ودس الباقي بالدولاب قلت له طيب ما
افتكرتني لو بعطر ب 10 ريال قالي العطر اللي
تحبيه مخلص قلته له موب شرط كنت اخترت لي اي
شي ثاني!!!! (احس الشي هذا حز في نفسي كثير
انا ماعمري بخلت عليه بشي)
5- هو يدلعني بالكلام
ويراعني بالشغل خاصه اني حامل ولاني عودته من
يوم ماحملت اشتغل بالبيت ع قد مجهودي لاني من
يوم ماحملت وانا تعبانه(لان حضرته ماخلا احد
ماعلمه اني حامل وانا موصيته يسكت عشان
الناس ماتعطي خير ولان كل اللي حوله مايعلمون
ع زوجاتهم) هو من ناحية الدلع مدلعني ويقولي
كلام حلو بس لاطلبته فلوس قلب علي ويقول
عني ماااديه..
6- هو ماعنده بيت ملك
مسكني بشقه مفروشه وعند اهله ينوموني بغرفه
الجلوس واحيانا يستأجر لي شقه
اهله فقراء وبخيلين يموتون ع القرش بعكس
اهلي من الطبقة الوسطى وكريمين جدا وربي لما
اروح عند اهله حتى اكل مايقدمون لي الا القليل جدا
رغم ان مطبخهم مليان ورغم اني اول ما اسلم
ع امه اعطيها مبلغ من المال كهدية
ومن مالي الخاص فيني..انا احب اهله بالمره
واحب اسافر لهم بس هو قالي تقعدين عند اهلك
احسن انا ابي اروح عند اهلي ابي اكون فرررري
اطلع مع اخوياي وافلها ابي اعيش العزوبية ..
7-فكرت اذ توظفت اتعاون
معه ونشتري بيت لنا عن طريق البنك في ديره
اهله عشان اعيش مرتاحه بس في ناس نصحوني وقالو
لي خلي فلوسك لك مايستاهل تعطيه شي خليه هو
اللي يتعب ويسوي لعياله بيت لان بكره راح
يفكر يتزوج عليك (((وش تنصحوني انتم به)))
8- لما جت مكرمه
الملك قلت له وفرها عشان نشتري للبيبي اغراض
واثاث والباقي حطه مع المبلغ اللي عندك
بالبنك وانا كررت هالشي 100 مره له وقال لي
خلاص ابشري.. ولما جاء الوقت اللي لازم اقضي
للبيبي قعد يتناقش بالمبلغ وانه كثير وانه
موب مغفل عنده اخوياه ويعرف كم هم يصرفون
(على الرغم من اني علمته من اول كم ابي)
وانا طلبته 1500 ريال لملابس البيبي وسريره
وملابس لي حق النفاس وانا عارفه وربي ماتكفي
قال لي لوانا انزل معك وربي ما اخليك تاخذين
الا ب 300 ريال انا موب مغفل لاحول ولاقوة الا بالله
وبالملعنه واختها اعطاني اياها ورحت عند اهلي
عشان اقضي وطلبته زياده 200 ريال مصروف بجيبتي
تخيلو قالي لي خذي من 1500 قلت له ماتكفي قالي
اذا احتجتي حولت لك رماني عند اهلي وطلع لاهله
اسبوع..لما رحت بيت اهلي تعبت وكانو كل يوم
يودوني للمستشفى وكله خاص وكنت استحي ان اهلي
يدفعون لي اظطريت اخذ من 1500 وعلمته وطلبته
يحول لي وبالفعل حول لي(انا استغربت انه حول
لي لكن اذ عرف السبب بطل العجب وراح تعرفون
بعدين ليش اعطاني)
عاد لازلت انا تعبانه وطلبته يجيني يقعد عندي
وجاء ع اخر الاسبوع لان اجازته قربت تخلص وقلت
له انا زوجتك وحقك تقعد معي(انا بديره اهلي)
وتشوف مصالحي موب بس رامني بحلق اهلي هم يودوني
ويجيبوني هم بعد عندهم التزاماات واخذ لي شقه
وقعدنا يومين
هو روح لعمله وانا ظليت عند اهلي بعدين دق
علي وقالي انا طالع مع الشباب لبرا المملكة
بعد كم اسبوع (على الرغم من اني زمان بعد
الملكه قلت له اكره الرجال اللي يسافر بدون
زوجته ووعدني وعد شرف انه مايسافر الا وانا معه)
يبي يروح مع شباب مره وسخين حقين بنات ووساخه
هو كان يحكيلي عن البنات وايش
كانو اصحابه يسون معهم وبلاوي زرقا
قلته له احنا بحاجه الفلوس اللي راح تلعب فيها
هناك انا حتى بيت ماعندي زي زوجات اخوانك
وانت بكره بيجيك عيال وانت ماسويت عشانهم اي شي
وقلت له ان انت منت مسافر لا علاج ولا دراسه
بس سربته اذا عندك شي وفره نسافر سوا بعد ما
اولد قالي والله راح اسفرك بس انا ابي امشي
استكشف المنطقه مع الشباب وبعدين نروح انا
واياك...
وانا عارفه انه بيسافر وبعدين يقولي ماعندي
فلوس اسفرك...وانا مابيه يتعود على السفر والحرام
..وربي اني موفره له كل شي وربي احيانا
اضغط ع نفسي واسافر معه بمقر عمله واظل
ببيتي حتى اعفه عن الحرام وحتى ما احسسه
اني بعيد عنه
باخر المكالمه زعلت وقلت له تبي تروح
روح بس لاعاد تدق علي ولاتحاول ترجعني
لانك راح تبيعني عشان سفرتك ووناستك
وانا جاده بكلامي انا صبرت وتحملته كثير
وناويه اقعد عند اهلي الين احل كل
اموري معه...
بعد ماشفتو قصتي وش تنصحوني فيه ابي مشورتكم
بكل الامور اللي ذكرتها لكم
ملاحظه:انا جدا احب زوجي وهو بعد مره يحبني
وتعب كثير عشان يتزوجني
وانا بعد تعبت..بعد ماتزوجته كل جماعتي
قعدو يتريقون عليه لانه
اقل مني اجتماعيا بس
انا ماكان هامني احد الا هو
ماعلي من اللي يتكلمون..
وهذه حياتي ولا ابي اخربها
بس ابي ابني معه حياة حلوة
نبني فيها سوا مستقبلنا
ابي اعيش مثل اي زوج و زوجه
في بيت سعيد..
التعديل الأخير تم بواسطة om abdlah ; 10-06-2011 الساعة 03:21 PM
10-06-2011, 11:07 AM
ضوابط المشاركة
العرض الشجري