|
مشكلة البخل والسفر..ساعدوني
انا عضوة جديده هنا ولكني كنت
اتابعكم بصمت كانت تعجبني ردودكم وطريقة حلكم لمشاكل الاعضاء فانا تائهه ومحتاجه ليد تساعدني...قد تكون مشكلتي ليست كبيره لكنها مشاكل صغيره وانا اعلم ان هذه المشاكل سوف تكبر يوما ما وتتفاقم ولا اعرف اسيطر عليها ... لا اعرف من فين ابدا مشكلتي انا تزوجت من سنه من شاب طيب سوف اعطيكم بعض التفاصيل عن حياتنا::: انا اهلي بمنطقه واهله بمنطقه اخرى وهو يعمل بمنطقه ثالثه وسكنت معه بمقر عمله.. عندي بعض الامور لابد من توضيحها ويوجد بداخلها المشاكل التي اعاني منها""""":::: 1- احس زوجي بخيل لما اطلبه مصروف يهاوش ويزعل لما اروح لديرة اهلي واحنا بالسياره اقوله عطني 300 ريال او 250 لانه عيب ان اهلي يقعدون يصرفون علي يعصب ويقعد يتأفف ويلعن الساعه اللي تزوج فيها وبعد ماينكد علي يطلعها ويعطيني اياها وانا خلاص اكون شبعانه بكاء لاني ماتعودت عند اهلي كذا لان اللي ابيه اخذه وبعدين يقولي انت ليش زعلتي... 2- هو ع الزواج طلع قرض وبقي منه مبلغ محترم ع اساس يشتغل فيه انبح صوتي وانا اقوله دور لك مشروع واعمل شي لعيالك لاتسوي مثل ابوك حتى بيت ملك ماعنده رحت اشتكيت لامي وقالت لي انا عندي مشروع واتشارك انا واياه هو يستفيد وانا استفيد حتى راس مال امي اكثر بكثير من راس ماله..احيانا يوافق على مشاريعي وبعدين يغير رايه ما ادري ليه ..مايبيني اتدخل بمستقبلنا رغم اني انسانه حكيمة واعرف اتصرف.واذ جيت اخطط معه مستقبلنا يقعد يتريق ويغير الموضوع.. ومايحب يشاورني باي شي يحب انه يمشي رأيه رغم انه فتره الخطوبه ماكان كذا ... 3- جاء اشتكالي من ان مايبقى معه لاخر الشهر شي من الراتب قلت له خلاص عطني 400 ريال وانا امسك ميزانية البيت واوفر لك بدل صرفك الفاضي ذا قالي خلاص وبعدين غير رايه قال لي ماباقي غير اعطيك فلوس!!!!! مع العلم ان اللي يبقى من راتبه من بعد الاقساط والايجار 2800 ريال!!! وعلى الرغم اني ورب الكعبه ما اطلبه شي الا حق الثلاجه وادوات التنظيف انا موب من النوع اللي كل يوم بالاسواق مكياج وماركات ومدري وش كله مراعيه ظروفه... 4- دايم اهديله هدايا غاليه من مالي الخاص وطلبته مره يهديني ولو مره قالي انت تعرفي انا ما احب الهدايا وهدايا مافي..حتى البارح راح اشتراله 4 عطور وربي لما دخل علي بالكيس قلت بس جاب لي هديه وطلع العطر وقام يتعطر ودس الباقي بالدولاب قلت له طيب ما افتكرتني لو بعطر ب 10 ريال قالي العطر اللي تحبيه مخلص قلته له موب شرط كنت اخترت لي اي شي ثاني!!!! (احس الشي هذا حز في نفسي كثير انا ماعمري بخلت عليه بشي) 5- هو يدلعني بالكلام ويراعني بالشغل خاصه اني حامل ولاني عودته من يوم ماحملت اشتغل بالبيت ع قد مجهودي لاني من يوم ماحملت وانا تعبانه(لان حضرته ماخلا احد ماعلمه اني حامل وانا موصيته يسكت عشان الناس ماتعطي خير ولان كل اللي حوله مايعلمون ع زوجاتهم) هو من ناحية الدلع مدلعني ويقولي كلام حلو بس لاطلبته فلوس قلب علي ويقول عني ماااديه.. 6- هو ماعنده بيت ملك مسكني بشقه مفروشه وعند اهله ينوموني بغرفه الجلوس واحيانا يستأجر لي شقه اهله فقراء وبخيلين يموتون ع القرش بعكس اهلي من الطبقة الوسطى وكريمين جدا وربي لما اروح عند اهله حتى اكل مايقدمون لي الا القليل جدا رغم ان مطبخهم مليان ورغم اني اول ما اسلم ع امه اعطيها مبلغ من المال كهدية ومن مالي الخاص فيني..انا احب اهله بالمره واحب اسافر لهم بس هو قالي تقعدين عند اهلك احسن انا ابي اروح عند اهلي ابي اكون فرررري اطلع مع اخوياي وافلها ابي اعيش العزوبية .. 7-فكرت اذ توظفت اتعاون معه ونشتري بيت لنا عن طريق البنك في ديره اهله عشان اعيش مرتاحه بس في ناس نصحوني وقالو لي خلي فلوسك لك مايستاهل تعطيه شي خليه هو اللي يتعب ويسوي لعياله بيت لان بكره راح يفكر يتزوج عليك (((وش تنصحوني انتم به))) 8- لما جت مكرمه الملك قلت له وفرها عشان نشتري للبيبي اغراض واثاث والباقي حطه مع المبلغ اللي عندك بالبنك وانا كررت هالشي 100 مره له وقال لي خلاص ابشري.. ولما جاء الوقت اللي لازم اقضي للبيبي قعد يتناقش بالمبلغ وانه كثير وانه موب مغفل عنده اخوياه ويعرف كم هم يصرفون (على الرغم من اني علمته من اول كم ابي) وانا طلبته 1500 ريال لملابس البيبي وسريره وملابس لي حق النفاس وانا عارفه وربي ماتكفي قال لي لوانا انزل معك وربي ما اخليك تاخذين الا ب 300 ريال انا موب مغفل لاحول ولاقوة الا بالله وبالملعنه واختها اعطاني اياها ورحت عند اهلي عشان اقضي وطلبته زياده 200 ريال مصروف بجيبتي تخيلو قالي لي خذي من 1500 قلت له ماتكفي قالي اذا احتجتي حولت لك رماني عند اهلي وطلع لاهله اسبوع..لما رحت بيت اهلي تعبت وكانو كل يوم يودوني للمستشفى وكله خاص وكنت استحي ان اهلي يدفعون لي اظطريت اخذ من 1500 وعلمته وطلبته يحول لي وبالفعل حول لي(انا استغربت انه حول لي لكن اذ عرف السبب بطل العجب وراح تعرفون بعدين ليش اعطاني) عاد لازلت انا تعبانه وطلبته يجيني يقعد عندي وجاء ع اخر الاسبوع لان اجازته قربت تخلص وقلت له انا زوجتك وحقك تقعد معي(انا بديره اهلي) وتشوف مصالحي موب بس رامني بحلق اهلي هم يودوني ويجيبوني هم بعد عندهم التزاماات واخذ لي شقه وقعدنا يومين هو روح لعمله وانا ظليت عند اهلي بعدين دق علي وقالي انا طالع مع الشباب لبرا المملكة بعد كم اسبوع (على الرغم من اني زمان بعد الملكه قلت له اكره الرجال اللي يسافر بدون زوجته ووعدني وعد شرف انه مايسافر الا وانا معه) يبي يروح مع شباب مره وسخين حقين بنات ووساخه هو كان يحكيلي عن البنات وايش كانو اصحابه يسون معهم وبلاوي زرقا قلته له احنا بحاجه الفلوس اللي راح تلعب فيها هناك انا حتى بيت ماعندي زي زوجات اخوانك وانت بكره بيجيك عيال وانت ماسويت عشانهم اي شي وقلت له ان انت منت مسافر لا علاج ولا دراسه بس سربته اذا عندك شي وفره نسافر سوا بعد ما اولد قالي والله راح اسفرك بس انا ابي امشي استكشف المنطقه مع الشباب وبعدين نروح انا واياك... وانا عارفه انه بيسافر وبعدين يقولي ماعندي فلوس اسفرك...وانا مابيه يتعود على السفر والحرام ..وربي اني موفره له كل شي وربي احيانا اضغط ع نفسي واسافر معه بمقر عمله واظل ببيتي حتى اعفه عن الحرام وحتى ما احسسه اني بعيد عنه باخر المكالمه زعلت وقلت له تبي تروح روح بس لاعاد تدق علي ولاتحاول ترجعني لانك راح تبيعني عشان سفرتك ووناستك وانا جاده بكلامي انا صبرت وتحملته كثير وناويه اقعد عند اهلي الين احل كل اموري معه... بعد ماشفتو قصتي وش تنصحوني فيه ابي مشورتكم بكل الامور اللي ذكرتها لكم ملاحظه:انا جدا احب زوجي وهو بعد مره يحبني وتعب كثير عشان يتزوجني وانا بعد تعبت..بعد ماتزوجته كل جماعتي قعدو يتريقون عليه لانه اقل مني اجتماعيا بس انا ماكان هامني احد الا هو ماعلي من اللي يتكلمون.. وهذه حياتي ولا ابي اخربها بس ابي ابني معه حياة حلوة نبني فيها سوا مستقبلنا ابي اعيش مثل اي زوج و زوجه في بيت سعيد.. |
62 مشاهدة ولم اجد الى الان لو رد واحد
ساعدوني انا بهم مايعلم فيه الا الله |
والله يااختي مشكلتك متعددة .. لكن بنظري أرى إن زوجك من النوع اللي مهمش دور المرأة في الحياة الزوجية يعني الله يعينك عليه ويصبرك واحتسبي الأجر من ربك ..انتي اهم شي حاولي تحلين مشكلة البيت وتحطين الفكرة في رأسة بأي طريقة .. واشتري لك مسجلة واشتري لك سيديات تتكلم عن الحياة الزوجية وشغليه في الغرفة وهو يكون موجود وصدقيني راح يستمع وإن شاء الله يتغير
|
البخل صفة سيئة في الرجل لكن أشعر انك توجهيه زيادة عن اللزوم وبطريقة مباشرة وتنتقديه وهذي طريقة يكرهها الرجل وتخليه يعند أكثر
لا تفتحي عليكي باب انك تصرفي من فلوسك أو تتوظفي حتى تصرفي على البيت ... ما أنصح انك تصرفي من فلوسك مع نوعية رجل مثل زوجك .. لا تتنازلي عن حقك بالمصروف ما دام تشوفي انه بمقدوره وضمن امكانياته .. أتوقع انه لا زال متعود على حياة العزوبية وما فيها من مسؤولية خفيفة وحرية .. بالمستقبل ممكن يتحسن الوضع لكن هذا ما يمنع انك تحاولي تضغطي عليه حتى يتحمل المسؤلية بشكل أفضل .. وسفرته مع أصحاب السوء ما أنصح فيها أبدا .. مو لسبب مادي لكن بسبب المشاكل اللي تحصل من أصحاب السوء |
السلام عليكم
مند مدة وانا احاول ان اعرض ما يتعبني في حياتي الزوجية و بعد قراءتي لقصتك علمت ان هذه الحياة حقا تحتاج منا الى طول البال ومع ذالك اقول لك اختي حاولي مرارا ولا تيْاسي ان سمح لك زوجك بالعمل فلما لا على الاقل تحسني حياتك ويدرك حينها قدرتك على تسيير شؤون بيتك وربما بمساعدتك له يغير و لو القليل من طبعه اعانك الله |
اقتباس:
خرج من مجتمع الحرمه مالها اي رأي او دور بالحياة الا الخلفه وتربية الاطفال ..واذ جت ع البيت مستحيل اذ ظل على هالحاله يعني اذ ظل بس معتمد ع راتبه وهو اصلا كم يبقى منه يعني يبيله 10 سنوات عشان يعملي بيت.. لكن لو وفر وعمل كم مشروع راح يقدر يعمل بيت العمر !!! وفكرة السي دي جدا اعجبتني اشكرك |
اقتباس:
وربي حتى لما اطلبه اي شي اطلبه بدلع موب بالهواش لاني اعرفه عنيد.. بالنسبه للوظيفه كثير نصحوني اخبي فلوس عنه وانا افكر اصرفها ع ابوي وامي هم اولى ومصروفي انا مستحيل اتنازل عنها وانا قلت له هذا حق من حقوقي اللي الشرع وجبها عليه بس هو شايف ان ابوه مايعطي امه ولا ازواج اخواته يعطونهم شي وشايف ان الفلوس اللي اطلبها ماله داعي بس اناماكنت اسكت له كنت اخذ منه حتى لو بعد مشكله.. هو يبي يرجع يعيش عزوبي يقولي ابي اصير فررري بس بدري عليه ما احد قاله يتزوج.. وسفرته انا رافضتها تماما ما ابي اصحابه يخربونه علي.. اشكرك يا الغالي/ـة على ردك ووقوفك عند مشاكلي |
انتي طرحتي مشكلتك وبعدها طرحتي الحل
حلك انك تجلسين عند اهلك هو انسب حل صدقيني الرجال اللي مثله ماينفع معه مسايسه وتفاهم يعني هو بخيييل ويوم جت السفرره ماقال شي والله مدري كيف انتي صابره انا اللحين مثلك حامل وتعبانه وعارفه ان اغراض الحمل والنفاس والتجهيز ماتخلص يعني اللي انصحك فيه خليك قد كلمتك لاتررررجعين له ابد الا لمن تحلون هالسالفه سالفه السفر مع شله وسسسخه وسالفه البخل والشح اللي انتي عايشه فيييه وصدقيني لاشافك معصبه ومعززمه راح يتعدل ولو سكتي راح يضل على ماهو علييييييه بس نصيحه اخيره لادق لاترديين عليه |
السلام عليكم ورحمة الله
أختي الكريمة لا أنصحك بصرف أموالك الخاصة فمسؤولية الانفاق هي من واجباته (قد تأتيك أوقات عصيبة) البخل طبع و الطباع تتغير إذا وجدنا المفتاح عليك الصبر و الصبر و الصبر و الإكثار بنصحه باستحضار تعاليم ديننا عليك تحميله مسؤولية المقتنيات و المشتريات أكتبي له قائمة و اطلبي منه شراءها هناك قول لأحد العلماء راقب أفكارك فإنها ستصبح أفعال راقب أفعالك فإنها ستصبح عادات راقب عاداتك فإنها ستصبح طباع عليك بزرع فكرة المسؤولية و التصرف المسؤول فيه لا تدعي بعض الصفات الغير حسنة في زوجك تجعل صورته سوداء في عينك إياك ثم إياك فكل إنسان له صفات حسنة و أخرى عكس ذلك بالنسبة للسفر فذكريه كل يوم قبل وأثناء سفره بأن الله يراقبه فعليه أن يحسن التصرف ، ذكريه أكثر من مرتين باليوم لاتدعي المشاكل تغلبك وتحطم أسرتك بل اهزميها و حطميها |
اقتباس:
. بالله من جدَك هذا رأي سديد لقوامة بيت ولحل مشكله وخير ياطير سافر زوجها ننصح الزوجه تترك بيتها والله حراااام عليكم تخربين بيتها. . أختي الكريمه بعض الرجال لايحبون النصح من طرف الزوجه ونظرتهم لها غير هذه النظره هو تربى في بيئه مثل هذه حاولي معه بشتى الطرق أما مسألة المستقبل فالمستقبل بيدالله عزوجل(لاتفهميني غلط إنه ما نأخذ بالأسباب لا نأخذ بس هذه عقلية زوجك لازم تتحمليها) عليك بالدعاء والتضرع لله جلَ وعلا في آخر الليل بأن يسخر لك زوجك ويهدي سركم. وشي ثاني أخير لاتكلمي أحد في مشاكلكم سواءاَ أمك أو أي أحد من أهلك أو أهله عالجي مشاكلك بالدعاااااااااااء،،،،،،،،،،،،،،،،،،،،،،،،،، |
| الساعة الآن 09:14 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©