السلام عليكم ورحمة الله وبركاته


مساؤكم رضا وطمأنينة
البعض قد يعرف شيء عن طبيعة المشاكل بيني وبين زوجي
ولكن استبيحكم عذرا بالاستطراد لتنصفوني وتنصفوا زوجي


تزوجنا من سبع سنوات عمري 29 وهو 34 وبيننا طفلة
طيلة السبع سنوات كنا بين وبين ، تمر علينا ايام صعبة وايام تمر بسلام الحمد لله
منشأ مشاكلنا عدة أمور أبرزها:
-عصبيته الشديدة
زوجي ممكن يعصب من كل شيء ولو كان تافه
يعني ممكن يسوي مشكلة على ريموت التلفزيون أو على نور غرفة أو على مفتاح
وهذا معيشني بقلق لا أنسى شيء أو أغفل عن شيء
غير مسألة التأخر يعني لو أتأخر دقيقة او 15د نفس المشكلة والمحاضرة
وهذا الشيء مأثر على البنت صارت تكرهه ولاتسلم عليه الا بالغصب ولاتحب تاكل عنده لأنه ممكن لو خبصت بالأكل كأي طفلة تصير مشكلة
-الحمل
انا حملي صعب ودائما مهدد وكثيرة إجهاضاتي
وزوجي يتمنى أطفال>>ومن حقة
وابوه يشتغل مقارنات مع الناس وعدد أطفالهم
وانا طبعا مابيدي حيلة هذا قدر رب العالمين لنا
-تأثر زوجي السريع بأهله وأصدقاؤه
وهالشيء أثر على حياتنا بشكل كبير
يطلع من البيت مقتنع بقرار يرجع ومعه الاقتراحات
ولما اناقشه بموضوع يقول بشوف ويروح يطرحه على اهله وعلى الشباب ويجيني برأيهم يعني كأني متزوجه اهله
وهو مايعطيني رأيه الشخصي الا بأقل الحالات
-تدخلات أهله بتفاصيل حياتنا
انا عارفة ان كثير أهل يتدخلون بس ممكن الزوج يدخل من هنا ويطلع من هنا وياخذ اللي يناسبه
لكن زوجي لا مباشرة يطبق
مرة جاء زوجي عرض سكن تبع العمل بس مشكلته بطرف الديرة ورفض ابوه بحجة انه بطرف الديرة!!وكان فرصة لتحسين وضعه بس طبعا مشينا رأي ابوه من باب البر وراحت علينا البيت الله يعوض ويآجر
وأمه تقوله عن تربية البنت مو قدامي من وراي بعدها يجي عندي ويهاوش وكأني ماحسن التصرف ويقول امي سوت كذا ليه ماتصيرين مثلها
وآخر التدخلات أبشعها ان ابو زوجي قال لزوجي وبوجودي ليه ماتشتري سيارة قال زوجي حاليا ماعندي قال نبض تطلع لك أقساط!! وصار كل مايشوف زوجي يسأله إذا أنا طلعت له أقساط والا لا..،وهالهموضوع غير زوجي علي خصوصا من الناحية المالية وصار يبخل علي ويسألني كم راتبي وكم رصيدي رغم انه طيلة السنوات الماضية ماألتفت لهالأمور وصار يتهمني اني ماأساعده رغم أي واقفة معاه وقفة بس نساها وقت راح وقتها..
-تدقيق زوجي الشديد
زوجي مدقق درجة أولى وبكل التفاصيل ويبغاها تكون بأعلى المقاييس وبتوقيت دقيق
انا الحمد لله ماشية بهالنقطة بس ساعات أطفش المشي على عقرب الساعة ممل وصعب والضروف مو دائما تجي ع الكيف
مثلا بنتي الصباح عند امي يبيها تطلع بلبس غير اللي دخلت فيه مهما كانت نظافته ومهما كانت ظروف امي والا يمطرني بالتريقات عن اهلي بشيئ مايرضيني
-عدم الاحترام المتبادل
وهذا مقابل حساسيتي متعبني مرة
زوجي يحب يذل اللي يحتاجه ولو كانت امه ويحب يستهزء ويرمي كلام مراهقين
بعكسي محترمته ومقدرته وللأسف مرة رفعت صوتي عليه قال كفو!! تخيلوا طبعا مستحيل اغير من شخصيتي واصير قليلة أدب علشان يحترمني..
-انعدام الحوار
وهذا يضاعف المشاكل، دائما تنتهي المشكلة بشكل مفتوح لا هو عرف انا وش ابي ولا انا عرفت اللي بخاطره ويامسرع ماترجع بعدها المشكلة.
وطبعا لو حاولت افتح معاه الحوار وقت المشكلة بحصل ألفاظ ماأرضاها لنفسي
ولو فتحتها بعدين يقولي جمل ماتنسين ماضي وأنسيه!!!


اليوم صار موقف
كان موعدني امس يوديني اشتري لبنتي جاكيت
أجلها اليوم
من قام العصر وهو يقول مو لازم اليوم وانا ساكتة
المهم قال يالله نروح
وكان عند البنت جرعة مضاد بعطيها اياها قبل لاأروح للمحل
طول الطريق وهو مو لازم وماله داعي وبعدين
وانا قلت له براحتك مو لازم مو لازم
ولما وصلنا بيت اهلي قال اتصلي يفتحون الباب قلت معي مفتاح قال لااه فرحة!!!!!
هالكلمة من جد القشة اللي قصمت ظهري
نزلت بهدوء وقلت ماابي السوق شكرا



الحين انا عند أهلي
أفكر جديا بالانفصال
ياإمساك بمعروف أو تسريح بإحسان
لما استعرضت حياتنا استنتجت اننا مانناسب بعض
هو مو سيء كليا فيه إجابيات طبعا
وانا فيني سلبيات وإيجابيات
بس مو متوافقين بجوانب كثيرة بالحياة
ودائما من مشكلة لمشكلة
اتغاضى واتنازل يزيد
ازعل تصير حياتنا نكد


أنا خايفة من شيء واحد
أني لما أطلب الانفصال ربي يعاقبني
رغم اني مو ناوية أتزوج لأن الرجولة صارت قليلة ويكفي هم
شرايكم