السلام عليكم

اخواني واخواتي موضوعي هو اني طالب جامعي ومتزوج بنت خالتي وانا ساكن في بيت اهلي , والمشكلة

هنا ان البيت كله عيال , انا ترتيبي الثالث و اخواني الكبار موظفين وساكنين لحالهم , واخواني اللي اصغر

مني بعض الاحيان تطلع منهم مضايقات لزوجتي لانهم لا يحبون خالتي ولازوجها ولا حتي عيالها اللي هم

عيال خالتي بسبب مشاكل سابقة . دائمآ اذا تقابنا مع عيال خالتي في مناسبة اخواني اللي اصغر مني

يتهاوشون مع عيال خالتي ويسبون اختهم اللي هي زوجتي , حتى مره كنت جاي من الجامعة ودخلت

البيت ولقيت اخوي اللي بأولى جامعة يهاوش زوجتي وهي طالعة للدرج وتبكي , عاد انا هالمرة

هاوشته وكان اخوي الثاني جالس ويقولي رح امسك لسان زوجتك اول وبعدين تعال هاوش , والمشكلة

بالتحديد هي ان اخواني دخلو الصالة وكانت زوجتي جالسة ولا قالو طريق ولا قالو شي وزوجتي كرة فعل

منها قالت (( اف )) بس واخوي زعل وقال اذا مو عاجبتس النظام ضفي عفشتس واطلعي ..

خلووو هذي السالفة

مرة كان طالعين للبر ويوم وقفنا السيارة جات زوجتي بتطلع القهوة من السيارة وبالغلط كبتها , واخوي الكبير

صاح عليها وقال (( كفحتيها يالرفلة )) يعني كبيتها يالهبلا , وقعدوا اخواني الباقين يضحكون وانا قلت لاخوي

احترم نفسك وخل بيننا احترام , والله لو ابوي مو معنى كان صار علمن ثاني بس الوالد كان يمشى بعيد عنا

يعني لو تضاربت معاه بيشوفنا الوالد وانا ماودي ابوي يدري لانه كبير بالسن واخاف يصيبة شي ولو اني متأكد

لو دري باللي يصير كان مغطهم بالعقال . بس اخوي الكبير اعتذر مني ومن زوجتي وراح جاب لها هدية ولو انه

كانت له مواقف سابقة معها, بس الفترة الاخيرة سار يحترمها .

وباقي اخواني الللي بأول جامعة وبثالث ثانوي يسوون حركات انا ما اقدر امسكها عليهم مثلآ اذا دقو على

البيت وزوجتي ردت يقفلون الخط واذا زارتنا خالتي بالبيت يمرون ولا يسلمون واذا شافوني مع زوجتي

يتكلمون مع بعض كأنهم يحشون فينا وبعدها يضحكون ومضايقات اخري ..

ومره انا كنت مسافر مع الوالد وتركت زوجتي بالبيت وكانت زوجتي و امي واختي واخوي الصغير معهم

يتغدون وقالت زوجتي لاخوي الصغير رح تغد مع اخوانك اللي دايم يتغدون بالمقلط , ويوم راح سألوه اخواني

من قالك تعال هنا قال فلانه اللي هي زوجتي راح اخوي اللي بالثانوي يصارخ من ورا الباب , وزوجتي زعلت

وكلمت اخوانها وجو اخوانها عندنا وطلع لهم اخوي اللي بالجامعة بالرشاش وقال والله لو ماتمشون لافضيه

بروسكم وراحو هم علشان لا تكبر المشاكل.



في النهاية احب اعلمكم ان اخواني طيبين مرة بس المشاكل العائلية السابقة اللتي اثرت عليهم ولو إنا كنا
نلعب مع عيال خالتي ونمزح معهم وفي صور قديمة لنا معهم يوم كنا نطلع ونسافر سوا.
المهم انا والله شخصيتي قوية بس ما اقدر كل شوي اهاوش اخواني , مرة اتغاضى ومرة اخاصم ..

عطوني الحل انا تعبت وزوجتي تعبت بعد ..؟!