السلام عليكم ورحمة الله وبركاته.


من كم يوم كانت طبختنا كشري.


أنا من محبات الكشري حباً جماً .. وما عندي مانع أكله ثلاث أربع أيام ورا بعض.

مثله مثل محشي الملفوف ..... لكن الفرق إني ما أعرف ألفلف الملفوف.




المقادير:

مقاديري هالمرة كثيرة شوي لأني عملت لي ولبيت أمي .. لكن بالعادة أستخدم نصف الكمية.

1. كوبين ونص رز مصري. (أغسله وأنقعه في ماي قبل الطبخ بنص ساعة)
2. كوب عدس بني. (إغسله وأنقعه في ماي قبل الطبخ بنص ساعة)
3. كيس معكرونة.
4. ملعقة ونص صغيرة كمون.
5. أربع مكعبات ماجي (مكعبين للكشري ـ مكعبين للصلصة)
6. أربع أو خمس فصوص ثوم مدقوق.
7. فلفل أسود + فلفل أحمر مجروش.
8. بصل مقطع شرايح. (ما حددت الكمية لأن في ناس تحب البصل كثير وفي ناس تحبه قليل .. فانتوا بكيفكم)



بسم الله نبدأ.


نحط شوي زيت في القدر ونضيف العدس بعد ما نصفيه من ماء النقع .. ونصب مقدار ملائم من الماي + الكمون

وطبعاً القدر لازم يكون كبير شوي عشان يستوعب العدس والرز والمعكرونة بعدين.




بعد ما يغلي الماي نتركه لمدة خمس دقايق لين يبدأ العدس في النضج بعض الشيء.

نضيف مكعبين ماجي ونحركهم لين يذوبون .. وممكن إضافة نصف ملعقة فلفل أسود إذا تحبون .. ثم نضيف الرز المصري بعد ما نصفيه من ماي النقع.




نقلب العدس مع الرز عشان يختلطون .. ثم نضيف مقدار من الماء بحيث نغطي سطح العدس والرز.




نترك القدر على نار عالية حتى يغلي الماي ويبدأ ينشف .. ونكون مجهزين عين النار الصغيرة




بعد ما ينشف ماي العدس والرز ننقل القدر على العين الصغيرة ونحط غطا القدر ونخفض النار .. ونتركه لين ينضج.




في هذه الأثناء ممكن يتم تجهيز المعكرونة.




بعد ما ينضج الرز والعدس نضيف المعكرونة ونخلط كل المكونات مع بعض .. ونغطي القدر ونخليه على نار هادية لبعض الوقت عشان تنسجم المكونات كلها ويحبون بعض.




لتحضير الصلصة .. كنت زمان أستخدم ثلاث أو أربع حبات طماطم .. لكني مؤخراً اكتشفت هذه الطماطم المقشرة المعلبة وجربتها وعجبتني .. فأنتم بالخيار.



عادة أستخدم علبة طماطم وحدة + ملء العلبة ماء + علبة معجون طماطم .. لكني ضاعفت الكمية هالمرة لزيادة العدد.


نضع شوي زيت في قدر مناسب .. وبعد ما يسخن نضيف الثوم




لما يبدأ لون الثوم يتغير نضيف عصير الطماطم (طبعاً الطماطم والماء مخلوطين في الخلاط بروحهم)




ولما تبدأ الطماطم تسخن نضيف حبتين ماجي + معجون الطماطم + فلفل أسود حسب الرغبة .. ونترك الصلصة لين تغلي وتغلظ بعدين نقصر النار ونتركها خمس دقايق تقريباً.




هالخطوة ممكن تتم على مرحلة وحدة للي يبحون الفلفل الحار .. بحيث يضيفون الفلفل الأحمر بدل الفلفل الأسود وهم يحضرون الصلصلة.

لكن لأني أنا وعيالي ما نتحمل الفلفل الأحمر .. وزوجي وأمي وخواته يموتون في الحار .. فأنا أضطر آخذ جزء من الصلصة وأضيف عليها الفلفل الأحمر المجروش.

أنا أحط ملعقتين أو ثلاث من الفلفل وبعد يقولون لي مب حار .. فانتوا عاد حطوا الكمية اللي تناسب طموحاتكم الفلفلية.




الحين وصلنا لمرحلة البصل.




ومراحل تحميره



ولازم أسلي نفسي بشي .. وزوجي ما قصّر وياب لي عصير فراولة.




وبدأ البصل يتحمر شوي




يا مسهّل يا رب.




يالله هانت.




ووصلنا للنهاية بالسلامة






عادة أنتهي عند هذا الحد .. وأخلي البصل منفصل واللي يحب يضيفه في صحنه .. لكني هالمرة حبيت أخلط البصل مع الكشري .. فقمت بأخذ كمية من الكشري وحطيتها في قدر منفصل وأضفت عليها البصل.




وخلطتهم مع بعض.



وأضفت حمص (اختياري وغالباً ما أستخدمه)






وهكذا تم الكشري بحمد الله.

__________________


اللهم طِيبَ الأثر .. وحُسْنَ الرحيل.

تسلم يدك😭😭😋👌اخر حلاوة يا بنت🌹

__________________

تشجيع سريع جداً .. يا فرحتي يا فرحتي.

تسلمين لي يا مسز داني.

__________________


اللهم طِيبَ الأثر .. وحُسْنَ الرحيل.

😍 الله حبيت... تسلم الايادي يا حلوة
على طاري البصل ترى عذاب
حق الكشري انه مشتريه بصل مقلي وجاهز .. عجييييييب

وحق الصلصة جربي ان مع الثوم تحمسين معجون الطماطم لحد ما تطلع ريحته
❤❤❤ تعطي الصلصة لذة


😘 الشكل يشهي .. بالعافية حلوتي

__________________

حاجة الناس إليكم من نعم الله عليكم ، فـ لا تملوا النِعم ☁✨

باجرب اقتراحج المرة الياية بإذن الله.



الله يرضى عليج ويعافيج حبيبتي.

__________________


اللهم طِيبَ الأثر .. وحُسْنَ الرحيل.

ما شاء الله لذاااااااذة أموت في الكشري وأحب أعمل الصوص حامض وحار..الله يسلم الأيادي مهرة🌼🌼🌼

__________________
سبحان الله وبحمده..سبحان الله العظيم

الله يسلم عمرج فديتج.

__________________


اللهم طِيبَ الأثر .. وحُسْنَ الرحيل.

ماشاء الله سلمتي اموت على الكشري وشكله مغري

__________________
اللهم اصلح قلبي وقلب ابنائي

سؤال المسابقة

كم قدر استخدمت شيف مهرة لعمل الكشري ؟!!


إذا جاوبتوا بتعرفون سبب كرهي لإني أصلح كشري
طبعاً أتكلم عن اللي ما عندهن خدامات
بس شغل مهرة عجييييييب

متى بنوصل تقنية نفتح على صفحة الويب لهاويعطونا مع الطريقة طبق للتذوق

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.

حبيبتي يا شوك.

__________________


اللهم طِيبَ الأثر .. وحُسْنَ الرحيل.