السلام عليكم ورحمة الله و بركاته

كل عام وانتو بخير رمضان جاي إن شاءالله يكون خير وبركة عالجميع

باختصار كلنا ستات البيوت بنعاني ونزهق من الطبخ

في الايام العادية انا عن نفسي صارت ازمتي الطبخ بكتئب كل يوم بفكر شو اعمل لبكرة شي بزهق

غير انو نفسي مسدودة و ريحة الاكل بتسد نفسي استغفر الله بس من الحمل

تخيلو بروح اطبخ والله حرام

المهم في رمضان مش ناقصين المزيد من الزهق والتفكير والحيرة

عملت هالشي رمضان الي فات وريحت راسي

وحعملو السنة إن شاء الله

وعفكرة بعملو في الايام العادية احيانا وبريح الراس

في جيبي ورقة و دفتر

وقلم اكيد (حبر او رصاص زي متحبي )سهل الامر يعني شفتو كيف

واكتبو 30 اكلة رئيسية

لكل يوم طبخة طبعا

اما الشوربات انا بعملها غالبا عيومين

مش معقول كل يوم نعمل شوربة

اكتبي مثلا 15 نوع شوربة او خليهم 20 للاحتياط

اما الحلويات انا مابعمل كل يوم في رمضان

للمحاظفة على الصحة و الرشاقة

وعشان مابدي كنت اعود زوجي عالحلويات في رمضان كل يوم يعني تعب كمان والله

رغم انو الله يرضى عليه مابعلق ولا بقول شي

بس قلت مافي داعي حلويات كل يوم و مضر عالصحة والرشاقة

فكتبت انواع عديدة مابتزكر العدد وكنت اختار منها

كل وحدة تكتب حلويات عدد الي بناسبها

انا رمضان هادا حعمل مرتين او تلاتة بالاسبوع كفاية و زيادة

ومرات بنجيب من برة

وفي شي ممكن يضل ليومين لو مهلبية او كيك

والسمبوسك مو كل يوم اعملها دوب مرة بالاسبوع بالكتير اتنين

والله تخريب للصحة كل يوم قلي زيت مش حلو

بنفس الوقت يعني مابحرم حالي او زوجي من الاكل هادا

يعني ماقلنا ماتعملو الحلو او السمبوسك خالص
بس بنفس الوقت مش كل يوم

خير الامور الوسط


هيك ريحت راسي رمضان الي فات

بس كنت اتملل من الطبخ لكن بكل سهولة الاقي الطبخة الحمدلله

اعملو هيك وريحو راسكو

رمضان مش للاكل

بعدين مافي داعي للاسراف

انا بلاحظ بالمنتديات في رمضان الوحدة بتنزل موضوع عن سفرتها الافطار السابق مثلا

بلاقي انو اكل بيكفي العمارة والجيران حرام

الاقي مش عزومة لكن اكل يكفي بلاد

نوعين تلاتة سلطة و سمبوسك و نوعين شوربة و نوعين عصير ونوعين حلويات

ودجاج ومدري ايش وايش
حرام عنجد

انا الوجبة زي كل يوم

لكن احرص يكون في سلطة

تتكون الوجبة الافطار

شوربة+سلطة+طبق رئيسي+رز

حسب الطبخة

وازا ماعندي وقت للسلطة اقطع خضرة في صحن وانسقهم وهيك لسة فايدتها اكتر من السلطة لانو كل متقطعت الخضار كل مبدت الفيتامينات تقل وتروح

لهيك القطع الكبيرة احسن

اقطع جزر وخيار وبندورة واعملهم شكل حلو بالصحن

وممكن عليهم رشة ليمون او ملح او صلصة من هالصلصات تبعت السلطات اعملها بنفسي

لو طبختي ملوخية بكون الافطار

شوربة شعرية مثلا+رز ابيض+ملوخية+قطعتين دجاج لية و لزوجي لو الملوخية بالجاج

ولو باللحمة تبقى اكم قطعة لحمة داخل الملوخية

انا بشوف مش لانو رمضان تكترو لحمة وجاج كل شي بالمعقول

يعني صديقتي مرة عالافطار بقلها شو عاملين

بتقلي فتة و ارانب و فراريج محشية و شوربةوافخاد دجاج

!!!

التركيبة خلت معدتي تتعب كل هادا مرة وحدة طيب ليش؟؟؟مين الي بيتحمل كل هادا

الاعتدال مافي احسن منو

مابنقول خليكي بخيلة وماتعملي شي

لكن خليكي معتدلة

يعني قطعة جاج لكل شخص مش كافية انا عن نفسي اكتر من قطعة معدتي تتعب ومابتحمل الدسم

غير انو كترة اللحوم مضرة

وقلتها كمان مضر

الوسط احسن شي

طبعا السحور ماعليه كلام مااعتقد محتاج طبخ

عادي مربى و جبنة وبيض وخضار وهيك اشياء خفيفة

ومع اني بسمع في عائلات بتعمل اكل عالسحور كتير اكل ماممكن يتاكل الا كوجبة رئيسية

بسمع في ناس بيعملو جاج عادي او رز او حجات من هيك

معقول بالله؟؟؟

بالنهاية رمضان مش لكترة الاكل

وانا صدقوني الواحد بحس باكل لقمتين وبشبع والحمدلله

وبحس بالتقل كمان فصراحة مابعرف كيف في ناس بتعمل ميت صنف وصنف في نفس الوجبة

إن شاء الله اكون افدتكو وكل وحدة تدخل تقلنا عاداتهم في الاكل كيف عالافطار والسحور بكل صراحة

ومافي مانع تغيير العادات الغير صحية لعادات صحية

يلا بدنا المشاركات كلها تحكولي كيف الاصناف وعددها وهيك

بس ماتكونو بتعملو جاج وارانب و حمام بنفس الوجبة .......... لهلأ مش قادرة اسدق انو صحبتي عملو هيك

كل عام وانتو بخير

وسامحوني عالاطالة و عارفين العنوان كان ربات اليوم بدل ربات البيوت بس رجعت عدلتو

نفسي افهم شو دخل ربات اليوم ؟عنجد صار عندي زهايمر في الحمل..... دعواتكم لي بتيسير الولادة وصحة البيبي و صحتي

__________________