زوج مع ايقاف التنفيذ ( مشكلتي + سؤال )
بسم الله الرحمن الرحيم
في البداية انا اول مره اكتب في منتدى او بالاصح انا ما ادخل منتديات كتير بس الصراحة
دا المنتدي شدني وخلاني انضم لي انا كنت بس اتفرج واقراء باسم واحد صاحبي
يمكن ليا اكتر من سنة بس اليوم قررت اسجل واكتب قصتي
ما اطول عليكم ودي قصتي
انا انسان عادي زي زي غير بعد ما توظفت فكرت اتزوج ولما امي اختارت اللي اتزوجها
وكانت بنت مديري في العمل وابوها صاحب ابويا
وبعد اقتناع مني انه دي اللي راح تكون ام اولادي خطبتها ( يعني ملكت عليها )
فترت خطوبتنا كنت مررره فرحان اني راح اتزوج واهلي كمان فرحانين بيا
وكنت طاير بالانسان اللي راح اتزوجها وجالس اساس عش الزوجية
المهم ما ابغا اطول
جاء اليوم اللي اتزوجتها فيه( يعني ليلة الدخلة ) اسواء ليلة في حياتي
دا اليوم اكتشفت انو زوجتي مهي بنت بنوت ( مهي عذراء ) مع انو ماسبق ليها الزواج
انا وقتها مع الصدمة وكمان عشان كنت احبها سكت ماعرفت ايش اقول
خرجت ورحت نمت في الصالة
وهيا نامت في غرفة النوم عادي ولا كان شي صار
تاني يوم بدات اتكلم معاها واسالها ايش اللي صار وليش ماقلتيلي من اول
واسالة كتييييييييير وهيا ما جاوبت ولا على سوال واحد
في الاخير صارت تبكي وقالت خلاص صار اللي صار
وفضلت زوجها وما طلقتها بس كنا عايشين زي الاخوان
انا انام في الصالة وهيا تنام في غرفة النوم
والكلام بيننا كان جدا رسمي غير لما نروح لاهلي ولا اهلها نمثل السعادة والحب
فضلت في ذمتي شهرين وبعد كدا طلقتها لاني مني قادر اسامحها
رغم اني كنت احبها بس والله مني قادر حاولت كتييييييير بس ما قدرت
وطبعا محد يعرف سبب الطلاق لامن اهلي ولا من اهلها سترت عليها واحتسب اجري عند الله
بس طبعا الكل يحسب انو انا لعاب اتزوجت عشان اتسلى و لما طفشت طلقتها
طبعا ابوها ماسكت فصلني من العمل وفضحني وقال عني كلام قال اني عاجز وقال وقال
وبس خلصت شهور العدة اتزوجت ولد عمها وحملت وخلفت وجابت ولد
وتدروا ايش سمت الولد سمته باسمي
تاخيلوا ما ادري ليش يعني بتقهرني ولا تحبني ولا عشان سترت عليها
مع انو دا الشي سببلها مشاكل كتير مع جوزها ومع اهلها كمان
بس ما ادري ليش
ودحين صار ليا سنتين منفصل عنها
واهلي بيقنعوني اتزوج وانا كمان جالس افكر دحين لو ابغا اتزوج في وحدة راح ترضى بيا
ترضي بواحد اتزوج وحدة شهرين وطلقها من غير سبب
لاني حلفت على نفسي اني ما افضحها ولا راح افضحها
وكل ما احد يسال اقول ما صار نصيب بس مافي احد اقتنع باللي اقوله على طول يشك فيا
بس انا ماهمني احد المهم انا راضي
واتمني انكم تساعدوني وتجاوبوني لني ما ليا احد اشكيله
وان شاء الله ما اكون طولت في موضوعي مع اني حاولت اختصر كتير
وشكرا......
اخوكم
عازف الاحزان