برأيكم ماذا أضيف على العربيه ؟؟
 

السلام عليكم ورحمة الله وبركاته

اخواتي العزيزات حابه انكم تعطوني رئيكم بشغله مهمه اذا سمحتو

انا ولله الحمد تم عقد قراني قبل يومين ماشاء الله تبارك الله وكل شيء تمام

بس الي قهرني ان اهل العريس ارسلو عربية الملكة في حفلة الرجال وكانت العربيه فاضيه
مافيها الا شويييييية عودة خشب و جنيهات فضه و صحن شوكلاته ومصحف

بصراحه انا مرررررررررررره زعلت مااعرف ايش يقصدو بالحركه !!

هما قالو حيجيبو طقم دهب ودبل يوم ملكة الحريم

بس الي اعرفه ان الناس يحطو في العربيه مجموعة عطور وعلبة مكياج ودهن عود واشياء كتير مو يرسلو العربيه فاضيه زي ماعملو

والله فشلوني قدام اهلي

قولولي هل هدا وضع طبيعي ؟؟

وكيف ممكن اصلح صورتي قدام اهلي؟؟ لاني متفشله بصراحه وكمان اخاف ياخدو فكرة عن زوجي واهله انهم بخله ومايعرفو الواجب

خاصتاً اني لاحظت اهلي قالبين عليه من بعد يوم الملكة حتى مايبغوه يجي يزورني ولا يطول عندي

بس ماحبو ينكدوني او يقولو شيء عنه قدامي

ففكرت اني قبل ماانقل العربيه لقاعة الحفله الي حنسوي فيها حفلة الحريم ازود في العربيه شوية اضافات
زي مثلا دهن عود و 5 عطور او اي شيء زيادة

يسير اتفق مع زوجي (بطريقه ماتحسسه بالشيء الي حسويه طبعاً) يرسل احد يحط طقم الدهب جوة العربيه قبل مايجو المعازيم بشويه
وبكدا يفكرو اهلي ان اهل العريس هما الي حطو الاضافات (الي انا حجيبها) مع طقم الدهب والدبل


رجاء اعطوني رئيكم بكل صراحه في اقرب وقت لان باقي على ملكتي 3 ايام بس

وايش ممكن احط زيادات في العربيه غير العطور ؟ علما ان العربيه 3 ادوار وهيا فخمه بصراحه , لكن للاسف فاضيه

وجزاكم الله خير

عفواً تم تعديل العنوان ليتناسب مع المضمون..

الف الف الف مبروك عليك ياعروسه :14:



شوفي ياقلبي العربيه اللي اعرفه ماتنحط فيها علبة مكياج يادوب 4 _ 5 عطور او اقل ودهن عود وبخور وشويه اشياء ثانيه

يمكن ماحطوها عشان نسيوها او بيحطوها في ملكة الحريم يكملو باقي النواقص ..


لانو مافي عربيه بددون عطور بس زي ماقلتلك يمكن نسيو او مادمداهم انهم يشترو العطور او انهم يبحطوها في مكلة الحريم ..
واذا ماحطوها في ملكة الحريم .. سوي زي ماقلتي وانتي اتفقي مع خطيبك وكملي الناقص .. بس ان شاء الله ماتنحوجي لدا الشي ..


الله يتمم لك على خير يارب :) ..

اشكرك من كل قلبي على ردك وجزاك الله كل خير

انا بصراحه سئلت زوجي عن الاشياء الي حيجيبوها في ملكة الحريم

وللاسف قال بس الدبل والطقم

يعني مو شغلة نسيو او حتى مامداهم

هو اصلا بالقوه وطلوع الروح وافق يجيبلي عربيه للملكة

يقولي اهلي يقولو عربية الملك سارت دقه قدييييمه وبلدي كيف عروستك تبغى شيء زي كدا !!!!!!

بصراحه فاقعين مرارتي الله يهديهم بس

هل تتوقع لو زودت عليها عطور ودهن عود يكفي ؟؟ او ازيد شيء كمان؟؟

وماحيشكو اهلي كدا؟؟

ياقلبي ترا حتى انا لمن جابولي العربيه بس كانو حاطين فيه عطرين .. صحيح زي ماقالو ترا صارت دقه قديمه بس ايش نسوي ..


خلاص اذا انتي منزعجه من دا الامر وتبغى تصلحي موقفهم قدام اهلك حاولي تتفقي مع خطيبك وتجيبي العطور .. بس اخاف هوا يتضايق وتتغير نظرته في اهلك ... او اهلك يحسوو بشي .. عرفتي كيف ؟؟!!


طيب ليه متسأليه بطريقه غير مباشره .. يعني مثلا تقولي .. العربيه ناقصها شي ؟؟ لو قالك لا .. قولي اها احسب لانه ماني شايفه فيها عطور وغالبا عربيات الملكه تكون فيها عطور ..

يعني زي كدا ..


:)

لا تكبرين السالفه
يعني سعادتج راح تنعكس في العربيه؟

حطي من عندج ما فيها شي

الله يهديك ياحلوه أهتمي بزوجك وطريقة معاملته لك ولا تلتفتي لهذه الامور التافهه
ولاتنسي أن أهل زوجك هم أهلك ولهم الفضل عليك اذا كان زوجك طيب
وأكسبيهم لصفك أحسن لان الرجال يتغيرون بعد الزواج
والله يتمم لك ويسعدك..................

بصراحة مافهمت شو هي عاداتكم في العرس..

يعني عربية وفيها عطور ومدري ايش .....!!!!

أحس فيها تكاليف زيادة عن اللزوم ....

اتمنى لكِ التوفيق

المهم التوفيق ولايهمك الامور -ياما ناس تزوجوا ببساطة وعايشين سعادة ولك في رسول الله قدوة حسنة

وعليكم السلام ورحمه الله وبركاته


الف الف الف مبروك

عزيزتى لازم تتكلمى مع زوجك او خطيبك بصراحه لاكن بأسلوب

بس مو تشترى الاشياء الى المفروض عليهم من عندك وتعوديه من البدايه على الاعتماد عليك

ولاتستعجلى يمكن نسيوها ويمكن لك مفاجأه ويمكن بخلا لازم تذكريه

الله يعين بس لاتزعلى نفسك على عطور ومكايج

انا عربيه ولد زوجى حطيت فيها عطور ومكياج وعبايع وقميص نوم وعوده ومصحف وجنيهات فضه هذا الى اتذكره

وهذا الى المفروض ينحط

صح على قول العام دقه قديمه بس الى الان الناس بتجيب عربيه وبتهتم فى الموضوع

الله يوفقك لكل خير

الله يعطيك العافيه

لك فائق احترامى