|
الحب قطع قلبي وتعبت
تكفون جيبو لي حل يخليني آنساها
شلون أنسى وحده حبيتها وتركتني بدون أسباب فجاه افقدها وكانت تعني لي الدنيا شلون آنساها وأنا لي 3 سنوات من فرقاها ماعرفت ارتاح طول هالفتره كل شيء يذكرني فيها تعبت |
الله يعينك
حاول تشغل وقتك باشياء تفيدك وترا الحياه ما توقف عند احد مهما كان قريب هالشخص ودامها هي اللي تركتك وبدون اسباب خلاص لا تضيع وقتك وعمرك تندب على انسانه ما راعت مشاعرك او يمكن حتى ما حبتك انت معيش نفسك على انك تعبان من دونها وادع ربي يشيل حبها من قلبك ويعوضك باللي تقدرك وتحترمك وتحافظ على حبك ومثل ماقلت اشغل نفسك باي شي اطلع واجلس مع الناس ولا تعطي نفسك فرصه تجلس لوحدك عشان لا تفكر فيها |
يا اخي ,,~
مقدرة حالتك وظروووفك يللي بتمر فيها الآن .. لآ تخلي الشيطان يلعب برااسك وافكارك ويزينلك التعب داخلك .. ترى يللي بتحس فيه كله من وساويس الشيطان .. أحمد ربك انها تركتك وخلاااص عرفت الطريق الحلال من الحرام .. يا أخووويه الطريق دآآآ مو كويس ابد ابد وانت فكر في دراستك ومستقبلك .. وصدقني ربي بيعووووووضك ببنت الحلال يللي تسعدك وتعينك على دينك ودنيآآك .. الله يوفقك ويمحيها من بالك =) ,.~ |
هداك الله اخي
شي بني وكان اساسه حرام تتوقع بيستمر لاياخي الكريم لايبارك الله في حرام وهالعلاقه كانت محرمه اساسا الحمدلله انها انتهت على خير وهي يمكن رجعت لله وتابت نسال الله لها الستر والهدايه وانت اخي عود الى الله وتوب وادعيه ليلا نهارا ان ينزع حبها من قلبك وان يغفر ذنبك ويهديك ويرك الحق حقا ويرزقك اتباعه والباطل باطل ويرزقك اجتنابه اخي هذا الشيطان يوهمك بانك ستموت من فراقهاووو الخ لكي يشغلك عن الحق وعن التوبه والانابه لله وفقك ربي اخي لكل خير |
السلام عليكم ورحمة الله وبركاته
اخوي الغالي وش اخبارك عساك طيب الله يطول عمرك ويسلمك ويخليك اول شي صل على النبي واذكر الله والله ثم والله اني كنت مثلك حب وغرام فجأه خلتني دون ادنى سبب كذا تغيرت ثم دقيت عليها مره وسكرت في وجهي الخط !من بعد سنتين تعبت لي فتره وتفكير وقلق وحزن وكلام فاضي على فكره هذا كله من الشيطان ويوم من الايام كنت جالس مع نفسي افكر واقلب الموضوع في راسي قلت الحين انا يابندر ضايق صدري ومعيش نفسي بنكد ولا اطلع ولا اروح وهي طال عمرها هي الي مخليتني دون سبب وتلقاها بلوقت الي انا فيه ضايق صدري وقلقان جالسه تطالع التلفزيون وتاكل فشار وتضحك وموسعه الصدر ولا درت عني ولا فكرت فيني ولا ضاق صدرها علي ليييييييييييه انا افكر فيها اصلن صدق خل نكون واقعيين مثل حالتك اخوي الغالي لو تفكر ("بعقل") مو تفكر في قلب وعاطفه راح تحصل نفسك غلطااااااان 100% انت قلها لنفسك انا ضايق صدري وعلى قولتك مو قادر تعيش زين طيب هي فكرت فيك جابت خبرك درت عنك طبعا لا صح ولالا ونا اخوك فاليش انت تفكر فيها هي ونا اخوك ماراح تفهمها الا لافكرت بواقعيه وبعقل مو بقلب وعاطفه خلك صريح مع نفسك كل مافكرت فيها او جا على بالك انك حزين حط في بالك كلامي ذا انها مادرت عنك ولا عبرتك لانها طنشتك دون سبب خلك صريح !ليه انت تسوي في نفسك كذا ابد والله ونا اخوك الا اطلع ورح وتعال ووسع الصدر ولا يهمك وان شاء الله راح الله يعوضك بأخير منها لانها هي ماتستاهلك وانت تستاهل البنت الي تصونك وتحبك صدق وان شاء الله بلحلال ونا اخوك الطريق الي انت كنت ماشي فيه انا حرام في حرام وتذكر انها اعراض ناس ولا يرضون وتذكر انك تسوي حرام وتأثم واحمد ربك الي الله فكك منها عشان ان شاء الله يعوضك ربي بلحلال البنت الي تحطك في عيونها اصبر واحتسب عشان ان شاء الله يرزقك الله بلحلال انا ماتكلم من راسي اخوي الغالي انا ماتكلمت كذا الا اني والله ثم والله مريت بلي مريت فيه انت والحمد لله نسييييتها ولا افكر فيها ولا تفكر بحب الا بعد الزواج لانه هو الحب الحقيقي حب شريف تأجر عليه مو كذا بس وحده ماتحل لك اتمنى اني افدتك بشي بسيط واي استفسار انا جاهز ومستعد اتابع معك الين تنسى والله يوفقك وان شاءالله الله يرزقك البنت الزينه الي تحبك وتستاهلك بلحلال بس اهم شي لاتنسى تعزمني على عرسك :) الله يوفقك ورضا عليك وابد تراني في الخدمه بس زي ماقلت لك فكر بعقل مو بقلب وعواطف عشان توزن الامور صح والسلام عليكم ورحمة الله وبركاته |
ما اقدر انساها اشغلت نفسي وحاولت انسا بس اني انساها فتره وبعدين ارجع افكر فيها خلاص ذبحني التفكير وضيقة الصدر
اتذكرها واقول ياليت اقدر اوصل لها احس اني محتاج لها والله من تركتني وانا حالتي حاله حالتي النفسيه تعبانه والله ايام ما انوم الليل ادري انه علاقه حرام بس والله العظيم مو بيدي تعالو شوفو اللي في قلبي وبتغيرون رايكم ابي انساها وماقدرت شلون انساها وانا كنت اعتبرها كل شي لي في حياتي اقولها كل شي ما اخبي عنها لا صغيره ولا كبيره فجأه كذا تتركني وتخليني اصيح عليها مثل الاطفال شلون هي تنساني بهالسهوله وانا ماقدرت انساها عذبت قلبي وقطعته من الحزن والله وجهي صار مظلم واسمر وباهت حسبي الله عليها ما اقدر افكر بعقلي واوقف قلبي لازم ينقز قلبي ويخليني افكر فيها ورب الكعبه اني صرت ادورها حتى في محركات البحث باسمها وايميلها ورقمها اي وحده اسمها مثل اسمها والله العظيم اروح اسألها انتي فلانه اللي كذا وكذا صرت مثل الأهبل |
كم عمرك ؟
بحسب عمرك يكون علاجك |
السلام عليكم
اخي الكريم انت تتوهم الحب وإلا الحب لايبنى على علاقات محرمه فما بني على بطال فهو باطل ، لانلومك في مشاعرك اتجاه شخص ما او في حبك له لكن يكون في حدود الشريعه فلايحق لنا التحادث مع شخص محرم علينا التحادث معه وإن كنا نكن له مشاعر الحب في قلوبنا ، واحمدِ الله كما قال الأخوان والأخوات من قبلي أن خلصك من هذه العلاقه المحرمه وانتبه ان تقع في مثلها مره أخرى ، وكرر اللهم اغنني بحلالك عن حرامك وبفضلك اللهم عن من سِواك ، وادعُ الله تعالى أن يخلصك من التفكير فيها ، فهي وبكل بساطه كما ذكر الإخوات والأخوات قبلي لاتحبك لو كانت تحبك لما تركتك ، ولعلنا نظن فيها الظن الحسن ونقول أنها رجعت لربها وتابت ، وأنت أيضاً تب إلى الله بغض النظر عنها وانساها للأبد فهي لزوجها وأنت لزوجتك بإذن الواحد الأحد إن أعطاكم الله الأعمار لتصلوا لتلك المرحله وفقك الله |
هلا والله بلغالي
شف وانا اخوك عارف وش حاس فيه انت ونا قد مريت فيه في البدايه انا تعبت ومثل كلامك بس ياخي زي ماقلت لك فكر في عقلك ياخي خلك صريح قل هي مادرت عني ليه انا افكر فيها بالله بقولك شي تكفى لاتزعل ماتحس انك سخيف وانت بحالتك هاذي يعني وشو تشحذها انت بتموت ("بسم الله عليك")لو ماكلمتك ترضا لنفسك الذل والمهانه تحتها لا طبعا ياخي قل انا رجال ولا تهمني وحده مثل هذ سخيفه ماتسوى واحد من اضفاري شوف لاتقولي مارضا عليها بقولك ماعلي منك لانها تستاهل زي كذا لانها خلتك والحمد لله انها خلتك عشان في وحده غيرها تستاهلك زوجتك بأذن الله وش فيك ونا اخوك تعوذ من بليس اطلع من الجو الي انت عايش فيه سجل بنادي مثلا سباحه لياقه اطلع مع اصدقائك مثل سجل في تحفيظ اشتغل شغلات بسيطه بزنس ماتاخذ من وقتك الكثير ولا تحتاج راس مال ونا اعرف مشروع يغير جوك اذا انت تبيه قلي برضو ياخي حط في بالك انك قاعد تهين نفسك وتذلها تحت منة وحده زيها احس انها شينه في حقك والله ياخوك فكر في كلامي ذا وشف خللك صريييييييح مع نفسك هي مادرت عنك انت وش تبي فيها طيب اسألني قلي ياخوي يابندر انت كنت مثل حالتي ونا اقولها لك زي ماكتبت لك تو كنت احب سنتين وخلتني وصرت مثلك بعديت قلت ليه اذل نفسي تحت رحمة بنت ماتسوى حسيت فعلا اني ذليل وغبي وسخيف وبلعاميه درج قلت والله انا اكبر من كذا وقلت هي مادرت عني ليه افكر فيها وشوي شوي نسيتها يارب لك الحمد والله اني استفدت وتعلمت شغلات كثيييره عقبها واسف ان كنت شديت عليك بلكلام ولا تزعل تكفى مني بس هذا الواقع ولازم تعرفه و تراي في الخدمه |
بديل حلال...........بديل حلال............بديل حلال...........وانشغل بها ستنسى الاولى |
أخي بارك الله فيك
الله اراد فيك خير لانه ابعدها عنك يريدك ان تتوب وتلجأله وتغير نمط حياتك السابق كنت تفضفض لها كل صغيره وكبيره اجل هنا مربط الفرس لانك كنت تشكو من فراغ عاطفي وهي جات ووجدت مكان شاغر وهنا انت تعلقت لانك وجدت انسان يستمع لك يعطيك مشاعر واحساسيس ويتألم كما تتألم هكذا حياة العشاق وبعد الصحوه يندم الانسان ندم شديد بأن جزء من حياته ضاع وهو في غفله وبعد وتعلق بمخلوق مثله تعلق لايغني ولايسمن من جوع ياخي الصغير الكريم اتجه لله ولرفقه الصالحه تخلص من اي شي يذكرك فيها ادعو لها ان كانت ابتعدت لانها تابت وانابت ان يثبتها الله وان كانت وجدت بديل عنك فادعو لها بالهدايه والستر ولنفسك ايضا طيب لو استمر هذا الحب مانهايته ستتزوجها مثلا مستحيل وان حصل المستحيل تدمرت الحياه وراح ذاك الحب وحل محله الشك والحياه اصبحت جحيما لايطاق وبعد كم شهر هي مطلقه وانت تبحث عن بنت اخرى ليس لها علاقات لكي تتزوجها لانك صغير سيطرت عليك عاطفتك ولانك تركت لشيطان الهواء ليلعب بك الحب بذاته ليس محرم لكن مايجلبه لنا الحب من معاصي هنا الحرام وكيف وجدنا ذاك الحب المحرم نحن بيدينا عن طريق رقم او شات او او الخ من الطرق اسأل الله العفو والعافيه وأساله ان يهديك وينير دربك ويبعد عنك شر شياطين الانس والجأن وبعيد عندي فكره ان كانت لك ام ففرغ شحنات الحب هذه في برها اهديها واقضي حوائجها بحب دون كلل وملل اذهب بها الى مكه والمدينه والله لدعوه منها او ابتسامه خير لك من الدنيا ومافيها موفق اخي |
من كلامك حسيت انك ماتعرف لها طريق
يمكن اخوي تابت من هالعلاقة المحرمة او ماتت ......... انساها وادع لهاا بالثبات او الرحمة ...... وتزوج وعش حالة الحب والهيام مع زوجة المستقبل صدقني هالعلاقات مجرد اوهام تتذكر نفسك بعدين وتضحك على نفسك والله مافيه مثل الحب الحلاللللللللللللللللللللللللللللل فقط |
1- أي شيء يذكرك فيها وتقدر تتخلص منه تخلص منه ... موبايلك اللي كنت تكلمها منه بدله بواحد ثاني ... المكان اللي كنت تكلمها وانت فيه لا تروح له ... المنتدى أو اللعبة أو الغرفة اللي تعرف عليها فيه لا تدخله . 2- كل ما تذكرتها ابدأ تستغفر وتذكر الله الى ان تروح من بالك ... 3- عليك بالاكثار من الصلاة والدعاء ... هذا القلب المجروح خله يكلم رب العالمين عن حرقته ولوعته واطلب من العزيز القادر ان يعينك على النسيان . 4- لا تتكلم عنها مع أحد لأنك لما تتذكر موقف واحد معها بتبدأ تسترجع كل المواقف وكل الذكريات . 5- اخطب بالحلال واذا ما تقدر تخطب اختار لك أحد من أهل بيتك أو أصدقاءك واتخذه موضع أسرارك .. ترجع له تفضتض له وتكلمه حتى تملي الفراغ اللي هي تركته لما كانت تسمع لك وتواسيك . 6- حاول قدر المستطاع تعجل بخطوبة وزواج .. ربي يربط على قلبك بالايمان .. ويوفقك لبنت الحلال اللي تملي قلبك |
:* أسأل الله أن يهديك وينزع حبها من قلبك أخوي أبيك بس تفكر للحظات معي: *ربما هالبنت متزوجة وكانت تخون زوجها معاك هل ترضاها لنفسك..؟!! ربما حست بالذنب وتابت ويمكن عندها أطفال وفكرت فيهم كلها إحتمالات واردة جداً وتخلي أي شاب يتعظ ويخاف ربه وخاصة أنه جالس يلعب بعرض غيره *ربما هي أنخطبت وحبت ترجع لربها وتتوب عن ذنبها هل تريد منها أن تظل على الحرام؟! وتعيش بالوهم وظلال الشيطان بس عشان تبقى متواصلة معك بالحرام..؟! هل ترضى هالمصير الأسود لأختك..؟! وخلنا صريحين مافي شاب يكلم بنت يتزوجها فيما بعد *ربما هالبنت صابها مرض في جسدها خلاها تتذكر ربها ويوم المحشر العظيم فهل تكره لها أن تتوب بدل ماتتحسب عليها أدع الله يهديها ويهديك ؟! *ربما هالبنت أهلها كشفوها وعرفوا عن علاقتها فيك والآن تعيش أسود أيام حياتها وفقدت ثقة أهلها فيها وتتعامل كأنها مو إنسانة فلاتبحث عنها وتزيد معاناتها معاناة وأحمد ربك أنت كان ممكن تكفش معها ويمكن تموت بسبب علاقتك فيها ترى الناس مايرضون على محارمهم وتخيل لاقدر الله صدت أختك تكلم لها شاب؟؟!! بتخليه..؟! وإلا بتشرب من دمه..؟!! أنت ربي نجاك من معصية كان ممكن تدمرك وجالس تبكي قوم وصل لك ركعتين وأشكر الله أنه سترك وسترها راحت بحال سبيلها ومصيرك تنساها المهم أرجع لأحضان مولاك أركع بين إيديه وأطلب عفوه والله يساعدك :* |
ماكنت افكر انها انخطبت او انكشفت افكر بس اني ابيها دايم معي
ياليت السنين ترجع كان مافكرت اتعرف على وحده من بنات الناس ولا حتى اكلمها لان من جد طريق يضيق الصدر وكله هموم الله يستر عليها والحمدلله وان شاء الله بتوب بس كيف اشغل نفسي اخوي اللي قال عندي لك مشروع صغير ياليت تقولي وش هالمشروع ساعدني |
الأخ الكريم توني صغير
مو مرررة نزلت موضوع وعمرك 16 ولاأنا غلطانة؟؟ |
اقتباس:
كل شي ممكن ننسآه .. إلّآ آلحبّ .. آلحبّ هو آلحيآآآة .. مآلك حلّ إلّآ إنّك .. كلّ مآ ذكرتهآ .. توقف عن آلتفكير علطول .. لآ تسمح لنفسك تتمآدى بذكرآهآ .. حتى مآ يحرقك آلحنين .. وآعتبر من نسآك مآت .. ومآ آخر آلحب إلّآ آلفرآق .. { آحبب من شئت .. فَـ إنّك [مُفَــــــــــــــآرقُه] بوكرآ تحبّ غيرهآ .. ويبرى جرحك آلقديم .. وترى منت وحدك مجروح من آلحُبّ { كلّنآ جروح تنزف .. موفق .. وآعمر هآلقلب بطآعة الله يمكن تجبرك .. وهآه .. عن آم كلثوم آخر آلليل .. ههههه !! |
اقتباس:
ههه!! حركآتنآ .. اكتب اسمهآ بقوقل .. واي فََنْ هآلحركة .. وآخر شيء تتعب نفسك ومآ تلآقي لهآ آثر .. :26: هههه !! وسّع صدرك يآ رجل .. آلدنيآ مليآنه بنآت .. :17: آخطب لك وحدة وتملك عليهآ .. وعيش معآهآ آحلى قصة حب .. ترى آلحب رغبة في آلعطآء واللآخذ فقط .. يعني مو شخص يملكهآ ولمآ يروح تروح معآهآ .. لآ .. دآئمآ .. في خيرآت آفضل بآلحيآة .. آهنيك عآلقلب آللي مآ تستآهله حبيبتك .. وآقول : { يآلله عسى فيمآ تكره آلنفس خيرة .. دآم نبضك مرتويآ بآلسكينة .. |
مادري و ش اسوي
احس اني ضايع قلبي مشغول مقدر اتحكم فيه ابد |
تعرفون اللي صدره مثل اللي فيه شي كبير مضايقه
هذي حالتي |
والله إنك فاضي ولا عندك شغل
والحل اشغل نفسك بما ينفعك في دينك ودنياك |
أخـــوي حاول إنك تشغل نفسك بشي يعود لك بالنفع
صدقني مافي أحد عنده حل سحـــري سريـــع..! صدقني بالإرادهـ وقوة العــزم تقدر تغيـــر حياتك للأفضــل أهــم شي ماتتكاسل وتلجأ إلى الله في اليســر لتجده في العســر وبعد سرور تدخله إلى قلب مسلم..مثل العمال اللي بالشارع تعطيهم علبة ماي أو مبلغ يسير بتحس بالسعــادهـ اللي بقلبهم انتقلت لك |
اقتباس:
عفوا على التدخل العارض لكن لي سؤال يقرقع في صدري.. انتو ليش طالما تحبون وحدة و ميتين عليها ما تروحون تخطبونها مباشرة؟؟ و لما تروح في سبيل حالها بعدما يكون صبرها عيي تتحسبون عليها :11: أمركم غريب فعلا :(:( عموما انا رضى ربي عني اهم من مشاعر شخص احبني ثم يتركني انتظره سنوات ليختم المشوار في الاخير بالعبارة الشهيرة أنا آسف ابروح عند يمة تخبطلي البنت اللي تبغاها اللهم اغننا بحلالك عن حرامك و بفضلك عمن سواك..و اهدنا جميعا لما فيه سواء السبيل |
مـن ترك شيئا لله عوضه الله خيــــرا منه ,,,
ومن يتقـي الله يجعل الله له مخرجـا ويرزقه من حيـث لاااايحتسب ,,, اشـتر الاخـــرة ,,وتب ألي الله قبــل أن تخــرج الشمس من مغربها فبعد هذا اليوم لا تنفعك التـوبه ,, |
ماقريت ردود الاخوان
عندي لك حاجة إن شاء الله تنفعك http://www.4shared.com/document/1RlPpfYr/_____.htm اقرأ هذا الكتاب القيم الرائع ستجد ما يملأ فؤادكـ سلوى ورضا وقناعة وطمأنينة وسكينة |
| الساعة الآن 02:46 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©