السلام عليكم ورحمة الله وبركاته


مشكلتي يا اخواتي واخواني اني موظفه وشغل وعملي مستنزف يعني ارجع البيت منهد حيلي واحيانا معنوياتي تحت الصفر ،،، وياتي الاجازة او الويك اند اريد اخذ فترة راحه او نقاهه ، وتاتي زوجة اخي بالويك مع ابنائها وتجلس حوالي لا يقل عن ست ساعات او كثر ، يعني في يوم راحتي تاتي هي ، واخي او زوجها مسافر يرجع فتره بسيطه ثم يرجع يسافر ، يا ناس والله اني احس بضيق وخنقه منها وتنسد نفسي حتى عن الخروج للراحه في اليوم التالي ، صدقوني بدات اكرها لهاذا السبب وعندما اقول لامي لا تتصلين عليها هذا الاسبوع اعتذري تقول لي لا عشان اخوك ما يزعل ، طيب وانا !!! فقررت ان اطنشها يعني مره اقابلها ومره ما اقدر ، لاني بالفعل لا اقدر بسبب احساسي بالخنقه ، تخيلوا صارت اول ما تاتي تمر على غرفتي عشان تتاكد انا وين ، واخر مره كانت الدوره علي وتعبانه على الاخر ونفسيتي زفت ومالي وجهه اطلع واستقبل احد ،،، ما طلعت اتخيلوا تجرات ان تطق باب الغرفه علي.. انا ما رديت عليها ، يععني ما في خصوصيه ، ما تراعي احد احس اهم شي عندها وناستها وانها تثبت لاخي انها زينه معنا وحصل كذا موقف اكتشفت هذا انا ما يهمني الحين ، بس هذا الموضوع مسبب لي ضيق ، اذا كلمت اخي اخاف ياخذ موقف مني ، لانه اخر مره ما طلعت لها كان باين انه مضايق

انا صعبانه علي نفسي لانه طول الويك اند نكد وتعب واي على الويكند الواحد يجدد ، لكن ما يقلى الا الضيق

صدقوني انا ما عندي مانع قدومها نهائيا لكن والله ان الفتره عدد الساعات طويله يضيع علي اليوم

شورا علي

اطلعي سلمي عليها أول ما تجي اثعدي نص ساعه واستأذني بتعب او انشغال وادخلي حجرتك وتمتعي بخصوصيتك .. وبعدها بساعتين او 3 ارجعي اقعدي معاهم ربع ساعة وخلصنا ... هيك بتكوني شفتيها وقت اقل من ساعه وباقي الوقت لك
او اطلعي خرجتك اللي للراحه بدال ما تطلعيها ثاني يوم . وثاني يوم لما هي ما تكون موجودة خليكي بالبيت .

صحيح اراء الاخت تيتا بيتا
وحبيت اقول انك احسنتي بفرض خصوصيتك في غرفتك
وايضا دائما حاولي ان لا ياتي التقصير منك لكي تريحي رأسك من انتقادات قد تأتي من اخليك ومن اجل ارضاء امك في المقام الاول ,, راحة اخيك تدخل في بر امك , ولكن هذا لا يكون على حسابك وراحتك , فحاولي ان تسددي وتقاربي
اجلسي نصف ساعه مثل ماقالت الاخت بيتا ثم استاذني بتعب او للنوم او لاشغال
هذه الطريقه جيده لتسعد امك ولتمنع زوجة اخيك من ان تتجرأ على خصوصيتك
او ان لم تستطيعي ابدا فقط ادخلي الى غرفتك وستمتعي بخصوصيتك بكل بساطه
بدون السماح لاي شخص التعدي على حق من حقوقك انتي بامس الحاجه له ,

بارك الله فيك

__________________
قال ﷺ ( والذي نفس محمد بيده ما تواد اثنان ففُرق بينهما ؛ إلا بذنب يحدثه أحدهما ) .

مشكلة الاخ ان تزوج
هذا الانحياز اللى يجيب المشاكل و تقاطع العوائل
زوجتك حقها عليك و مالها حق على اختك عشان تجى و دق باب غرفتها و بطلعها غصب
تركبها على راسك اوكيه وانتم احرار لكن بتركبها بعد على راس اخوتك مالك حق .

الله يعينك يا ومضة .
اللى تجرات و تطق عليك الباب و تفرض نفسها فرضا
هذى واضح انها من الفارغات اللى تدور المشاكل دواره و عيناتها كثير
و بعد تروح تحرض اخوك و تملا راسه و الاخ المحترم يجى زعلان و شايل بخاطره ^_^

و يقولون عاد طيبة و تعتبر نفسها من اهل البيت ..!!
هذى تعتبر نفسها راعية البيت مو من اهل البيت << انا مادرى هذا مرض فيهن
ان شافت اخت زوجها مشغوله و بحالها الا تجى تتحركش فيها و تشيش العالم على موضوع مايسوى
ايش يعنى انك ماسلمتى عليها براحتك ..
ترى نفس العينات عندى بس الفرق ان لى بيت لحالى ^_^

الحل انك لا تعتبريها موحوده اساسا
ان دقت عليك لا تفتحى لو تنكسر يدها من الدق
اطلعى و هى موجوده و قضى اجازتك وين ماتبغي خليها مع امك و عيالها
لا تحسبي الا حساب نفسك ( لنفسك عليك حق )
اما انك تجلسي نص ساعه وترحعى و كدا هذا القلق بعينه .
بما انها تعتبر نفسها من اهل البيت تجلس لحالها مو شرط تقابلينها ^_^
و ياحبذا تسوى العشاء و القهوه . و تنظف ورى عيالها .

اذا قريت هالمواضيع اسال نفسي اهل زوجي كيف نظرتهم لي
اتمنى انهم ما يتكلمون من ورا ظهري بهالشكل
تراني شايله نفسي منهم شييييييل
ما اشوفهم الا اندر الندرات
عشان بس ما احس اني ثقيلة عليهم

إن شاء الله اجرب مشكوره الغاليه ،،، الحل الثاني ما اظن انه راح يصلح لاني ما اقدر الا مع امي وا اختي المتزوجه على حسب ظروفها .

جزاك الله كل خير على تفهمك ، نعم خاصه اني امي بعد تقلب علي اذا ما طلعت لها يعني يمر الويك اند نكد في نكد يا اما اطلع ويا اما امي تقلب علي واليوم اللي بعده تعاقبني انها ما تطلع معي .

ومن قالك انا مانعتنهم من جدتهم ، كل الحكايه اني مرات ما اطيق اجامل احد ولا اطيق اطلع لاحد لاسبابي الخاصه ، لكن هي جالسه تنتظر كاني شي اجباري او مثل ماقالت الاخ كانه حق ، طيب انا مرات اطلع مرات اشوف انه من حقي اني ما طلع
اما اذا الموضوع يخص الزوجة الاخ فهي تكون لها كل الخصوصيه وما تسمى حواجز