السلام عليكم
راح اكتب مشكلتي بدون اية مقدمات لانه فاض بي الكيل
واعذروني لاني راح اكتبها بالعاميه لانه وضعي لا يسمح لي بانتقاء الكلمات بالفصحى

مشكلتي واللي سببت لي حاله من البكاء الهستيري وخاصة بالامس هيه تفكير امي
انا متزوجه ولله الحمد ولما يتبقى سوا اشهر واكمل السنه باذن الله ,,,, وفي نفس الوقت انا حامل في شهوري الاخيره ,,,,
المشكله دائما تحب تقارن بيني وبين اي احد من بنات معارفنا او تقارن زوجي بازواجهم
يعني تجي تقول فلان سوا عزيمه لاهل فلانه والا فلان سفر فلانه خارج المملكه والا فلانه جبلها زوجها شي معين ,,, صح اني كنت اخذ بخاطري بس كنت اسكت وامشيها
وامس كانت كلمتها اقوى من اي شي كانت تتكلم عن وحده من صديقاتي تزوجت قبل 3 اشهر وتعرف امها وقامت ان صديقتي تحكيها ايش عمل زوج بنتها وانه اخر السهره سلم عليها وحضنها وقالها بنت في عيوني ومن هذا الكلام وبعدها قالت لي مو زي زوجك مالت عليه اذا سلم على راسي تقولي انه مغصوب انا هنا
تنرفزت وقلتلها زوجي يستحي صح انها في مقام امه بس هوه مرررره خجول ,,, وبعدين قلتلها واحد عاش بين اسره مافيها عاطفه حتى اخواته اذا سلموا عليه مصافحه بس كانه غريب عنهم ما تعود انه اخته تبوسه في خده او تحضنه لا تغرب عنهم وجا قلتلها كيف تبغي يكون وضعه وقتها ما تمالكت نفسي ودمعت عيني
قالت لي انا ما اقصد شي ولا كنت ابغاك تزعلي بس اللي مالها حظ في عيالها تتوقع العوض في زوج بنتها
بس للاسف قالت هالكلام وسكتت بغيت اقولها وش تبغين يعني يسويلك بس انا هنا سكت لاني راح اتنرفز والسالفه تكبر على الفاضي ,,, بس اخذت موقف وحسيت بغصه
تدرون زوجي هذا اللي مو عاجبها والله والله اذا تبغى تروح مكان وابويه رفض يوديها يقوم زوجي يقول خلاص انا اوديها عمي تعبان ,,,, اذا قالت خلي زوجك يمر علينا ويطلعنا مجمع تجاري والله ما يقول لا يقوللي امك حرام تلاقيها طفشانه وتبغى تتونس وتغير جو ,,, اذا راحت زواج ومالقيت احد يرجعها البيت تدق عليه ونمر عليها انا وزوجي نرجعها وعلى فكره المسافه بين بيتي وبيتهم 20 كلم ماقال زوجي والله مشوار والله تعب عليه خليها تشوف لها احد ثاني لا بالعكس يوصلها بنفس طيبه ,,,
وهذا كلامها اوقات تقوللي اياه مباشره واوقات على التليفون يعني الا تكرهني بزيارتهم والله امس انها من بعد ماقالت هالكلام وانا ودي زوجي يجي ياخذني وهو المسكين يحسبني مبسوطه خلاني اسهر الين الساعه 1 مع انه عنده يوم الخميس دوام ,,,
ياناس انا مالي علاقه لا بزوج فلانه ولا علانه انا تفكيري اكبر من العزايم اكبر من السفريات اكبر من المظاهر الكذابه ,,,, اهم شي اني عايشه مع رجل يخاف عليه يحبني حب جنوني لدرجة اقول مافي وحده عايشه مثلي لا تعبت نفسيتي يداريني الين اتحسن خصوصا في فترات الحمل ,,, والله لو اطلب اي شي منه ما يقصر اذا كان في حدود امكانياته ,,,
انا الان تفكيري اني اتوظف بعد حملي عشان اقدر اساعده ونشتري عماره منها نخلص نفسنا من الايجار وفي نفس الوقت نسدد القرض من نفس العماره اذا اجرنا الشقق اللي فيها عشان مستقبلا نبدا نعمر بيت يخصنا ,,,, وشويه شويه تتحسن اوضاعنا وبعدها نسافر وين ما نحب ونسوي اللي نفسنا فيه لكن الواحد في البدايه يامن نفسه ومستقبله ,,,, وامي لا همها الاول والاخير تقول انه بنتها سافرت الدوله الفلانيه او عزمتنا في المكان الفلاني ,,,
ياناس والله ما كنت اقصر معاها توظفت في معهد لمدة سنه كنت استلم 2500 شهريا بدون ما تطلبني كنت احط بيدها 1000 عشان ما تحتاج احد او تجلس تشحد اخواني اللي ما نفعوها بشي وبعدها دخلت في جمعيه واستلمت حق الجمعيه 11 الف ايش تتوقعوا عملت فيها والله ما صرفت منها شي على نفسي رحت عملت فيها مجلس حريم لامي لانها من زمان تتمنى احد يتبرع يغيره من اخواني ولا احد سال فيها قمت انا غيرته ولا استفد من الفلوس ولا شي وكنت اقول ما يهم اهم شي اشوفها راضيه ,,,
ومع ذلك شافت اني انا ماسويت ولا شي ,,,
ما ادري امي ايش تبغى ما يكفيها تشوف بنتها مبسوطه مع زوجها دام الاساسيات موجوده الكماليات سواء انوجدت او لا مو سائله فيها ولا تهمني قد ما يهمني اني مرتاحه معى زوجي والحمدلله ,,,
الان انا مقفله جوالي مالي نفس اكلم احد ولا احد يكلمني وزوجي لاحظ هذا الشي اني متغيره حتى دموعي صايره تنزل تلقائيا حتى لو الكلام عادي ,,,
فاخر شي قاللي يالله جهزي اغراضك انتي تعبانه ولازم تغيري جو ,,,
طيب الان اذا انا رجعت ايش اعمل احس اني كرهت بيت اهلي ماليه نفس اروح عشان اسمع مقارنات مالها داعي ,,,
المعذره منكم اطلت عليكم ولكن شي في نفسي كنت كابتته لمدة 8 شهور وامس ما عدت اتحمله
قولولي هل انا غلطانه في شي ؟؟؟ وايش اعمل عشان ارتاح ؟