خجلي .. وحياتي الزوجيه ..
السلام عليكم ورحمة الله وبركاته
تمهلوا واستمعوا لي للاخر .. هذا العنوان ليس الا للجذب .. وللامانة كثيرا مايخطر فبالي شي من هذا القبيل
نبدا بسم الله
انا من عائلة محافظة جدا ومميزة عن كثيير من العوائل بتماسكها وترابطها ومحافظتها على القيم والمبادئ
امي وابويا ياربي يخليهم ليا ويحفظهم .. كانوا اكثر من ام واب
امي .. اروع ام في الدنيا .. .. جافة شويا بس حنونة مرة .. ام وصديقة وناصحة ومربية .. بالرغم من تعليمها البسيط
كانت تقضي اوقات طويلة وهي تحفظنا الاذكار والقران وتشجعنا انا واخواني ونتنافس في ذلك
ابويا .. كان اب شايل مسئوليتو ع اكمل وجه .. تربية وتوجيه حنية
الشي اللي مالمستو في امي وابويا .. بالرغم من حبهم الشديد لبعض هو الكلام الحلو كان ملغي
من قاموس بيتنا .. مع ذلك كانت حياتنا اروع حياة واسرتنا ارووع اسرة
لادش لا فيديو ولا حتى نت .. تخيلو ؟؟
نجتمع نسولف نضحك نمزح .. ممتازين فدراستنا من اصغرنا لاكبرنا .. قولوا ماشاء الله
الاولاد من المسجد للبيت للمدرسة للتحفيظ
والبنات .. وانا منهم .. اخلاق الكل يشهد لها مؤدبات جدا .. خجولات جداجدا .. لبس محتشم وكنا بنجاهد في مجتمعنا المنفتح .. عبي ساترة .. مانعرف شي ابدا عن الموضة للاسف .. بريئات بشكل غبي
والله ماباالغ الخطاب كانو يتوافدواطوابير على بيتنا .. وين مانروح انا واخواتي يثنوا علينا
سمعة بيتنا كانت زي المسك
طولت عليكم بس عشان توضح الصورة
بعد الزواج .. اكتشفت انو هذا الكلام اللي فوق كلو .. مايوكل عيش
ولا الزوج بياخدو بعين الاعتبار
صحيح الشاب لمن يرتبط يقول ابغاها دينة وملتزمة ووو .. بس هذا كلو كلام
المشكلة انو زوجي منفتح جدا .. وتفاجأ بكمية البلاهة اللي فيا اول ماتزوجت
تخيلو تفاصيل ليلة الدخلة ما اعرف عنها شي .. اعرف انو في اتصال .. بسس قبلات احضان مادري اشكلوا هادي ماعرفها ولا سمعت عنها
ولا كنت عارفة اش لازم تعمل الزوجة او تلبس اواواو
زوجي ماكان يصدق انو في بنات زي كذا .. مدري براءة او بلاهة
*اول مشكلة واجهتني .. اللبس .. وااجهت صعوبة في الشخلعة .. ههه اسفة ع الجرأة
مع انو لزوجي وحلالي .. بس اش اعمل شي انغرس فنفسي .. اتضايق من نفسي لمن اشوف شكلي
اغلب اجزاء جسمي ظاهرة مااصدق يطلع زوجي لعملو .. عشان اروح استتر << شفتو تعقيد اكثر من كذا
المشكلة
ثاني مشكلة .. واتمنى من قلبي القى ليها حل
الكلام الحلو صعععب صعععب عليا
مع اني اعشق زوجي .. ولمن يغيب اشتاق لو .. بس عندي مشكلة
ما اعبر بسهولة .. ما اعرف غير كلمة ياعمري .. مع التعود صارت مملة
احيانا يكلمني بالتلفون .. يبغى يسمع مني كلمة حلوة .. وانا بداخلي متلهفة ومشتاقة لو
ويمكن مافي وحدة تحب زوجها زيي .. بس ما اقدر اتكلم
لمن اقفل انقهر من نفسي ليه ماقدر اعبر عن اللي بداخلي
ثالث مشكلة ..
اللي مسوية لي ازمة نفسية
الرقص .. من بداية زوجي يقولي ارقصي لي
وانا عمري مارقصت
اقولو ياراجل انا عمري ماسمعت اغنية .. كيف ارقص
في البداية كان يمشي بس صار يلح
ويعايرني انو النساء من الجنسية الفلانية .. بيرقصوا ويسوو ويفعلوا
وهادا الشي جنني
كنت بادية احفظ قران وقتها .. ركنت المصحف وفتحت النت ادور مقاطع رقص
عشان اتعلم لزوجي لانو مايجتمع حب القران وحب الغناء في قلب مؤمن << اقولها وانا حزينة
اشياء كثيرة اتعب اقولها .. لبسي للعباية تغير .. لازللت محتشمة بس اضفت بعض الرتوش حتى ما اكون دقة قديمة قدامو
هو يحب الافلام ويتمنى اجلس معاه .. كنت ارفض بعدين تنازلت .. وانا ما احبها وما اطيقها
يبغاني اروح لزوجات اصحابو المنفتحات جدا جدا .. وانا اتهرب
افتقد حركات الزوجات الشاطرات اللهلوبات والدلع والدهاء
حركات الستات والموضة والبديكير والمنيكير والتقليعات كمان ماعرفها ,, الا شي بسيط
مهتمة بنفسي نظيفة ومرتبة بس والحمدلله اللي حسن خلقتي من عندو ..
وماعندي الا طيبة قلب ونية صافية.. واخدم امو واهلو خدمة عبيد
عمري ماكلفتو فوق طاقتو
باختصار وقد مابذل جهود عشان اقرب المسافة بيني وبينو
احس اني مقصرة معاه
عشان كذا في موضوعي الاول
قلت لكم انا ماعندي ثقة فنفسي
وانو انا مو قد المنافسة مع غيري
واحس اني ظلمتوا من حقو يكون عندو زوجة ترقص تلبس تدلع خاصة انو بيشوف بلاوي برا
وطاح فوحدة بقراطيسها وماتبغى تفكها كمانا هههه
اسفة جدا طولت عليكم
وشاكرة لكل من يعطيني راي او نصيحة اوحتى تهزيئة