السلام عليكم ورحمة الله وبركاته
لجأت اليكم بعد الله سبحانه لاني على وشك الانهيار النفسي
انا متزوجه بالثلاثينات عندي اولاد لي 15 سنه متزوجه عانيت في حياتي كثير وطفولتي كانت عذاب كلها ظلم ومعاناة وحاجه واثر هذا على نفسيتي كثير وتزوجت وعانيت اكثر مع زوجي هو طيب ومحترم لكن بيننا اختلافات بالشخصيه وتعذبنا كثير بالظروف السيئه والفقر وكنت طول السنوات الماضيه مثال للزوجه العاقله الصابره العفيفه طول عمري محترمه وصابره ومراعيه ظروف زوجي لأبعد حد وهو يشوفني ملاك ونعمه من رب العالمين اخلاقي الكل يشهد فيها ومحبوبه من الجميع والحمد لله على نعمه وكنت فعلا اشوف نفسي مثاليه ولا يمكن اخطي او اتجاوز حدودي لكن الي صار لي دمر كل شي ،،،، يمكن يكون ابتلاء من رب العالمين واختبار لي لاني الوم العاصين على ذنوبهم واشوف نفسي منزهه ،،، كنت الوم المتزوجه الي تسمح لنفسها تكلم رجل غريب وتتمادى معه واعتبرهم عاصيات غافلات واشوف نفسي منزهه عن المعصيه هذي لكن فجأه لقيت نفسي وقعت فيها ،،، مادري كيف ؟ مادري وين راح عفافي وحشمتي وحيائي عقلي من التفكير بينفجر ،،،
الي صار تواصل معي شخص بالواتس وكان غلطان بالبدايه ظنيت انه وحده من قريباتي مسويه مقلب معي وبعدين اكتشفت انه رجل غريب قلت له انه غلطان واعتذر لكن الموضوع ماوقف على كذا لاني بالبدايه كنت امزح معه على اعتبار انه وحده اعرفها تواصل معي باليوم الثاني وكان يمزح ويعلق علي وتساهلت بالكلام معه كنت امر بحالة اكتئاب فظيعه وابغى اي شي ينسيني مشاكلي ونفسيتي التعبانه زوجي رافض اتعالج عند طبيبه نفسيه لان معي اكتئاب وتوتر معي من الطفوله ورافض اني اتوظف واشغل نفسي وهو مايحب الحوار ولا النقاش اقضي يومي حبيسة البيت والفراغ وادري هذا مو عذر لكن خطأي تساهلت بالموضوع اعتبرتها مجرد دردشه بالواتس وخلاص لكني نسيت حكمة رب العالمين لما حرم علينا التهاون مع الرجال بالكلام فعلا كان الشيطان ثالثنا وبدأت خطوات الشيطان كل الي بيننا مجرد مراسله بالواتس ومكالمات وكل مره اذا سكرت الجوال ابكي ندم وحسره والوم نفسي واتسائل انا ايش اسوي واقرر اعمل له حظر وانسى الموضوع لكن اضعف باليوم الثاني لما اشوف عدد مكالماته بالسجل واشيل الحظر ويرجع يتواصل معي ونسولف وللاسف تجاوزنا حدودنا بالحوار كثير ومناقشاتنا ماكانت بريئه وخجلانه من نفسي وانا اقول هالكلام الحين مر على تعارفنا شهر ونص بس وهو تجاوز حدوده كثير ويبغانا نستمر ويبغى يقابلني ويعرفني اكثر ويقول انتي السبب لانك علقتيني فيك بأسلوبك وماراح اسامحك لو تركتيني لكني قلت له اني ندمانه ولازم نوقف ومانتمادى اكثر وهالمره انا عازمه اني اوقف مهما سويت واخر مكالمه سويت حظر له وقررت مااضعف مهما حصل
انا تايبه وندمانه واطلب من ربي يغفر لي على الذنب الي سويته خايفه من ربي يعاقبني على هالمعصيه والخيانه صرت احتقر نفسي واحس اني انسانه حقيره الحزن والالم يقطعني احس اني في كابوس صرت مثل المجنونه اتسائل انا وشلون كلمت رجل غريب وراسلته وتماديت معه بالكلام الحرام كيف سمحت له يسحبني معه للمستنقع القذر بالكلام ؟
اتأمل زوجي واتمنى اموت من شدة الندم والحسره اني غافلته وكلمت رجل غريب من وراه نفسي ابوس رجلينه واطلب منه يسامحني ومستعده اظل خدامه عنده طول العمر علشان اكفر عن خطأي ،،،،،،يااااالله قد ايش تأنيب الضمير متعب والاشد هو اني صرت انظر لنفسي بدونيه واحتقار بعدما كنت فخوره بأخلاقي ورزانتي وعفتي لدرجه الحين افكر اعترف لزوجي علشان ارتاح من عذاب تأنيب الضمير يمكن يطلقني يمكن حياتي تتدمر يمكن من الصدمه يقتلني لكن ماني قادره اتحمل عذاب الندم والحسره افضل اني اموت على اني اعيش مع هالاحساس احس هالمعصيه بتكون شؤم بحياتي ويلاحقني ذنبها طول العمر ،،،سبحان الله وشلون انقلبت حالي في فتره بسيطه ماوصلت للشهرين بعدما كنت مثال للانسانه المحترمه الطيبه الخلوقه المسالمه الي تخاف الله وتراعي الكل صرت انسانه واطيه تكلم رجل غريب بكل سهوله والله العظيم زوجي دايما يقول انتي مافيه مثلك بالطيبه والاخلاق والصبر مثال للزوجه المثاليه قايمه في بيتك وعيالك وصبرتي علي كثير وادري انك متحمله كثير
ماااحب ازعله ولا عمري خبيت شي عنه صريحه معه واستأذنه بكل شي حتى لما اكون عند اهلي استأذنه بكل حاجه واحيانا يطلعون اخواتي لمكان عادي سوق ولا مول ولا مطعم وكان يمنعني واحرم نفسي من الطلعه علشان خاطره بالرغم من اني كنت اقدر اروح معهم ولا يدري لانه متشدد شوي ،،، انا عازمه اني مااضعف نهائي باذن الله وتوبتي صادقه وخوفي من عقاب رب العالمين اكبر من اي شي لكني تايهه وخايفه مادري ايش اقول احس بالم بقلبي وضعف وخوف وندم قطعني يارب تلطف بحالي ابغى اي كلام يريحني اعترف لزوجي بذنبي ولا ايش اسوي بالرغم من اني اعرف ان زوجي ماراح يسامحني لانه متشدد كثير ويمكن نهايتي على يده
كلامي ملخبط بس اعذروني لاني اكتب الكلام وانا ابكي

بإختصار لما تقرري تقطعي العلاقة لاتقولي له
اقطعيها و بس ..
و لا يهمك كلامه إنه ماراح يسامحك وغيره من الكلام اللي يخدرك فيه و يخليكِ تستمري معاه
اعرفي إنه بيكلم 20 غيرك و كلهم يقولهم نفس الكلام
و لا متعلق فيكِ و لا شي , هو مجرد واحد ذكر يحب يتكلم مع الجنس الآخر مين ماكانت سواء إنتِ ولا غيرك .. مافرقت معاه .

مرحباً أختي

المهم أنك أنتِ الآن تائبة ونادمة وسينتهي الأمر بإذن الله

ولكن الأهم أن تسألي نفسك أولاً سؤال واضح

هل أنتِ صادقة في ندمك وألمك وتأنيب ضميرك ام لا ..؟؟

فإن إستمريتي فعلاً في البعد عن الرجل وعودتي كما كنتِ .. فأنتِ إن شاء الله صادقة ولعل حالة الندم وعصرة القلب والتوبة والبكاء كفارة لكِ وسيعفو عنك الله بكرمه

أما لو ضعفتِ وعودتي للرجل تحت أي مبرر فأنتِ كاذبة مع نفسك .. ومجرد حالة تأنيب الضمير مؤقتة وتزول بعودة الرجل لكِ إذا عدتِ له .

لذلك .. أنتِ من يستطيع إنهاء هذه المعاناة

اما زوجك فلا تخبريه أبداً تحت أي ظرف .. ونسأل الله لك الرحمة والمغفرة من الله


أعانك الله

اقطعيها فورا ...ولا تفكرين ابدا
مع الايام والوقت بتنسين
واخلصي التوبه لله وربي بيساعدك ان شاءالله

سبب اخر لعدم الزواج ومراقبة جوال الزوجة في حال الزواج 15 سنة متزوجة. واهم شي انك ذكرتي انه هو السبب في بدايتك

الله المستعان

شكرا على الرد ومعك حق

مشكور على الرد
كلامك اوقفني وهزني في اعماقي وقريته اكثر من مره واثر في كثير وان شاء الله ندمي حقيقي وتوبتي صادقه راجعت نفسي وعرفت خطأي ويمكن يكون درس لي علشان اقوي صلتي بربي لان لو كان ايماني قوي وراسخ ماوقعت بالخطأ هذا هو درس سيظل معي طول العمر

مشكوره اختي
كل الي اتمناه ربي يعفو عني ويغفر لي وانسى واسامح نفسي اتساءل هل اقدر اغفر لنفسي الذنب هذا واعيش بصفاء وراحة بال

مشكور على الرد حتى لو كان قاسي وماني مستغربه لاني متابعه للمنتدى ولاحظت طريقة ردودك وماألومك لاني كنت مثلك اشوف نفسي مثاليه وكامله ولا يمكن اخطي مثل غيري واتمنى تاخذ العبره مني ولا تسخر من ذنوب غيرك اذا كنت انسان تشوف نفسك منزه عن المعاصي

انهي علاقتك به ،انقذي نفسك قبل فوات الاوان

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم