مش عارفة اقرر ومش عايزة أظلمه المستجدات بالرد 23
أولا انا جديدة في المنتدى؛فالسلام عليكم ورحمة الله وبركاته
أنا عايزة أحكيلكم مشكلة عندي ومش عارفة اقرر فيها ومحتاجة مساعدتكم خاصة بعد ماشفت نصائحكم لمرهفة الإحساس نصايح جامدة بجد.
1)أنا عندي 20 سنة اتخطبت في يومين بالظبط بعدها بيومين خطيبي صرحلي انه بيحب واحدة تانية وعرفت انه عمل المستحيل علشان اهلها يوافقوا بس موفقوش هيا عندها 17 سنة وهوا 26؛وقالي إني دوري إني أخليه ينساها بس أنا قلتله إني أول مرة أكلم شاب ومتوترة يعني لازم نساعد بعض مينفعش يطلب مني أساعده لأن أنا كمان محتاجة مساعدته مش عارفاه وكمان مش بحبه يعني لسه؛
أنا تعاملت مع الموضوع ب3 طرق:عقلانية حيادية؛عاطفية إتعاطفت معاه ومعاها بصراحة؛غيرة بسيطة.
2)تاني حاجه بعد القصة دي على طول انه اتفق معايا اني مشربش نسكافيه ولا شاي مع اني مش عندي أنامية ولا مدمنة للحاجات دي اصلا بس حاسس اني شكلي مرهق فهمته ده بس قبلت الاتفاق بس هوا كان غريب فيه اوي لدرجة اني اضطريت مرة اشرب نسكافيه علشان مسافرة قالي اني كان لازم اتصل بيه وأسأله الأول حتى لما جبتله هدية بمناسبة العيد فضل وهوا بيفتحها يلومني اني شربت نسكافيه وخلفت الاتفااااق!
3)بعدين اتفق معايا اننا نصوم ال6 شوال مع بعض اتنين وخميس ولما عرف بالصدفة اني صمت يوم الاربع عمل خناقه وضغطني بكلامه وقال ان الاتفاقات مهمة عنده بس انا بنت يعني لازم هصوم أيام زيادة المهم ان هيا كانت مشكلة حقيقية.
4)هوا في حاجه حلوة انه مش بيحب يسبني زعلانة أبدا ومش بيسبني أنام إلا لما يراضيني بس ده لما يعجبه طريقة زعلي.
5) هوا مش بيسمعني ابدا يعني أقصد مش بيفهمني كده حتى لما أعاتبه بطريقة راقية مش بيفهما أبدا وكذا مرة أقوله على حاجات بتضايقني بس بيصر عليها مثل أنه بيحكم عليا من خلال مواقف صغيرة مثل المواقف اللي حكيتها فوق(النسكافيه والصيام)وبيقول فيني صفات مش فيا خالص مع اني واضحة جدا اي حد بيعرف شخصيتي بسهولة؛بس هوا أبدا مش شايفني,
أخييييييييييييرا علشان مطولش عليكوا أنا عاتبته في كل ده وقلتله إني مش هعرف أكمل معاه كده وإنه لازم يفكر كويس ويلاقي حل ولازم يفكر فيا شوية ويسيب العلاقة تمشي بطبيعية وكمان إني حاسه أنه مش شايف في العلاقة دي غير نفسه يعني أنا مش موجودة أبدا.
رده:تركني يومين من غير رد وفي الآخر بعت لي رسالة يعاتبني فيها على أسلوب عتابي وطلب إني أعتذر عنه وأوعده إني مش هكرره تاني وأنه مش هيفكر في حل غير لما أعمل كده.
أنا أسلوبي كان هادي لدرجة انه معرفش يقول عليا ولا غلط في الكلام؛فأنا معتذرتش؛ورجع بعدها بيومين بعت رسالة كان ذكي جدا فيها قلب كل الغلط عليا أنا وكل اللي عاتبته فيه قلبه عليا أنا كأني أنا اللي غلطانة وهوا معملش ولا حاجه خالص.
مع العلم ان إحنا بقالنا شهر واحد بس مخطوبين بس هوا مستعجل على كل حاجه وده خلاه يبين صفات كتير فيه لأنه واضح جدا ومش بيخبي حاجه بس مش بيعطي ليا فرصة ودايما ضاغطني وعايز كلامه يمشي وفوق كده لسه مخاصمني إلى الآن وآخر رده أنه مش هيفكر في حل لأني معتذرتش عن عتابي.
مش عارفة أكمل معاه ولا لأ ...
كل اللي حواليا تحليلهم لشخصيته أنه متسلط ومتكبر وان حياتنا مش هيكون فيها وسط أبدا هتكون يا إما زوابع يا إما حب.
أنا بسأل مش تسرع مني بس هوا باين أوي وأنا خايفة لو كملت وبان حاجات تانية كمان أكون حبيته وبعدين الإشارات باينه بس مش عارفة أعمل ايه هل لو سيبته أكون ظلمته وظلمت نفسي.
13-09-2012, 02:43 AM
ضوابط المشاركة
العرض العادي
