السلام عليكم و رحمة الله وبركاته،

بصراحة احترت وش اسمي الموضوع
حصل معي موقف قبل ثلاث أيام وكان له أثر سيء على نفسي.

انا ذكرت لكم مشكلتي بموضوع "زوجي والدراسة" واننا منفصلين من سنتين بدون طلاق ( أنا عند أهلي). ومازلت على نفس الوضع

زوجي تزوج من ثمان أشهر تقريباً ، وخلال هذه الفترة يجي مرة بالشهر ياخذ بنته يطلعها أي مكان تلعب ويرجعها وماعندي مشكلة بالموضوع حتى لو يجي كل اسبوع او كل يوم ياخذها ويرجعها.
المشكلة انه قبل ثلاث ايام اخذ بنتي عند زوجته الثانية ولأول مرة، اول مادخلت بنتي البيت بعد مارجعها قالت ماما بابا متزوج فلانه اسمها كذا وطيبه حبتني (انا قلت قبل لها مره وحده انه تزوج بكت وانهارت وسكرت الموضوع وبلغت أهلي محد يفتح معها الموضوع نهائيا)
ضايقني موضوع انه اخذها عند زوجته لكن ماقلت له شيء، يمكن تشوفون ان الموضوع عادي ومن حقه، بس انصدمت حتى انا من نفسي كيف الموضوع أثر علي نفسياً.
كيف أوصل له إني ماأبغى ياخذ بنتي عندها بدون مشاكل؟
و جزاكم الله خير

__________________

قد تكون خطوة جيدة كما ذكرت
وأيضاً قد أكون خاسرة.
لكن أنا أخاف ان الموضوع بالتدريج، ياخذها مرة مرتين بعدها مايرجعها،
هو شخصيته انتقاميه يحب ينتقم لنفسه حتى لو تعرض لموقف من اخوانه او اصدقاءه مايرتاح الى ان ينتقم لنفسه.
يمكن يحسب اني ساكته عنه في كثير من الأمور اني بسكت اذا سواها واخذها.
مهما كان بنتي تحتاجني في أمور كثير زوجة الأب وان كانت حبيبه معها في البداية ماراح تهتم فيها مثلي.

السلام عليك اختي
انا ارى ان ردت فعلك طبيعية من حيث انك وجدتي في نفسك شئ
اولا تخافين يتدرج فياخذ البنت وانت ادرى بعقلية زوجك
ثانيا ممكن تحركت فيك الغيرة فابنتك لم تكن ردت فعلها سلبية عندما رات زوجة ابيها وممكن كنت تتوقعين العكس و ممكن متخيلة ان زوجك عايش احسن عيشة من تعامل زوجته الثانية مع بنتك وقبولها انها تجي عندها فممكن تحرك فيك عدة امور
فحاولي تضغطي على نفسك شوي ولا تبيني له انك زعلتي او مانك قابلة الموضوع فطبيعي بنتك تتعرف على زوجة ابوها و اخوتها ولا تكوني ابدا الطرف المفرق بينهم واخلصي النية و لتكن اهدافك سامية لن يضيعك الله
حاولي تسقطي الموضوع عليك فلو تزوجتي هل تتوقعين ان ابنتك لا يجب ان تقابل زوجك بالعكس يجب ان يتعرفوا و تنموا بينهم علاقة طيبة فهم عائلة فلنحاول محو فكرة ان زوجة الاب و ابناءها هم زوجة اب سندريلا و بناتها

بالنسبة لزوجته أنا ما أعرفها ولا أعرف نواياها ويمكن ماتصدقين لو أقولك والله إني ما أكرهها.
لكن تصرفات أبوها انه اخذها وجايب لها هدايا كأنها من زوجته ويقول للبنت امك الزوجة الشريرة وانا عندي زوجة طيبة. صارت تردد الكلام هذا كثير ليش يتكلم مع البنت بالطريقة هذه، وهي تسمع كلامه وتحبه حيل لانها اي شي تطلبه يجيبه لها.
الكلام هذا كله يوحي بشيء واحد انه يتدرج بالموضوع معها.

ماعندي نية مشاكل معه لذلك كنت ابحث عن طريقة او اسلوب اكلمه فيه انه ماله داعي ياخذ البنت لزوجته،

شي طبيعي انك تحسي بشيء في نفسك لان كأن وحدة اخذت مكانك في قلب بنتك، و عادي ان علاقاتها تكون طيبة مع زوجة الأب مثل ما قالت الأخت مريم، لكن هل أنتِ متاكدة 100‎%‎ ان زوجك يعلم بنتك هذي الأمور؟
لكن مرة وحدة بالشهر تتوقعي يكون لها تأثير على بنتك؟
ممكن تحتجي بان عايزة تروحي مشوار وتاخذي بنتك معاك علشان ما يطول كثير، أو انك تقولي لبنتك انك راح تعملوا حاجة حلوة هي تحبها بعد ما ترجع من المشوار مع ابوها ممكن هذا ينفع؟

طبيعي شعورك اختي
كل ام تحب تكون رقم واحد في قلوب اولادها

لكن ما تقولين له شئ ولا تبينين انزعاجك
بما انه شخصيته انتقامية لانه سيفعل العكس
واطمنك ما في الي تحب تربي اولاد غيرها خاصة اذا جابت اولاد وما احد يقدر ياخذ بنتك منك
ولا احد يعوضك عند بنتك هي صغيرة وتاثرت بالجديد والهدايا ومصيرها تعرف مصلحتها انها مع امها

اي والله هذا اللي كسر قلبي انها بنتي تقول هي طيبة وانا شريرة بس من اول جلسة معها، بالرغم اني مو قاسيه عليها.
بنتي سنتين معي ماقد فكرت مجرد تفكير اني اخليها تكره ابوها او اجيب طاريه بسوء قدامها كله خوف ان نفسيتها تتأثر ، وهذا يجي من مرة وحده يقول لها كلام زي كذا.
متأكدة انه هو اللي قال لها كذا اعرف بنتي من نظرات عيونها اذا سالفتها صدق او تخيلات منها.
قررت اني ما ارسل له شيء فعلا فكرت بكلامك ممكن يزودها علي وانا ما اتحمل اكثر من كذا

الله يسعدك فهمتي احساسي والله.

أبداً خلاص ماراح اكلمه وبحاول اخلي بنتي تنسى كلامه، الله يعين تأثيره قوي عليها مهما يغيب تشتاق له اكثر.

البنت مدارها ترجع لامها وان كانت تشتاق لابيها بسبب بعده عنها لكن لن تبدلك بيه ابدا لو تبقى معه يوم يومين ثلاث بالاكثر ولن تصبر عليك هذه الفترة فهذا الشوق فقط الذي يجعلها تسمع له و تتاثر بما يقول والا لا احد في الدنيا ياخذ مكان الام انت عليك بناء علاقة طيبة مع البنوتة
ولا تخافي لا احد ياخذ مكانك لا ابوها ولا زوجته وكما قالت وفاء مافي وحدة تحب تربي بنت غيرها
ولا تبيني ابدا انزعاجك لا للاب ولا لبنتك وخليها تتكلم على راحتها لتعلمي ايش يحدث معها