راح أدخل بالموضوع على طول وأتمنى ألاقي حل
أنا عمري 28 ومتزوجه من سبع سنوات مشكلتي مع زوجي الغيره الشديده ليست عاديه بل شيء لايطاق لدرجة أحس أنه خانقني وكاتم على نفسي الغيره حلوه بل مطلوبه بس مازاد عن الحد إنقلب للضد طفشت وزهقت لدرجة جاني إكتئاب وكرهته كره شديد ماأقدر أرفع عيني بوجهه أنا داريه إنه يحبني حب شديد ومتعلق فيني ومايصبر على زعلي ودايم معي بالبيت بس الغيره غطت كل محاسنه ممكن تقولون الحين إن أنا أبالغ لكن راح أقول لكم مواقف وهي غيض من فيض وأنتوا أحكموا ودلوني على حل بالصيف كان زواج بنت خالتي واحنا ساكنين عند أهله دق علي تلفون وقال تجهزي أمرك بعد شوي ولبست وخلصت دخل علي الغرفه وقام يكلمني كلام حلو ويتغزل فيني وشوي إلا وهو معصب وزعلان علشان الفستان يقول ليش إيدين الفستان بدون أكمام مع إنه هو اللي شاري معي الفستان وقام يتكلم كلام يزعل قال لي إن أنا قليلة أدب ومحتاجه تربيه وراح يربيني والمصيبه إن أهله يسمعون لأن البيت صغير وقامت أمه تواسيني وتقول لي أصبري قلبه طيب ماراح يطول ويرضى وفعلا هذا اللي حصل وانتهى الموضوع مع إنه جرحني بتصرفاته وكلامه هذا الموقف الأول أما الثاني فحابسني في البيت ولما أحاول فيه نخرج يلف فيني الشوارع لحد مايجيني صداع وأحس بغثيان ومستحيل أروح أماكن عامه إلا بشق الأنفس كنا مسافرين وطلبته أجلس على الكورنيش شوي وجاء وقت صلاة المغرب ومارضي يخليني أصلي بحجة إن الناس يشوفون مؤخرتي لما أسجد وأركع فاضطريت أصلي المغرب والعشاء جمع تأخير في الفندق لأننا مسافرين
لما ألبس ملابس تبين جزء من جسمي كاليدين والصدر حتى ولو كان شي بسيط يزعل ويعصب ويقول أنتي ملكي وماأرضى إن الناس يشوفونك حتى لو كانو حريم.... ويتابع جوالي مين يرسل لي ومين يكلمني يغضب لما يشوفني على التلفزيون أشوف فيلم يقول ماأقبل إن أنتي تشوفين رجال غيري حتى لو كانت أفلام ولما يكون في غرفه ثانيه يجي فجأه عشان يشوف البرنامج اللي أتابعه ويقفل التلفزيون إذا فيه شي موعاجبه ياناس طقيت أحس إنه أبوي مش زوجي يتعامل معي على إني طفله ياعالم وش الحل متحكم فيني لدرجة إنه ماصارت لي شخصيه ماأقدر أروح ولا أجي وماأقدر أتكلم براحتي ولاألبس براحتي ولا حتى أتنفس براحتي وهل كل الرجال كذا ولابس زوجي والمواقف كثيره ولكن هذه أقربها في الوقت