بسم الله الرحمن الرحيم
السلام عليكم ورحمة الله وبركاته
أنا فخور جدا بانضمامي عضوا لمنتداكم المتواضع
وبعد :
بدون مقدمات بدخل في الموضوع على طول
أنا خاطب ( متملك وعاقد القران ) على بنت من بنات جيراننا
المهم
الوالدة الله يحفظها طلبت مني إنها تخطبلي هذه الفتاة لكونها من أسرة متواضعة ومحترمه ومتمسكة بالدين .
المهم كلمت الوالدة أم البنت ووافقوا أهلها بس البنت ما وافقت بس أهلها كانوا عارفين بمصلحتها وهم عارفيني إنسان خلوق ومحترم والحمد الله ملتزم ما أقول إني مطوع بس أخاف ربي وجامعي بس باقي انتظر الوظيفة المهم بقيوا أهلها يقنعونها بالزواج تقريبا مدة أسبوعين ونصف حتى وافقت البنت يوم وافقت طلبناهم بالنظرة الشرعية شفتها و شافتني ووافقنا على بعض ، وبعدها بأسبوع كانت الملكة ( عقد القران ) ...
المهم تقريبا أول أسبوع إلى أسبوعين كانت البنت عادية معي جدا ما أقول انها مبسوطة من الزواج ولا أقول انها ماتبيه .
المهم بعد الأسبوعين هذي قفلت جوالها أسبوع كامل استغربت ليش قفلت جوالها .
المهم جيت بسافر قلت لازم أودع أغلى الحبايب جيت واتصل على أمها لأن جوالها مقفل عشان أخبرهم إني جاي ؛ وجيتهم البيت وسلمت عليها وبقيت عندهم تقريبا ساعة ومشيت لأني انتظرت أهلها يخلونا مع بعض ولا قاموا من عندنا
بس يوم طلعت شغلت جوالها المهم يوم جيت بسافر أرسلتلها رسالة إني بسافر ووصلتها الرسالة ولا ردت علي أبدا وما قالت حتى توصلت بالسلامة مشيتها وصلت المدينة المطلوبة وأرسلتها إني وصلت ولا ردت علي وبعدها قفلت جوالها مرة ثانية ولمدة أسبووووع .
اتصلت على أمها قلت خلي حبيبة قلبي تفتح جوالها المهم فتحت جوالها فقلتها ليش قفلتي جوالك قالت كنت مشغولة .
فقلت لها شغلتك ما تخليكي تتصلين أو على الأقل ترسلين تتطمنيني عليه يوم سافرت وتتجاهلين رسايلي وتقفلين جوالك ..
قلت لازم تصارحيني وش فيكي كذا قالت أنت آخر زيارة لك ما طولت على طول جيت ومشيت فقلت بس كذا أعوضها الزيارات الجاية *( بس أنا يوم رحت أهلها ما قاموا من عندي عشاان كذا رحت بدري)* وقلت وش غيرها قالت أخاف أصارحك تزعل قلت لا عادي قالت أنا باقي ما حييتك و إذا شفتك قدامي أتضايق وما أبغى أشووفك بس إذا سافرت أشتاقلك أهم شيء ما تكون حولي .
المهم بعدها بأسبوعين رجعت الديرة وزرتها و جلست عندها حول ثلاث ساعات أنتظر أهلها يقومون المهم أهلها قاموا بس سبع دقايق ورجعوا المهم إذا أهلها معي ما أقدر أسولف لها إحراج يعني أغلب السوالف أنا و أبوها ( طبعا أبوها وأمها وأخوانها دائما يجلسون معي في كل الزيارات وكل الوقت معي ما يقومون إلا فترة بسيطة ما تتعدى السبع دقايق ) المهم بس مجرد ما طلعت قفلت جوالها وبعدها بيوم سافرت ونفس الشيء أسبوع كامل قلتلها ليش قفلتي قالت أنت تعرف ومفروض يوم جيت عندنا بعد ما أعطيناك القهوة تكون مشيت على طول أنت طولت زيااادة حتى كنت بقولك يالله توكل على الله .( طبعا طولت لأني كنت أنتظر أهلها يقومون و أقول في بالي ألحين يقومون إلا ألحين ، والشي الثاني عشان ما تقول إني مشيت بدري وتتضايق .. )

احترت إن مشيت على طول تقول ما طولت وإن طولت تقول طولت زيادة مفروض تكون مشيت بدري .

المهم سكت و البنت بعض أو غالب مكالماتي لها دائما تسمعني كلمات جارحه ولا عمري سمعت منها كلمة أحبك إلا في أول أسبوعين من الزواج أرسلتها برسالة فقط .
طبعا إلى الآن مر شهرين من الزواج ( الملكة ) ...
بداية الشهر الثالث و الرابع ...
البنت كنها تعدلت أخلاقها معي وصارت أفضل مع العلم ما أسمع إلا كلمات عادية مثل ( حياتو .. قلبو .. ) طبعا بعد إصرار مني حتى تطلع منها أما كلمت أحبك رفضت وبشدة تقول ما أبي أخدعك و أنا باقي مع حبيتك ...
ويوميا أو شبه يومي تراسلني بس معظمها رسائل عادية ما فيها غزل حتى البنت قالتلي ما تلاحظ رسايلي لك عادية !!!
قلتلها إن شاء الله مع الزمن تتغيرين وتحبيني أكثر مع العلم إنها تدري إني أمووت فيها بل وتعلقت فيها وتدري إني مستحيل أستغني عنها مهما كانت الظروف.
حتى البنت تقول تكفى ساعدني حتى أحبك وفي يوم من الأيام طلعت لها كل مشاعري لها من حب لها وإني متعلق فيها حتى إن البنت سمعتها وهي تبكي من كلام الحب اللي قلت لها المهم بعد المكالمة أرسلت لي رسالة إنها تعلقت فيني مره وأنا فرحت مره إنها تعلقت فيني ..
المهم كان زواجنا مو الصيفية الجاية الصيفية اللي بعدها عشان تكون قد خلصت دراستها ..
لكن قلت دامها تعلقت فيني شكلي بقدم الزواج المهم قلتلها ووافقت بس تقول راح أكلم الوالد لكن والدها رفض حتى تخلص الدراسة . قلت عادي مو مشكلة ..
لكن بعدها بفترة تقريبا أسبوع البنت تغيرت علي مرة وبدت تطلب مني طلبات تعجيزية تقول تبغا جهاز جوال بـ( 3000 )ريال أيفون4 s ، و تبي شريحة مفوترة وتبي ذهب وتبي أصارفها شهريا وتقول باقي طلبات بس تتذكر وتقولي .
وتقول تبيها الزيارة الجاية كلها بدون استثناء .
رديت عليها قلت الجوال عطيتك ليلة الملكة قالت الجوال اللي أعطيتني إياه هديتك ما أعجبني .
قلت و الشريحة المفوترة إذا صرتي معاي أبشري باللي تبينه .
أما المصاريف الشهرية ما هي واجبة علي لأنك باقي عند أهلك .
فبدت تهزئني في الهدايا حقت الملكة تقول شفت الساعة اللي هديتني إياها عرفت سعرها طلعت من الرخيص والجوال اللي اعطيتني ما أحبه للعلم سعره فوق الألف فقلتلها الهدايا رمزية وإلا أنتي تسوي أغلى و أغلى ..
المهم يوم جيت أقفل قالت البنت لا تزعل علي ما أبيك تزعل علي قلت ماني زعلان وقفلنا المكالمة واحنا راضيني ... ( بس أحس إنها تبيني أزعل )
كلمتها المكالمة اليوم الثاني إلا والبنت زعلانه مرره قلت اشفيكي كذا قالت خلاص أنا ما حبيتك ولا أبي أعيش معك وما أطيقك أبد أبيك تفارقني وتطلقني ولاعاد تتصل فيني ولا تراسلني وراح أكسر الشريحة ما أبييييييك أفهمني .
قلت طيب و أنا أحبك ومتعلق فيكي ولا أقدر أستغني عنك وأنتي اللي علقني فيكي قالت كنت أضحك على نفسي و أضحك عليك ووالله ما حبيتك ووش تبي ببنت ما تبيك دور غيري قلتلها طلاق ماني مطلقك قالت تحدي وعناد قلتلها لا مستحيل أستغني عنك بسهووله قالت وش تبي بوحدة ما ترتاح معك قلت أنا قد غلطت عليكي قالت لا بس أنا ما أرتحت لك أبد .

للمعلومية :
الملكة صار لها 4 شهور – البنت باقيلها السنة الجاية وتتخرج من الجامعة وأنا متخرج من العام ، عمري 23سنة وعمرها 21 سنة .
أنا اللي يتصل فقط ، الأسبوعين الأخيرة رسائلها بدأت تقل مع إني أنا اللي يطلبها ترسل لو ما أطلبها ما أرسلت ، طلبتها تتصل فيني رفضت تقول إنها مرتاحة كذا من وضعها ، ، وقالتلي إذا تزوجتها لازم الخدامة تكون قبلها في البيت لأنها ما تبي تطبخ ولا تشتغل تقول ماتبي تتعب نفسها وتبي شهر العسل خارج السعودية ، وللمعلومية دائما تجرحني بالكلام طيب إذا ماتبيني لاتجرح صح والا لا ،
ومع ذلك صابر عليها صبر أيوب لأني يوم تملكت ما أبي ألعب أنا ما تملك إلا وأنا جاد في الزواج . وأحس في نفس الوقت ماكني متزوج مثل باقي الناس والسبب البنت .

لكن أبيكم تفيدوني وش أسوي معها ؟؟؟؟ أنا ألبي طلبها وأطلقها ويرجعولي المهر وإلا أعلقها حتى تروح تخلع نفسها من المحكمة ؟

وجزاكم الله خير

الله يصلح حالك
نصيحتي لك طنشها شهر
وبعدها بتفهم اذا دلع بنات او فعلا ما تببيك
اذا رجعت وكلمتك فهي تبيك اذا طنشت فهي ما تبيك او انها جاهله في الحياة الزوجية

للمعلومه عندي نظرية خاصه فيني الله و اعلم هي صح ولا
النظرية هي ( البنت لما تطلب طلبات ماليه كثيره وكبيره فهي لانه تمر بمشكله نفسيه فتفرغ ضيقتها بالمصاريف أو لانها تبغى تختبر مقدار حب خطيبها لها أو لانها ما تحبه وتبي تصرفه باي طريقة )

فترة الملكه مهمه لفهم شريك الحياة

الله يوفقك

أشكرك على مرورك ؛؛

وأنتظر ردود الاخوه الكرام ...

سبحآن الله نفس حكآية خآلتي
جآيها رجآل ماشاء الله الخير كله فيه وميت عليها
لكن سبحآن الله مآقدرت تتقبله ابد
وكنت دآيم اقلهآ إنتي الخسرانة بتفوتي على نفسك خيرة الشباب
لكن كانت مرررة معنده قالت تخيلي تعيشين مع وآحد ماتبينه كيف بتكون حيآتك ..مجاملات؟
فعذرتها ومعاد قلت شيء
وصارت تدور اي مشكلة صغيرة وتمسكهآ عليه بس عشان تتطلق
وخطيبها جلس متمسك فيها ثلاث سنوات لكن حصل الطلاق بعد مآتدمرت نفسية البنت تمآما
حتى الولد تععب كثييير معآها
والحين هو خطب له وحده ثآنية تقدره ومرتآآح معاها وحبها بجنوون وشطب ع الأولى إللي مآشاف منها خير
والبنت لقت رزقها مع واحد ثاني وارتاحت معاه
وانت ياخوي احسبها صعبه تعيش مع وحدة ماتبيك صعععب مرة من جهتها
حتى لو مستعد تضحي عشآنها مآراح تتقبل منك اي شيء
وبتتعب انتا وهي سوآ

لكن مبدئيا زي ماقالت لعيون نوف اتركهآ شهر وبعدهآ اسألها إذا تبي تكمل معاك أو لا
والله يوفقك وتلقى البنت اللي تقدرك

أشكرك على مروووورك

بس سويت المستحيل ولكن دون جدوى ..

طيب دامها ماتقبلتني ليش دائما تجرحني وتغلط عليه بالكلام و الله ماجبرتها عليه هي اللي وافق عليه قدام عيني وبرضاها .

لو قلنا هي تبيك وتحبك بس ما تحترمك ودايم تجرحك

شو بيكون موقفك

البنت توآفق اول مره على اساس إن مشآعرها بتتغير
لكن تتفآجئ إنهآ ماتغيرت وتصير حتى مآتبي تسمع طاريه
وتصير تتهرب وترفض زياراته لها
البنت هآذي اللي كلمتك عنها تثق فيني
خلتني اسمع مكآلمه لهم كان كل كلامهآ تجريح وإهآنات توصل احيانا انها تقول له أنت مآعندك كرآمه
أنآ تفآجاءت فيها مرره قلت يابنت حرام عليك ليش تجرحينه ماعمري سمعتك تقولين لاحد كذا
قالت خلآآص انا مآااابيه وابغى اتطلق وجلست تبكي وأنآ بصراحة رحمت حآلها وجآها حالة نفسية ومآتنام الليل
وماحد متفهم من أهلها كانوا يبونها تاخذه بالغصب..وربي إن الرجآل يستاهل الخير اخلاق ومحترم لكن قلبها مآتقبله ابد

البنآت بصفه عآمه إذا حست إنهــآ بترتبط بواحد مآتبيه
بتحاول المستحيل بس عشان تطلق وتوصل احيانا إنهآ تشرد من البيت
وأنت يآخوي كبير وفآهم
اعطهآ الفرصة الأخيره شهر وإذا شفت إنهآ لسى على حآلها
خلآص خلهم يرجعون لك المهر واتركهــآ
ادري إن موقفك صعب ويبغآله قرآر حآزم من عندك ..
وإن شاء الله إنك تلقى البنت إللي تسعدك وتبذل المستحيل عشآنك وتنسيك اللي فات كله

.

من ناحية الغلط مستحيل أغلط عليها أو حتى أجرحها مهما سوت معاية ..

بس والله أمرضتني وسببتلي حالة نفسية ..

اتصلت على أمها قبل يومين أسألها عن البنت إلا واسمع البنت تصارخ عليهم وتبكي بصووت عالي ..

بس أمها تقول دائما تقولها بنتها إن بيننا مشاكل بالعكس ما بيننا شي ممكن تحصل بس مشاكل أقل من تافهه ولا تسمى مشاكل بس هي الله يهديها تكبرها ..

من ناحية المكالمات و الرسائل ماراح اكلمها ولا أراسلها لأنها حتى هي تقول بتكسر الشريحة ..
بس إلى الآن أواصل أبوها و أمها وأسألهم عن البنت .

بس ليش قبل شهر تقريبا إذا تأخرت ما أتصلت ترسلي رسالة إنها مشتاقه لصوتي ،،، ومره ثلاثة أيام ما كلمتها فقالتلي حرام عليك تسوي فيني كذا ما أقدر أصبر بدون صوتك ...

والله العظيم إنها حيرتني أنا أبي أكون مثل الشباب متهنين بزواجهم أما أنا ماجاتني الحالة النفسية إلا من بعد زواجي .

ولو أحد غيري مايكون صبر معاها أما أنا الحمد الله صبوووووووووووور جدا وما أبي أستعجل أطلق ما أبي أتسرع فأندم حياتي كلها ..
وإذا تبي هي تروح المحكمة وتطلب الخلع أما أنا مستحيل أطلقها مو عناد بس أحس ما أقدر أعيش بدوووونها .

قهههههههههههههههههههههههههر والله قههههههههههههر .

دعواااتكم إن الله يصلها ويهديها

الله يهديها ويصلحها ويسخرها لك
والله يكتب لك اللي فيه الخير

سيفيدونك الاعضاء اكثر باذن الله