السلام عليكم ورحمة الله وبركاته،
شحالكم يا أهل المنتدى

عندي مشكله مع زوجي وقلبي يعورني لاني أحس مابينا تفاهم وأحس اللي بينا انكسر

من زمان انا وزوجي مانتفاهم وانا ما اعرف كيف اعبر عن اللي أحس فيه لما أكون زعلانه او متضايقة
ولما تكون بينا مشكله أقوله خلاص ما أبيك وهو يزعل وأراضيه ويرجع
عيبي الوحيد حتى لما يكون غلطان أراضيه

المشكلة الحين اللي بينا انا وهو نمر بظروف صعبه وايد
حتى بيتي ماكتمل الصالة عندي مافيها كنب والمطبخ مافيه كبت ولا فرن ولاشي
لما أقوله متى بنكمل البيت يقول روحي اشتغلي فكنت اسكت وادور شغل وأقول مسكين ما عنده

مره رحنا بيت أهله
واخوه توه تزوج ويكمل بيته فكنا انا وزوجي نشوف القسم حق اخوه ماشاء الله حلو وفخم
قالو خوات زوجي لزوجي مسكين أخوي ما عنده فلوس ماقدر يكمل
انا هني انصدمت قال زوجي مايهمه انا بكمله عندي الفيزا بسحب منها
انا هني تضايقت

قال زوجي خلاص بروح الحين بشتري السيراميك قلت له خلاص بروح معاك ابا أغراض لبيتي قالوا خواته مسكين ما عنده أخوي تبين تدخلينه السجن ويدخل الدين
مارديت عليهم وسكت

لما رجعنا البيت قلت له انا كنت أضيق على عمري وعيالي عشان ما تدخل الدين والحين انت تدخل الدين
والشي اللي يقهر بيتك ماخلصته
وانا ما أمنعك تساعد أخوك لكن قبل خلص بيتك
وكنت أتكلم بعصبيه متضايقة وقلت له انا مش مرتاحه معاك انت ماتحس فيني ما أبيك خلاص
قالي بيني وبينج الله

ونحن حجزنا حق عمره من قبل المشكلة فلما جا وقت العمره كتبت له مسج سامحني لاني صرخت عليك ونحن بنروح عمره
مارد علي وأخذ فراشه وصار ينام في الصالة
رحنا عمره مع امه وأخته وما كان يكلمني أبدا كل شي كنت اسويه بروحي
رحت عند مطوع في الحرم وكلمته قالي حاولي تكلمينه انتي في الحرم طرشه له مسج لاني ماكنت أبي امه وأخته يلاحظون ويتدخلون في السالفة
كتبت في المسج انا أحبك وابيك وانت أبو عيالي سامحني
مارد علي وزاد في عناده
رجعنا البيت وبعده ينام في الصالة ولا يكلمني ويرجع البيت قرب الفجر عشان أكون نايمه مايبا يشوفني
واليوم شفت عمتي ما تكلمني ولا تطالعني اعرف أنها تعرف لانها لاحظت من لما كنا في مكه

الحين شو اسوي حتى الأكل لما أقوله تبا اكل مايرد علي

شوو الذنب الكبير اللي سويته عشان يقولي بيني وبينج الله
وقفت معاه في أصعب الظروف
الحين انا بيني وبين الجنون شعره
كتبت لكم مشكلتي وأبا الحل منكم مساعده أغير من نفسي

تعديل العنوان ليناسب المضمون

وعليكم السلام ورحمة الله وبركاته ..
مرحباً أختي الكريمة ..
سأتحدث معكِ بكل صراحة ولا تزعلين مني ..
أولاً / عندما طلبتِ منه ، فكان طلبكِ بوقت غير مناسب ومن الطبيعي يُساعد أخوه في هذا الأمر ..!
ثانياً /رُبما يعاني من أزمة لم يخبركِ بها ..
ثالثاً / عندما تطلبين أي طلب من زوجكِ اختاري الأوقات المناسبة لهذه الطلبات وبدون عصبية ..
رابعاً / نعم لاتدخلي أحداً في هذا الأمر ..
خامساً / حاولي أن تحضري له مفأجاة تسعد قلبه ويحبها هو ..
وررقق الله قلبه عليكِ في هذا اليوم الفضيل ..

البيت بيته والحمدلله انتي مو بالشارع
يساعدك اخوه شي راجع له كان الاحسن تكبري راسك وتطنشي ولا تتدخلي باموره الماليه
لو كنتي تدفعي من جيبك وهو فلوسه رايحه برى قلنا لك حق
بس هو ملزوم بخلص بيته سواء الحين او بكره
الحين اتركيه على راحته واكثري استغفار ولا تضغطي عليه

جميع ماذكرتيه امور بسيطه وتحدث كثيرا
لكن
ان تقولي له "" ما ابيك خلاص "" هذه التي قصمت ظهره وجعلت الامر الى ماهو عليه
احيان كثيره يكون الحق معنا ويمكننا حل المواضيع بسهوله لكن نتهور ونتحامق ونقلب الحق علينا
لن اتكلم كثيرا لكن ضعي نفسك مكانه وانه قال لك خلاص ما ابيك ماذا ستفعلين وماذا تريدين حتى تسامحيه وافعلي ذلك له الان
واعلمي ان هذه الكلمه اثرت فيه لانه يحبك وبقدر المحبه يكون العتاب
وفقكم الله لكل خير

__________________
الحمد لله على كل حال

شايفة انه الموضوع ما يحتاج
الهليلة الي عاملها زوجك .. و انت اعتذرتي و خلاص انتهى

ليه تموتي حالك و تمرضي نفسك !؟

خلاص .. لا تكرري الاعتذارات ..
و قدام امه اضحكي و ابتسمي و لا تحسسيها انك متأثرة بزعل زوجك

.
.

و قوليله مشتهيين بيتزا
مشتهيين اي شي يحتاج لفرن ..

عشان يعرف انه الفرن مهم و ضروري

قوليله بعد فترة .. اخوي بيزورني او صحبتي او جارتي ..
ومافي كنبة بالصالة .. وقتها راح يتحرك

لازم توضحي له اهمية الشي الي تبغيه بشكل عملي
مو بس كلام و زننننننننن

و لا تكلميه مرة ثانية امام اهله او اخواته

خلاص اعتذرتي وندمك وصل له ،،لاتكثرين الاعتذار والتمسكن قدامه التزمي الصمت وأدي واجباته وحقوقه عليك على اكمل وجه وانتي صامته ،،مع الايام يبدا يتغير ،،

حركتك كانت جدًا سيئه لما دخلتي بالموضوع وقلتي خلاص اخذني معاك بشتري اغراض بيتي خصوصًا امام خواته بينتي انانيتك وطمعك وغيرتك امامهم وقلبك احترق لما نوى يساعد اخوه
لو لاحظتي هو اضطر يتسلف لاخوه لانه محتاج شي اساسي اكثر من بيتك اللي هي الارضيات

تسلمووون حبيباتي على مشاركتكم نصائحكم لي
بالنسبة للموضوع اللي كتبته

زوجي كريم جداً وطيب القلب لدرجه دائماً يقول راتبي مو لي
وهو ساعد اخوه في عرسه وفي بناء البيت لدرجه ان بيتي صار لي أكثر عن ثلاث شهور جالسه فيه وما فيه كنب ولا مطبخ مطبخ فيه

الشي الثاني انا اعترف اني غلطت لما بينت غيرتي قدام خواته وهذي مشكله عندي مااعرف كيف أخفي غيرتي

الشي الثالث هو قاللي خلاص انا ساعدت أخوي والحين ظروفنا صعبه لازم نقتصد في كل شي لكن لما رحنا بيتهم وأخواته تكلموا قدامه وهو عرض انه يشتري السيراميك انا تضايقت لاني حسيته ما فكر فينا ابداا

واخوه مو محتاج سيراميك لان اخوه قاله بسوي فراش بدل السيراميك

الحين تعرفون شو المشكلة اللي أمر فيها الحين
ان زوجي من ناحيتي تغير علي وايد وماياكل في البيت
وأمه لما تشوفني تقول ماشاء الله على حرمة اخوه ما تسوي مشاكل وتقدر ظروف زوجها
وكلهم معاملتهم لي تغيرت
هذا كله لاني قلت لزوجي رتب البيت وبينت غيرتي عندهم
زرتهم البيت وأهديت حرمة اخوه هدية غاليه ابغي أبين لهم ان نيتي طيبه معاهم