السلام عليكم عزيزتي
أنا توني طالعة من مشكلة مع زوجي والحمد لله انحلت
هالرجاجيل يحبون المشاكل الله يعينا عليهم ، لكن هذي الحياة زي ما فيه حلو لازم يكون فيها مر
كل رجال له شخصية وكل واحد له اسلوب ، والوحده فينا لازم تفهم زوجها ، يعني يكمن رايي يضبط معك ويمكن لا ،،،
طولت في الكلام لكن الرجال احيانا تجيهم حالة من الملل الشديد لا توصف يملون من الشغل من البيت حتى من زوجته بس هذ مهوب يعني انه يكرها
بعدين شي طبيعي ان الازواج يبعدون عن بعض فترة بسيطة ، بالعكس اذا ارجعوا يصيرون مشتاقين لبعض وفرحانين وتتحسن نفسيتهم
نصيحتي روحي عند اهلك ارتاحي واجلسي مع نفسك وشوفي ليش هو متضايق ، وش مزعله ومخليه عصبي بهذي الطريقة!
اذا رجع سوي حفلة وجيبي هدية صدقيني بينحرج من نفسه ويتندم على اللي سواه
ونصيحتي الثانية مهوب كل مشكلة تصير معك تقولين لاهلك لانهم احيانا يعقدون الامر لانهم عادة يتدخلون بدافع الرحمة لا بدافع العقل وخليهم دائما الملجأ والخيار الاخير اذا ما عاد عندك اي حل،،، لان معظم الرجاجيل اذا شاف الحرمة كل ما صار شي راحت تقول لاهلها ، ما عاد يحترمها ولا يصير لاهلها هيبة حتى لو انهم شديدين.
خلي أهلك الورقة الأخيرة في اللعبة
................................................
قريت المشكلة الاولى من بعدين ، رجلك شكله عصبي الله يعينك ، لكن حاولي ما تراددينه ، واذا طلبت منه تطلعين ولا وافق الا من بعدين ، لا تجين انتي وترفضين ترا المسالة تتعقد اكثر ، مجربة
وبعدين كل الازواج ما يحبون الاسواق ، انا اعاني من هالشي ، ياالله اروح السوق ولا يطيع ينزل معي ولا يخليني انزل لحالي
ولا تدققين على مسألة الحريم اذا شفتيه يناظر الفتي نظره لشي ثاني ، سولفي معه ، افتحي الرادو ، يعني من هالاشياء ، وما يمنع انك تبينين غيرتك بين فترة وفترة
انا كنت مثلك اعصب واتهاوش معه اذا طالع الحريم , وصار يعاندني ويتقصد يناظر واحيانا يضرب بوري عشان ينتبهون ، شي يقهر لكن ما لنا الا الصبر
في النهاية هذي وجهت نظر يمكن تخطي ويمكن تصيب
ما شاء الله توك سنه وشوي ، في المرحلة هذي بتواجهين مشاكل كثيرة ، لان كل واحد فيكم يبغى يفرض شخصيته ، وكلنا مرينا فيها والحمد لله عديناها
لكن مع الوقت بيتحسن صدقيني وانتي دايما خذيه باللين مهوب بالعناد
الله يوفقك ويصلح زوجك ويهديه
04-12-2007, 07:09 PM
"زوجي يقول لي روحي لاهلك"
ضوابط المشاركة
العرض العادي
