شوفو لي حل تعبت من اختي الله يصلحها ويهديها والله عجزت منها
متزوجه من 15 سنه موظفه وظيفه حلوة وزوجها يحبها وحياتهم هاديه
قبل سنه طاحت مع هبة الخلق في البلاك بيري الله لا يوفق اللي مدحته لها خلتها تشتريه
فلتها بقوة ضيعت وقتها وصار شغلها الشاغل ما عندها صنعه غيره
تنام عليه وتصحى عليه ماعاد تزورنا مثل أول انا قلت فتره وبتمل كل الناس كذا
بس الفتره الأخيره شكيت فيها متغيره مرره وتقربت منها وجبت بلاك قلت اضيفها
واسولف معها واشوف وش عندها وطلع شكي بمحله اختي متعرفه على واحد
هي طبعا ما قالت لي بسهوله الا لما ارتاحت لي وقالت لي السالفه من البدايه
هي كانت ماخذه الدعوة استهبال وتقول لي فتره وبتركه انا عاجبني دمه خفيف ويضحك ومدري وشهو
قلت طيب اهم شي انتبهي لنفسك ولا تتعلقين فيه ترى انتي غبيه وينضحك عليك بسهوله
ضحكت وقالت لا اصلا ماني مطولتها معه توقعتها بتصدق معي ..
اللي صار .. إنها توصلت معاه للمكالمات دخلت عليها فجأه لقيتها تكلم وصوت رجال طالع مع الجوال
واااضح وما شوف الا وجهها اختلف وقطعت المكالمه بسرعه سألتها مين تكلمين قالت مشرفتي في الدوام
يا ربيي وش ذا المصيبه جلست معها وتكلمت قلت انا خايفه عليك وكل اللي قبلك ضاعو ما اختارو انهم يضيعون مثلك كذا ما توقعو الا وهم في المصيبه وانصحها واقولها قصص صديقاتي وكثرت عليها الكلام
من القهر وربي وهي ما همها تقول وش صار اشفيك انتي انا كل الموضوع ضحك وسوالف ومستحيل يسمع صوتي ولا يشوف صورتي تقهرني اكثر لا قالت كذا .. هذا الكلام يوم الخميس
اللي صدمني اليوم الصباح كنت بالدوام مدري وش خلاني اناظر البلاك والقاها عارضه صورتها من تحت جسمها بس يعني مو الوجه عل طول هاوشتها وقلت شيليها انتي مجنونه قالت اشفيك مو باين اني انا ..
يا ربي هاذي كيف افهمها انا خلاص ضاقت بي الدنيا كل يوم اصلي الليل وادعي لها مقهورة عليها
خاصه اني اعرفها اختي هاذي مو هبله الا غبيه مره مره وبسرعه ينضحك عليها
وش اسوي فيها .. نصحتها ذكرتها هاوشتها ما فيه فايده .. لدرجه اني فكرت اكسر جوالها وارتاح منه
قلت باخذه ارميه في كوب مويه عشان يخرب ورقمها يروح عليها وتطلع رقم غيره يصير ما يعرف لا البلاك والجوال و اقطع كل شي بينهم بحيث ما يوصلون لبعض
هاذي اختي البكر ولو ضاعت مصيبه اخواني بيموتون قهر وابوي انا ما بي لها الضياع انصحوني وش اسوي انا خلاص بديت انجن ماعاد اعرف افكر لحالي .. ومابي اقول لخواتي عشان لا تحس اني فضحتها
وماعاد تثق فيني ودي احل الموضوع بيني وبينها لكن هي الله يهديها مصره اني متشدده و مكبره الموضوع وانه عادي
وصديقاتها بالدوام كلهم مثلها وحالتهم مزريه ثنتين مطلقات وراعيات شات وصوتي وهي توها مبديه بلاك
تقول العالم من زمان تضحك وتسولف عايشه حياتها وانا توني اعرف البلاك الحمدلله انا ماني مثل غيري
انا ولا شي جنبهم قلت انتي مالك شغل فيهم بيتك انتي اللي بيخرب تقول انتي غبيه كم مره اقولك ماني معطيتها اكبر من الدردشه وخري عني وصارت ماعاد تسولف معي زي أول
تكفون شورو علي انا ماعاد فيني فكر

انا ما قصدت ان اللي تسويه عادي بالعكس غلط وغلط كبير خيانه لله قبل كل شي وزوجها الطيب
بس قلت لها كذا لما عرفت ان تخويفها من الناحيه الدينيه ضعيف شوي قلت اخوفها بالأهل والسمعه
لما اقول لها حرام تقول انا ما سويت شي ما طلعت معاه .. اقولك وقتك هذا مسئوله عنه يوم القيامه
تضيعيه تتضايق مني ومن كلامي وكم مره كلمتها من هالناحيه كثير واعرض عليها تروح معي محاضرات
ودروس علم حلقات ذكر لكن ترفض ابيها تسمع وتتعظ وينصحونها بإسلوب افضل مني لكن تتحجج باي عذر عشان كذا بديت اذكرها بأشياء ثانيه يمكن تصحيها

اللهم امين مشكورة على الدعوة ..
انا ابي حل هذا الكلام كله قلته لها وقلت لها عن زوجها قالت يعني
ظنك هو ما يكلم معه ايفون واصحابه في العممل اكييد يدردشون وهو
مثلهم ..

يا ناس ما كتبت عشان تتشمتون بالضعيفه
ترى هي مبتلاه واصحاب الذنوب مبتلون
وان شالله ربي بيفرج همها وهمي وهمك يارب تتزوجين وتحافظين على النعمه
بس شورو علي ..