السلام عليكم ورحمه الله وبركاته
اولا حبيت اهنيكم على هالموقع الاكثر من رائع وعلى صراحتكم في القول الي شجعتني اني اكتب في منتداكم وارجو ان تساعدوني في حل قصتي او بالاخص قضيتي وارجو ان تتفهموا موقفي ومشاعري
اولا اقسم بالله على قول الصراحه
بسم الله ابدا مع اني مااعرف من وين ابدأ
بسم الله
انامن عايله محترمه جداجدا ولها سمعتها وصيتها بين الناس والكل يحترمها عمري 18 وطالبه جامعيه واعترف اني جميله جداوخلوقه للغايه وحياويه وايد وكل من رأني يشهد لي بذلك المهم انا مااعرف افضفض للي حوالي او اقرب قريب لي اخاف ينظر لي او يفهمني غلط وودي اقول للوالده واستحي او بالاخص اخاف تنصدم بالبنت الي ربتها فجذي انا كتومه ومااحب اقول لاحد للي بخاطري
الحبكه في الموضوع اني تعرفت قبل سنه على شاب سعودي طالب بالكليه الصحيه وانا من الكويت والولد على خلق عالي ومحترم للغايه ويستحي وهذا الي حببني فيه والا كثر من ذللك يخاف ربه وهذا جذبني اكثر واكثر
انا اعترف اني حبيته وانا مستغربه من نفسي شلون حبيت واحد ماعمري شفته معنه الي يخطبوني كثير من العايله والاهل القرااب والبعاد كلهم يتمنون بس اوافق وانا ارفض لدرجه انه خالاتي وعمامي زعلانين على الوالد والوالده لانهم ارفضوهم المهم اهو اعترف لي انه يحبني انا ماقلت ولااعترف له
واهو ناوي يخطبني من اهلي عن قناعه كذا مره يفتح الموضوع علي وانا اسكره اقول الدراسه ابي ادرس واهو يقول حتى انا ماابي اتزوح ولااعطيك امل الا لما اكون نفسي يعني لما اتوضف بعد سنه رااح اهو يخلص من كليته المشكله قبل شهرين عطاني رقمه دزه بالايميل انا اول ماشفت الرقم اقولكم انصدمت لدرجه اني استغربت من تصرفه وبصراحه انا ماشفت الرقم كله سيده مسحت الرساله وقعدت ابجي لانه خفت انه ينظرني بنظره دونيه او انه كنت احسبه انه يناظرني اني بنت صايعه او من هذا القبيل المهم دزيته له مسج عاتبته عتااب شديد شديد واعتذر لي فقال انا ماابي تفكرين بهالتفكير والله وقعد يحلف انه يحبني ولا فكر ابد بهالنظره بس عطاني الرقم لانه من فتره لفتره نتقابل وقال متى مافضيتي دزي لي مسج وقولي اني على النت وادخل بس وفرفضت وقلت لاتحاول او انك تفكر بهالشي انسى
ومر شهر وهم بدا يلح علي وقال انا ماابي شي بس نبي نحدد للاوقات الي بينا لانه يدرس بالمدينه وماعنده كمبيوتر ولازم يروح المقهى ولما يرد لاهله بمدينه ثانيه عند كمبيوتر فيعطيني خبر انه موجود على النت ففي لحظه ضعف واقنعني وافقت فقلت له ماتسمع صوتي بس بيننا مسجات فوافقنا
وبعدها اهو قالي باسوي عميله بالانف كان يشكي من صديد وقال ابيك تدقي او تدزي مسج علي فقلت يصير خير ومادقيت ولاتدزيت مسج اهو زعل كثير فقلت له وربي استحي ولا اقدر اتصور نفسي اني اكلم شاب انا مو من هالنوع كتم غيضه وزعل علي وراضيته بكلمتين
المهم قال لي براحتك اهو انسان متفهم وعاقل وبصرااحه وانا بحاله ضعف دقيت عليه اول ايام العيد وباركت له بالعيد فكان كلامي السلام عليكم .(اسمه) موجود فقال معاك ياهلا لايكون الي فبالي اهو قال جذي فسكت لمده 10 ثواني واهو يضحك مستغرب وفرحان ومو عارف يتكلم فقلت كل عام وانت بخير وعيدك مبارك ومع السلامه سيدت الخط والله والله لو اقولكم اني قريت قبل لاادق حزء 30 من القارن وسميت ودعيت ربي وقعدت ايديني ترجف لمده ربع ساعه بعد ما سكرت الخط
وبعدهاتقابلنا بالشات فقال لي باادز لج فيروس اظهار الرقم انا استغربت من كلامه فسبحان الله طلع رقمي مو باين عنده بصراحه انا قلت احسن وحمدت ربي كثير كثير
وبديت ادق عليه واهو يقولي عطيني رقمك او دزيلي مسج فكنت اقوله لااااا لاتفكر كل شي بوقته حلو
فقال خلاص مومهم اني اخذ رقمك المهم اطمن عليك اهو قالي انا يا... ماشفتك بس الي عارفه عنك اسلوبك وكلامك والجمال مو معيار عندي وانا حبيت قلبك وطيبته المهم انا بديت ادق عليك وانا اقوله يا... ماودي اطول لاني اخاف من ربي واخاف الفتنه واخاف الشيطان يدخل بينا ,انا والله العظيم لما اكلمه مااكلمه بسوالف العشق والحب لا والله اخوي وينصحني اهو بامور الدين لدرجه اهو الي شجعني على الحجاب وناوي يلبسني العبايه والملفع هههههه والله ماجادلته اقتنعت ولبست المشكله انا كلها 31 ثانيه اكلمه وسيده اسكره لاني والله اخاف من الله واخاف الفتنه
ياناس شسوي انا محتاره وربي حبيته والله حتى اهو ناوي يخطبني جد لانه قال لي انا فتحت لاهلي الموضوع قلت لهم باتزوج من خارج البلاد سوريه او الكويت واخته الكبيره عارضت قال وحنا وشفينا فقال شوي شوي لين اقنعهم لين اتخرج واجي باذن الله
بس انا خايفه انه جد لو اهو ناوي صج هل راح يثق فيني وانا قلت له هالكلام فقال والله ثم والله اني واثق فيج وباخلاقج انا واثقه من نفسي بس اخاف كلام الناس الي مايرحم واخاف نظره اهلي للعلم يقولون وش عرف بنتنا فيه والا اهي تكلمه وربي خايفه مع العلم انه كثير يخطبوني وانا ارفض لاني حبيته صج والله اني يقولي انه لو في خير الله يجبه وربي ادعي ربي عسا الله يهديني والله بيننا اشيااء كثيره مشتركه واكبر دليل انه تفكيرنا واحد الشي الي باقوله او اهو يقوله يا انا اسبقه يااهو يسبقني فتلاقى نقول يامحاسن الصدف ......... المهم يا اعضاء ساعدوني وجهوني مع انا بحاجه لهذه النصيحه هالشي الي اسويه صح والا غلط وربي مااعرف افكر انا في نارين بين خوفي من ربي والفتنه والحيا والموت وبين حبي وعشقي وصدقوني راح اتقبل والله ماعمري فضفضت لاحد جذي ومااقدر افضفض لاحد بهالامور الخاصه جدا فيني
وتقبلو تحياتي
اختكم ريتاج