السلام عليكم .. وصباح الخير

الماضي :
بنت كل همها خدمة الدين بما تستطيع ولها مشاركات في انشطه هادفه ..
مساعدة واحتواء اسرتها واقربائها وصديقاتها
تنسيق اجتماعات فيها خليط المحاضرات و والألعاب وأكل الطيبات مع الصديقات اللواتي يتجاوز عددهن ال20صديقه
الدراسه والحصول على اعلى الدرجات .. وكذلك التزود بالدراسه الدينيه اوقات العطل
صلة الارحام وعيادة المريض والتنزه والتمتع بالرحلات البريه والبحريه ولكن ليس الجويه

الحاضر :
زوجه .. محبوبه من قبل زوجها .. حياة عاديه يوم حلو ويوم مر والعجله تسير
أم لـ طفله بعد كم شهر ستكمل عامها الأول بأذن الله
اعتناء بزوج وطفله .. واهتمام بملبسها ومظهرها من تنيق يديها
الاهتمام بالامور المنزليه .. الحمدلله مع وجود مساعدات
فقد للأهل والاحباب و للصحبه الصالحه لانتقالها الى منطقه أخرى و مجتمع آخر
فتور ديني الله يغفر ويرحم ويارب يكون فقط فتور وينتهي
احساس بفراغ شخصي واجتماعي

المستقبل :
ثقه بالله
وآمال بأيام سعيده وحياه طيبه وحسن خاتمه
/
\

/
هذي أنا .. مابين استرجاع ماضي واحساس بالملل من من الحاضر وآمال للمستقبل
فلقد طلبت من زوجي اكثر من مره أني أحس بضياع كينونتي الاجتماعيه .. بتوقف عجلة خدمة الدين
كيف احصل على اصحاب ان ما طلعت لمجتمعات نسائيه ..
اقترحت تحفيظ صباحا في نفس الحي رفض بحجة الواحد يقدر يحفظ بالبيت وحين يوافق سيكون العصر
بكذا بيجي تعبان فما أظمن توصيله ولا استفاد لقائي بعد يوم متعب له ووقت انتظاري لرجوعه
حاولت اجتمع بالجارات اغلبهن كبيرات بالسن ( جدات ) والبنات مو على ( مودي )
لا أريد ان افرض نفسي على احد وبالمقابل لا اريد ان افرض على نفسي شخصيات ما ارتاح معها
كررت طلب اشتراك بنادي وتعلم سباحه .. رفض بحجة (بما انك ناعمه ممكن تلاقي غوريلا بالنادي تشيلك وتشرد بك)! جواب مضحك وغير معقول!
دائما يخاف يوديني لحالي بمكان .. يحس الناس بتاكلني او بتقهرني لأني هاديه وخجوله
لكن الحقيقه أني الحمدلله محد يغلط على لاني محترمه نفسي
كم مره استعرض شهاداتي واقول ابغى اقدم فيها اتوظف احس اني انسانه مفيده انظم نومي والبس ملابسي الرسميه اللي شريتها ولا لبستها .. طبعا قبلت التفكير بوظيفه اقل من مستوى شهادتي لاجل اخذ بنتي معي بالوظيفه رفض بحجة الحرمه السنعه في نظري من تكون لبيتها وزوجها وأطفالها فقط
انا لما كنت بنت كنت اخجل من الزن .. لكن الحين ماخذته وسيله
هو يعتز بثقتي ورايي لكن بهذا الموضوع لا
كيف اقدر اقنعه مع اني حاولت أكثر من سنه
الموضوع مراااا مطفشني لان قبل شهر وصلت فيني الحاله أني صرت موعارفه اتحاور مع ناس ونسيت اسلوب الكلام مع اني كنت أطلع على مسارح في حفلات واقدم برامج في تجمعات خيريه



عذرا ع العجله
فلقد ذهبت كل طاقتي هناك في القراءه .. فلم تستوعب مني الكتابه هنا مكانه

اختكم /

بتلات ورد

__________________
استغفر الله الذي لا إلاه إلا هو الحي القيوم و أتوب إليه

أختي الكريمة ...

جزاك الله خير على طاعتك لزوجك و تؤجرين عليه إنشاءالله ... وما دام زوجك لا يرغب بالخروج الكثير فبأمكانك العمل من خلال المنزل ومن خلال جهاز الحاسب و يمكنك مساعدة الكثير من الناس بإفكارك حتى يمكنك تعلم الكثير الكثير من الأشياء من خلال العمل على الحاسب الآلي .. هناك الكثير من الأفكار التي يمكنك إشغال نفسك بها من المنزل و أنصحك بالقراءة فلا أعتقد الزوج يمنع زوجته حتى من القرأة ، عموماً حاولي مع زوجك بهدوء و إقناع و أختاري دائما الوقت المناسب للتحدث معه و عندما يكون رايق ، وكلما عرفتي و فهمتي نفسية زوجك كلما كسبتي و أرتحتي في التعامل معه ..

دعائي لك بالتوفيق ....

بصراحه انا مثلك يااخت بتلات تقريبا!!!

تزوجت وذهبت لمنطقه اخرئ افتقد للمجتمع الي حولي
ولي مجتمع هنا لكن بصراحه مو مثل المجتمع والاصدقاء والاقارب والاهل
هنا بلمنطقه الي انا فيها
كونت واتصلت وتوصلت مع ناس لكن مارتحت للبعض والبعض الحمدلله احبهم احب اجلس معهم لكن بحكم كثر السفر لللاهل لم اتواصل معهم بشكل افضل اذا طولت بلمنطقه الي انا فيها !شهر وبس!
والباقي انزل ربؤع خميس جمعه ..........
وارجع واسبؤع ارتاح وبعد كم اسبؤع ننزل نسافر وكذا

وبكذا والله مليت من العيشه بعيد عن مجتمعي السابق !
الان ومن ايام حنيت لمجتمع صديقاتي لمدرسة الثانوي وزيارات الاهل ....

والنهايه شكيت لزوجي الله يخليه .قلت انا ابي اتوظف ابب اطلع مليت دور لي علئ حل !
قال لي فكري وش تبين وانا لك البي؟؟

فقلت مالي الا اني اشغل نفسي بأكمال الدراسه الجامعيه لاني مادخلت الجامعه بس شهادة ثانوي ؟؟
وشوفيني انتظر بشغف الدراسه للسنه القادمه والي محطمني اكثر

انه انتساب مطور ....لا راتب ولا دووووام .....لكن علئ الاقل اشغل نفسي بلمذاكره ....
والبيت طفش مع اني بطلعات وسفر للاهل وغيرهم للنزهه
مطاعم وروحه وجيه
حياتي مع زوجي الحمدلله سعيده لكن
اتمنئ ان اغمض عيني واعيش لو فتره بلماضي ومجتمعي رغم راحتي النفسيه ولله الحمد مع زوجي لكن الحقيقه جلست البيت والروتين اليؤمي
ممل وبقؤه
اقؤم اسؤي فطور لزوجي الفجر
واقعد علئ المنتدئ من 5 الئ 9 الصبح ثم اصحي ولدي عمره سنه الله يسعده ..واقوم اسؤي فطور لي وله ...وتلفزيون لمسلسل معين ..ثم طبخ الغداء الظهر وزوجي يجيء ويتغداء ونسولف عن يؤمه ....ثم ينام وانا انام العصر ...ثم اقؤم والقهوه وغيرها ...الئ بعد العشاء وننام وهذا روتيني حفظته من سنتين ونص وخلاص طفشت ....

لكن محطمه وبقوه من الانتساب المطور والسبب ولدي محد يمسكه لي بمنطقتي الي انا ساكنه فيه وزوجي رافض حضانه والظروف الماليه ماتسمح للشغاله ....لكن الحمدلله علئ كل حال ..خلينا نشؤف الاعضاء وش يردون لنا ...

عزيزاتي بتلات ورد .. همس 2009

هذي حالنا كلنا صدقوني ...ابتسمت ابتسامة غريبة وأنا أقرا ردودكم وموضوع الاخت بتلات ورد وأقول يااااه كلنا نفس الحال

نشتاق لحالنا أول بس مستحيل نرجع مثل أول لأن الحياة برايي مراحل وكل مرحلة لازم نأقلم أنفسنا فيها
أما عن الروتين فهو قااااااااااااتل ودايما أتشكى لزوجي من ها الشي وخاصة إني انسانة تحب الحركة والنشاطات المختلفة وانسانة تهوى السفر والقراءة والبحر والوناسة على قولتهم ..وأيضا أحب العمل ما أقدر أستغني عنه لكن الزواج في المقابل أحيانا أحسه محطم للطموح او عائق لأشياء وايد خاصة اذا تربت البنت في بيت كله عمل و دراسة وخاصة إني وعيت ع الدنيا أبوي وأمي يعملون في نفس الوقت واثنينهم حثونا على الدراسة أهم شي كانت عندهم الدراسة الجامعية وبعد ما خلصنا نقعد بلا شيء ..! هو بصراحة شي محبط أحيانا أحس إني بلا فايدة وأقول لزوجي ويرد علي رد تقليدي "كفاية انج تشوفين عيالي" ...هو يقولها وهو فخور فيني ولكن ما يعرف شو بداخلي من طاقات وأفكار

بتلات ورد نصيحتي لج كما قال الاخ احساس أربعيني سخري التكنولوجيا لصالحك .. وابدأي بنشر افكارك ..ابداعك ..مساهماتك للدين وحتى يومياتك من خلال الانترنت ... اصنعيلج صفحة في الشبكة العنكبوتية وابدأي منها شوي شوي وراح تكونين مجتمع الكتروني ستفتخرين به وخاصة لو كنت ناوية على خير ونشرتي ها الخير من خلال الانترنت ...أعتقد انه راح يوصل أسرع من الواقع

أتمنى لك الخير

__________________
الظلال تمد ايديها لنا !
هل يا ترى تكون ارفق علينا من الضوء؟

الأخ الكريم / إحساس أربعيني
أنا لا اريد الخروج فقط لاجل الخروج .. ما شاء الله زوجي يطلعني مطاعم وأحيان نزهات
لكني أفتقد التعايش مع بنات جنسي .. أرد أن اقابل بنات ، حريم ، أطفال

أحس وكأني اعيش في صندوق .. لا أعرف من يعيش خارجه ولا أحد يدري اني اعيش داخله
أنا أنسانه ومن حقي اعيش كـ مجموعه
والحمدلله انا اختياراتي دائما طيبه ..
فان لم استطيع استرجاع الماضي الجميل .. ع الأقل أصنع حاضر جديد يفيدني لمستقبلي

عرضت لي وظيفه من خلال الحاسب لكن زوجي رفض أي وظيفه لها علاقه بالانترنت



اختي / همس
وصرنا ثنتين .. الله يكون بالعون
الله يوفقك ببرنامج الانتساب..شئ احسن من لا شئ
وعندي اقتراح بوقت اختباراتك خلي زوجك ياخذ اجازه يجلس مع الطفل
على فكره عرضت لزوجي فكره اكمل دراسه او ادرس دورات بمعاهد .. برضوو رفض
انا خايفه افقد شخصيتي الحلوه في مجتمعي النسائي لأن بدت على مؤشرات الانعزال الجبري
خايفه افقد جاذبيتي وقدراتي في المجتمع الحركي النسائي
وأنتظر معك حلول الأعضاء ..

اختي / غارقة في همي
وصرنا ثلاثه واحساسي مثل ما حسيتي فيه
الزواج اصبح عائق للطموح والابداع
لكن مو للكل
بعض البنات ما شاء الله اصبحت (فلانه) لأن زوجها شجعها وساعدها وحثها ، واهلها قريبين منها تأمن على اطفالها عندهم
وفكره نشر الدعوه بالنت عرضت على زوجي اصمم لي موقع مفيد لكنه برضوو رفض
يارب يبدل الله همك فرح وتصيرين غارقه في فرحك :14:

مشكلتي ما أحب اسوي شئ هو موراضي عنه رضا كامل
احيان يحن على يقول طيب طيب .. اقول متاكد انك راضي رضا كامل ؟ يقول لا بس شاسوي فيك
ارد اقول خلاص انتظرك لين تقتنع وترضى رضا كامل

__________________
استغفر الله الذي لا إلاه إلا هو الحي القيوم و أتوب إليه

انا بصراحه
بلنسبه لي
انا
زوجي مو عائق لكن
ولدي الله يسعده هو العائق بسب صغر سنه ...عمره سنه و8شهور والعائق الاخر
المكان الي انا فيه ...هو العله كلها ....
لكن وش اسؤي اصبر مع زوجي واتعايش مع الوضع لكن مااتحرك !!لا والله يؤفقني ويقبلوني باذن الله ..
واما انتي ماشاء الله حاولي مثل ماقال الاخت غارقه في همي
او اذا انتي طباخه ماهره فااستغلي هالشيء
وابدعي لك وسؤي مشرؤع مثل الطبخات الي نسمع عنهم
او توظفي وجيبي شغال ومالك الا اقناع زوجك بهلشيء .....
او اقلها تسؤي مثل ماقالت الاهت غارقه في همي وش سبب رفضه بلعكس !!هو اريح لك وله وتكونين بلبيت.

أختي الكريمة بتلات ورد ...

أعتقد زوجك يمر بمرحلة شك أو عدم ثقة والسبب فيما أظن للكلام اللي يسمعه من المجتمع اللي حوله أو هو بطبعه شكاك أو يخاف عليك أكثر من اللازم و أقصد من خوفه أنك تتأثرين بالحريم اللي تخلتطين فيهم و هذا طبعا غير صحيح ما دام أنك كما تقولين إختياراتك دائما طيبة و حتى من إسلوبك في عرض موضوع يدل على نوع شخصيتك الطيبة والفاهمة و أيضا الذكية .. كما دكرت لك في مداخلتي الأولى تكلمي معه بالوقت المناسب و بهدوء و أقتعيه بحاجتك للصديقات من بنات جنسك ، و حاولي أنك في البداية تكون جمعاتك عندك في المنزل و حسب ظروف زوجك من كل جهة و إنشاءالله يقتنع الزوج و يغير من بعض قناعاته اللي أعتقد أخذها من المجتمع اللي حوله ...

__________________
يموت الشجر واقف و ظل الشجر ما مات رياح الدهر تصرخ وهي تجرح جنوبه

هلا همس ..
انا زوجي يحب العلم ويشجع خواته ولكن يخاف على انا من براا البيت مع ان مافي مبرر
لما اقوله ابي اجتمع ببنات اتسلى يقول انا اصير لك الدنيا كلها اسليك
شكلنا بننتظر لين عيالنا يروحون المدرسه ونصير نتعرف على امهات اصحابهم
ونحضر مجلس الاماهات وحفلات التخرج ..... الله يلحقنا بس
شكرا عزيزتي

الأخ / احساس اربعيني
هو ابدا انسان مو شكاك طيب ودائما يفترض حسن النيه وماعمره فتش بنية التجسس علىّ
لكن فعلا مثل ما تفضلت يخاف على اكثر من الازم ..
يعني مرا كنا بشاليه وكنت باروح انصح وحده طالعه بدون عبايه الله يهديها
قلت بروح اتعرف عليها وانصحها مسك يدي وقال بحدة صوت لا .. انا زعلت
قلت ليش ؟ قال اخاف تقط عليك كلمه تزعلك ترا البنات هنا قوايا .. قلت وانت جديد ما تعرفني ؟
اكيد انا باسلوبي ما باعطيها فرصه تكلمني بسوء ..
وزوجي دايم يقول اهلي يعرفوا يردو وياخذو حقهم ويردو بدل الكلمه عشره لكن انتي مسكينه ضعيفه
(انا جايه من منطقه اهلها هادين ويستحون الى منطقه متفتحه واغلب حريمهم قوايا)
وفعلا اتفقت معه اعزم زوجات اصحابه .. ولكن اصحابه كل اشوي ياجلون الموضوع واصلا ماعندي ارقام زوجاتهم
الله يسهل وجزاك الله خير

__________________
استغفر الله الذي لا إلاه إلا هو الحي القيوم و أتوب إليه

مالقيتوا لي حلول ... !
هل لاني استفذت عليكم جمع الحلول ولا ايش ؟ : (

بس حبيت اقول انه
طبعا جاتني فتره بس اقول قدامه انا تغيرت اي وحده تفكر تغلط على من برا اوقفها عند حدها ...
طبعا كلام مجرد تردرد كلام بس عشان اوهم عقله الباطني بس مافي فايده
وحاولت البس ملابسي الرسميه واسوي عرض واقدم دور تمثيلي وابين باخره اجابيات لو سجلت ادرس بمدرسه
وجات فتره كنت اقول والله شكلي والبس عباية ع الكتف مثل فلانه وفلانه على اساس ان تاثرت بهم وابي صديقات عشان نحمس بعضنا بعض ع الخير ..
هو مبسوط اني غير اهله في اشياء كثيره .. وخايف على بس لدرجه طفشتني
يعاملني كطفله يخاف على من برااااا البيت والله مو طبيعي
مع اني فاهمه وواعيه مافي مجال احد أو وحده يخدعني او تخدعني او يغلط على باذن الله
حتى اهله ما اروح لهم إلا لما هو يصير ببيتهم .. يقول يخاف احد من اهله الرجال شوفني او يقول عطينا بنتك نسلم عليها مع انه يدري اني ما ارد على رجال غريب حتى كلمة شكرا استحي اقولها وفعلا ثلاث او اربع من اهله شافوني بس كلا الغلط منهم هم يدخلو يقولو نحسب مافي احد
يقول اعرف اقرباي عيونهم طويله الله يهديهم .. تخيلو صرت لاجيت اكتب ورقه اعلقها ع الباب يوجد نسااااااااء بالداخل وهذي طول الوقت معاي بشنطة الخروج

هو امس عشان تركني فالبيت لحالي اكثر من 12 ساعه قضاها شغل وتسليه مع اصحابه تفرجة كورا لان ما عندنا هالمحطه اللي تنقل هالمباره رجع سوا لي العشا بنفسه اول ما دخل .. لانه مفلس ماعنده فلوس وحب يريحني لانه حس انه تركني فتره كبيره اكلم الجدران

هل اصمم واقرر واجبره ينفذ حتى لو مارضى رضى كامل .. يعني بعد ما اختار لي دوام(مثلا تحفيظ او نادي او دراسه او تدريس) مصيره بيقتنع بالامر الواقع وتعود على طلعتي

............. يارب

__________________
استغفر الله الذي لا إلاه إلا هو الحي القيوم و أتوب إليه