السلام عليكم اخواني.. وكل عام وانتم بخير
اشتقت لكم بعد طول غيابي
وكنت في غيابي مستقره نوعا ما
وكنت اعتقد ان حياتي بدأت تتعدل
لاني اصبحت حكيمه وهادئه في اي خلاف
لكن اكتشفت ان زوجي كما هو لم يتغير
وربما زاد للاسوا
في ثاني رمضان حصلت بيني وبينه مشكله
بسبب اني دخلت الغرفة العصر
وكان يقلب في جواله
وقلت له بهدوء: اذن العصر وقرب المغرب
لانه لم يصلي الظهر ولا العصر
هنا قام وثار وانتفض وصرخ علي
قال: ملقوفه ماطلبت منك تعلميني الخ الخ
وانا سكت ورحت المطبخ اعمل الفطور
واذن المغرب وافطر هو وانا بس اخذت تمره
وقمت اصلي ولا كملت اكلي
وبعدين رجعت المغرب اغسل الصحون
دخل علي وهو متوتر وقال: متى تتركي حركاتك؟
قلت: اي حركات؟
قال: انك تصحيني وتذكريني بالصلاة
قلت: اوكي اسفه حقك علي
علما باني ماذكرته بالصلاه من شهور والله العظيم
قال: انتي ماتفهمي ولا تعرفي نفسيتي
واستمر يصرخ وبنتي جنبي ماسكه ملابسي وخايفه
ويقول: منشغله بالمطبخ.. من زين طبخك
ماعمري اكلت منك الا السم.. قارفتني بعيشتي
انا هنا وصلت لاخر حد بالصبر
وصرخت: خلااااااص اسفه اسفه اسفه
اخذ الصحن وكسره بوجهي
وقال: ترفعي صوتك علي يا وقحه!!!
تركته ورحت الغرفه ابكي وانا ضامه بنتي
لحقني وهو معصب وقال: الحين اقهرك
واتصل على امه
وجلس يسبني!!!!
يقول: فلانه قارفتني وتعبت معها ولاتحترمني
وهو كذااااب
قال: هي مو متربيه و منكده عيشتي
وادعى اني ماديه واتهمني اني ادور المشاكل
وقال اني مقرفه ووقحه
وجلس يمن بكل رياله صرفه علي الخ الخ
انا تركته حتى ما اسمع باقي كلامه المهين
لكنه ركض وراي وضرب رجلي بالباب بقوه
انا هنا بكيت وطلبت الطلاق
ضحك وقال لامه: ها يمه ايش رايك اطلقها؟
هنا تعبت.. جلست استغفر وفتحت الشبابيك
حتى اسمع صوت اذان العشاء..
وكنت اقرا قران على راس بنتي وانا ابكي
وهو قفل من امه ورجع لي يهاوش ويصرخ
وكان يتكلم وهو رافع شبشب الحمام بيده
وقال لي كلام بشع جدا
بعد ما اهاني وفضحني عند امه
وكنت اذكره اننا بايام فضيله والناس تصلي
وهو يسب الدين واهله ويسبني مع بنتي
وهدد انه يفطرني كل رمضان ويخرب علي صيامي
كان زي الوحش
دقيت على والدي وطلبت يجي ياخذني
وكان منصدم ومتضايق.. لكنه عارف تهور زوجي
وارسل اخوي ياخذني
طلعت انا وبنتي بالبيجامه وشنطه صغيره
رحت بيت اهلي وانا مكسوووووره
سالوني اهلي عن السبب
قلت لهم صار بينا خلاف تافه واتصل شرشحني عنذ امه
بدون ما اخوض بالتفاصيل
ووالدي انفعل جداااااا وحلف ما ارجع له
قلت له اني طلبت الطلاق قبل اطلع.. وهو كان يستهتر بطلبي
قال والدي: بيطلقك غصبا عنه..ولو هو رجال مافعل كذا
من يومها وانا ببيت اهلي
ما ادري عنه ولا يدري عني
لكن ام زوجي اتصلت امس
حتى تأكد لي ان مالها علاقه باللي صار
وطلبت اني ما ادعي عليها برمضان
قلت لها قدرك عالراس وانا اعرف انك بريئة من حركاته
وبينت لها اللي صار بالضبط ونفيت كل كلامه
وهي قالت من حقك تزعلي لكن لاتفكري بالطلاق
وطلبت مني اعطيه فرصه ثانيه لعيون بنتي
وانا قلت لها اني عطيته مليون فرصه وفرصه
قالت لي انه ندمان وتعبان..وقالت لي فكري برواق وقفلت
للعلم ان تصرفه هذا باهانتي عند امه كرره لثاني مره
وسبق ان فعلها قبل 6 شهور بسبب خلاف تافه بينا
وتناقشنا وقتها ووعدني مايكررها وانا سامحته
واهلي ماعرفوا باي شي صار وقتها
والان يكررها بشكل ابشع وبكلام اقوى
مو كافي متحمله جبروته علي وتهوره معي
راح يفضحني عند اهله حتى يكسر عيني
وام زوجي مهما كانت طيبه الا انها اكيد بتشيل بخاطرها
وبتتوقع مع الوقت اني فعلا منكده على ولدها ليل نهار
شوه صورتي ولا احترم اي عشره بينا
حسبي الله ونعم الوكيل
04-07-2014, 07:47 AM
ضوابط المشاركة
العرض العادي
