السلام عليكم
موضوع وردة اثار شجوني واحيا الذكرى الاليمة..
قبل سنة
كنت في شهري الرابع
كان وحامي صعب وقاسي
وعلى زوجي منه نصيب
كنت اجاهد نفسي ومابين له اني اقرف منه او انه يسبب لي الغثيان
ابتسم واسولف وكأني مااحس بالوحم
من مبادئي الخلق للخالق
لذلك ماكنت افتش ورا زوجي ولا انبش
وزيادة ثقتي فيه عميااااااء
واذا قريت ان الرجال كلهم خونة..اقول مستحيل ع الاقل اللي عندي مستحيل يسويها..
بيوم من الايام
كان يتوضأ لصلاة العصر
جته رسالة
كأنه استغربها
قال مين هذي وقرا علي الرسالة
مضمونها كأنه وحدة غلطانه تكلم صديقتها
انا تجاهلت الموضوع خصوصا انه قراها علي يعني واضح انه ماباله هالامور
مر اسبوعين
عطاني جواله لضروف معينه
الا الاخت مازلت ترسل وباليوم من 2الى3رسائل
بس من 3ارقام بس نفس الاسلوب والطريقة
رحت مثل المجنونة للصادر الا مافيه اي اتصال منه
كبر بعيني
ولو كان قدامي وقتها حبيت راسه
قلت له اتصل عليها ابلغها انها غلطانة
قال ارسلت لها بس استمرت
قلت ع الاقل اتصل ع الهيئة يتفاهمون معها
قال خير
طبعا سبحان الله
بهالفترة
فيه واحد مزعجني بشكل مو طبيعي
رديت عليه وقلت غلطان قال لا ابي اسمع صوتك!!
هزأه زوجي
صارت تجيني اتصالات كثيرة وارقام مختلفة
ولا ارد
المهم
بعدها باسبوع
كان نايم
قلت اشوف وش صار عليها
اخذت الجوال
الااخر رسالة ليش ماترد وتريحني<<<حسبي الله عليها الله لايريحها
رحت للصادر
المفاجأة زوجي متصل 4مرات بايام متفرقة مرتين بس ردت ووقت المكالمة بالثنين ماتعدى4دقايق
بهاللحظة دقات قلبي صرت اسمعها
صرت ارتعش
ولا اشوف من الدموع
حطيت يدي على بطني وانحنيت من شدة المغص اللي حسيت فيه كأني بولد
ومع الدوار جلست وصرت احوقت واستغفر
ومن غير تفكير
مسكت الجوال ورميته بكل قوتي وتكسر
انهرت تماما ماادري وش اسوي
ابوي رجال معروف ماابي ينقال عننا شي
بنتي تناظرني نظرات خوف
رحمتها ورحمت سمعتها
وقتها قلت خلااااااااص
لا زوج ولا زواج انتهينا
اخذت اغراضي
وكتبت لزوجي
انسى ان لك زوجة اسمها نبض
وروح للرخيصة اللي فضلتها على اسرتك وعرضك
ولا استحيت من ربك قدامها
وكلام نسيته كنت ببين له اني اكتشفت
وطلعت من البيت
طبعا رجعت لعيون عيالي بس
ابوي كريم وانا موظفة
بس من يضمن الدنيا
خصوصا انه عاهدني انه مايرجع
جلست 5شهور بعدها ابكي اذا ناموا
جرحني جرح صعب يندمل
الثقة خلاااااااص راحت وماقدرت ارجعها عجزت والله
احاول اعيش حياتي طبيعي بس اي حركة منه ترجع هالشريط قدامي
مرة عند اهلي اتصل علي رقم مجهول وقرصني قلبي وتذكرت هذيك الايام
حاليا ماافتش ولا احاول كافي الثقة تزعزعت
بس جواله دائما بين ايديني ومعطيني رقمه السري
مرة فتحت حسابي بالفيسبوك
لقيت رجل طالب الصداقة رغم اني كاتبة مهتم بالنساء
المهم تأففت وقلت هالعالم ماادري منين تفهم
قال ليش
وقلت له السالفة
وهو ماعنده حساب
وتحمس يسألني كيف طريقة الحساب وكيف هذا طلب صداقة!
طبعا فتق الجرح القديم وتهاوشنا وزعل لما اتهمته
وذكرته بكلامي ايام المشكلة انه الافضل ننفصل لان الثقة خلاص راحت
مازلت غير واثقة منه
اخاف عليه مثل خوفي على اطفالي
مرة شافني ابكي بالليل قال اوديك للمستشفى؟على باله ولادة
قلت له لا بس تعبانة من ذاك الموضوع
قال الله المستعان انا نسيته!!
اكيد بتنساه
وتقارني بك!!
فكرت بالانتقام
بس استغفر الله
والله يثبتنا
اكتب لكم والدموع تملأ عيوني
لاني بكل وقت اتوقع رجوعه لهالدرب
وانا مااقدر اتحمل
مااحب تكرار السالفة
بس ودي يطمن قلبي ويريحني
ليت الخاين يحس بالجرح اللي يسببه لشريكة حياته
وتكفون
اللي براسه لعب ياخذ من ثوبه كل واحد يلعب وراء الثاني
لاتعذبون ناس مالها ذنب
يااااارب
اهدي زوجي وابعده عن السوء وأهل السوء وجعله عفيفا صالحا يامن بيده قلوب العباد