السلام عليم ورحمة الله وبركاته
اشكر لكم حرصكم وتفانيكم في مساعدة بعضكم البعض
اتابعكم على طول
انا كتبت من قبل عندي مشكله مع زوجي بموضوع الانجاب .
طبعاً الحياة مو سهله ولا سلسة وانا مريت بمشاكل فترة مع زوجي لحد مافهمنا بعض لانه اثنينا شخصياتنا تتشابه كثير فصعب الاتفاق .
ومع كل هذا حاولنا وسعينا وما هدمنا بيتنا بالعكس جالسين نعمر بيت جديد /فهمنا بعض اكثر وتمسكنا في بعض رغم كل شي .
انا تزوجت زوجي ورضيت فيه بالعكس اخترته من بين خطاب كثير وهالشي صار بقناعه مني وبتساهيل من رب العالمين وانا عارفه انه معه مشكله بسيطه بالانجاب وتعالج منها وصارت اموره تمام والدكتور اعطانا فرصه.
ولما ماصار حمل بعد سنه من الزواج بديت لي السنه الثانيه والنص الان عملت 4 مرات عمليات وكلها تفشل مع انه يكون كل شي ممتاز بس بالعمليه الاخيره كانت صدمتنا انه عينة زوجي كانت تعبانه والدكتور وصف له فتامينات وقال هالشي ممكن يصير لاي شخص وممكن يتحسن / العينه انتاجها يتبدل كل شهرين فطبيعي .
وطلبت من الدكتور يعمل تحاليل زيادة فعلا عمل لي تحاليل كثيره لكل شي كلها سليمه الحمدلله الا تحليل طلبته كثير من الدكتور وماكان راضي كان يقولي لازم يحصل فشل اكثر من مره هو تحليل الاجسام المضادة وللي ما يعرف بالضبط وش يعني هذا طبعا هي أنواع في الجسم انا اللي كنت ابيه محدد وهو الاجسام اللي ممكن تقتل الاجنه او تقتل عينة الزوج . وبالضبط هذا اللي طلع معاي قلبي كان حاس وعلاجه هو اني اعمل عمليه وتزيد الادويه والابر وابقى على الابر تقريبا 11 شهر كل يوم .
انا انهرت وتعبت بس شكرت الله اني عارفه وش مشلكتي الطبيب يقولي عندك جيش يحميك ويقتل أي جسم غريب يدخل هالشي كويس لمناعتي بس مو كويس في موضوع الانجاب طبعا
قريت كثير وفهمت وعرفت كل شي بحر غزير وينتظرني شي متعب ومؤلم لكن الامل داخلي مامات لحظة وحده والحمدلله انه قادرين مادياً .
لكني تعبانه وداخلي احس نفسي خاويه مامني فايده وش فايده كل شي سليم واغلى شي تتمناه أي زوجه صعب يتحقق حلمت كثير طول عمري اللي وصل 32 كيف بخبر زوجي وكيف بفرح لكن هالشي ضاع مع كلام الدكتور .
زوجي لما عرف مشكلته قبل كم شهر كلمني لو ابي انفصل واشوف حياتي بس انا قررت أعيش معاه واسعى بكل قوتي بس ابي منه ما يجرحني بخيانه بيوم . وظلينا هالفتره ولما عرفت بمشكلتي كان واجب علي اني أيضا اخيره بين انه يعيش معاي او يشوف حياته صحيح هو أيضا حاليا عنده مشكله بس وقتيه وممكن اذا تزوج غيري وعمل عمليه تنجح . لكنه زعل مني كثير وقالي انت قبلتي فيني وانا عندي مشكله وعرفتيها حتى قبل عقد القران ورضيتي تبيني اليوم اتركك وانت زوجتي وسعيتي علشاني وتعبتي سنتين عمليات ومستشفيات . والحين له كم يوم قبل ما ينام يقول ليه قلتي كذا تبيني اتزوج واتركك ماابي اسمعك تقولين هالكلام .
المفروض نرجع نعيد العمليه بعد 3 شهور تقريبا وكلها راح تكون تجارب ومحاولات لحد ما تضبط جرعات الابر المناسبه وتنجح العمليه للأسف الدكتور يقولي نسبة الخلايا والاجسام المضاده عاليه 5 اضعاف النسبه الطبيعيه تقتل كل شي كيف وعينه زوجي من الأساس تعبانه .
انا مازلت ماافكر ماابي احرم زوجي انا رضيت بنصيبي بس هل أحاول مرة مرتين واذا ماصار اخليه يشوف حياته ؟؟؟ وارجع بيت الوالد وارضا بحياتي كذا طبعا لاني مستحيل اتزوج مافي شخص بيقبل مشكلتي الوضع صعب / ويحتاج مبلغ كبير وانا مستحيل ماابي بعد اخوض هالتجارب جدا متعبة .
وش تنصحوني مؤمنه كثير بقضاء الله وكتبته وصلاحه وخيره لي لكني تعبانه كثير بين الحلم والاماني وبين الناس ونظراتهم وكلامهم وهل الأفضل اترك زوجي يشوف حياته او لا ؟ وللعلم انا مااقدر أكون زوجه ثانيه وانه زوجي يتزوج وانا اظل معاه الناس قدرات وانا مااقدر اتحمل هالشي ابدا.
تم تعديل العنوان ليتناسب مع المضمون