السلام عليكم ورحمة الله وبركاته

بتكلم ب اللهجه العاميه عشان اوصف المشكله كما هي


< والله إني تنهدت

المهم والأهم انا عندي بنت عمرها 4 وعليها
وولد عمره 8 شهور

طبعا راح تستغربوا انه نقيض للكلام اللي في قسم المتزوجين
بس انا اضطريت للتمويه عشان الناس المتطفله اللي من حولي




ماعلينا


بنتي ماشالله ذكييييييه وسريعة الحفظ جميله ولماحه هادئه
نوعا ما

يعني ماعندها شقاوة العيال تنط وتخرب وتكسر

عندها مشكله صوتها عاااالي والله ان صوتي اهدأ من صوتها :|
واتعب لما تكلمني وانا دايخه ولا ابي انوم اخوها وهي ماخذه راحتها
ع الاخر

ينام اخوها وتصحيه بكلمه وبكل بسااااااطه يروح تعبي كله


اتغاضى عن هذي لانها مشكله بسيييطه واتقلب عليها في كثييير من الاحيان
لاني افهم فيها انها بنت ولازم يكون صوتها هادئ ودلوعه ماتتكلم مثل الاولاد

واقول لها انتي فراشه انتي كذا واعلمها الاشياء الرقيقه بس ماحولك احد


المشكله الكبيييره هي بكاها وعنادها
عنييييييده يعني اللي براسي يصير ولا تجيبوا لي بديل قريب منه وبرضو
تضل تتذمر

مثال : لما اشيل الآي باد عنها عشان تنام تجلس تبكي ابي سبيس تون

عندها هوس افلام كرتون بشكل مو طبيعي
تصحى تنام هذا كله مربوط ب الاي باد

إذا شفتها جايه تكلمني ولا تسوي شغلات مالها داعي اعرف ان الآي باد
خلص شحنه ومليون مره اعلمها تشحنه لكن خيييره

لانه اذا طفى تمل وتنام


ايام اشيل عنها الايباد لأني اخاف عليها وعلى صحتها العقليه ابي اعطيها
هو ساعتين باليوم بس
لكن تطففففففش حياتي تسوي شغلات مستفزه


هذا شي
الشي الثاني كل شي تقوله ببكاء ماعندها اسلوب للتفاهم ابــــــــدا
طبعا هي فاهمه
اوقات تكون رايقه تقول ماما صح انتي تحبيني ؟
ايه
صح انا بنتك ؟
ايه < طبعا عارفه انها تبي تطلب شي

صح الام لازم تسمع كلام بنتها < هههههههههههه
لا البنت تسمع كلام امها

تجلس تبكي آآآآآآآآ < الآآآآآ هذي اللي تستفزني اسمعها اكثر من اكثر شي في العالم

ليش اسمع كلامك وانتي ماتسمعين كلامي !
اقول لها اذا انتي تقولين شي صح انا اسمح لك به مو اسمع كلامك

تقول طيب انا ابي كذا ويعتمد اوافق او مااوافق على حسب الشغله

طبعا لو ماوافقت الآآآآآآآآآآ هذي مستمره إلين يرحمنا ربي

اقول لها ماراح اسمعك إلين تستكين من البكاء ماافهم وش تقولين
ابدا ماحولك احد

ومتعلمة لي هالشهر تطقطق برجليها وهي تبكي مثل ابو سنه ونص


صياحها وبكاها يستفزني وامسك اعصابي لكن احيان انفجر

انا عندي كتب كثييييره وعلى طول اقرا وابحث عن التربيه
واعرف ان الضرب آخر وسيله للعلاج وماهي علاج اصلا
يعني ابغض الحلال عند الله الطلاق



بس خلاص ابي ابرد قلبي


طبعا السبب الرئيسي هو ابوها لانه دلعها يوم كانت صغييره
آخر دلع وكنت اقول له لاتدلعها لانها يوم تكبر وتتعود
ماراح ترضى وراح تكون انت المتضرر الاول من هالشي

كبرت البنت وصار مااااااااااايتحملها شوي يهاوشها ويضربها بشويش
وهي تنفجر من الصياح او يجلس يتحايل عليها عشان يريح راسه هو



البنت حساسه جدا
وتربط الامور ببعض وماتنسى شي

مثال اقول لها لاتسوي كذا
وتقول ليش انتي سويتي كذا < قبل مليون سنه


اعرف الان الام هي القدوه لكن احيان نسوي اشياء
خارجه عن ارادتنا

انا اعرف اني لازم اربيها بعيييد عن القسوه وبعيييد عن الدلال
في المنتصف

لكن انا احاول اهدي اعصااااابي عشان اثبت الميزززان بالشكل الصحيح

ضغوط البيت وتربية الصغير ومسؤليات الزوج
كلها ماتتحمل اني اكون راااايقه لبكاها كل لحظه واجلس افهمها



بنتي الحمدلله عندها مواهب عقليه كبيييييييره ابي استغلها بالشكل الصحيح
لأني واثقه انها بتكون شي كبيييييييييير في المستقبل
لكن تصرفاتها تقتل كل طموحاتي تبعدني عنها في ضل تعبي مع اخوها



حساسه جدا يقنعها كلام صديقاتها

مره قالت لي ماما ابي روج
قلت لا عيب بس في العرس يحطون الروج
قالت ابي اصير جميله
قلت لها انتي جميله مو لازم روج يجملك
قالت لا الله ماخلقني جميييله :| < صدمتني على كل ذا الجمال
قلت ليييييش
قالت فلانه تقول شعري كشه

مشكلتها عايشه في محيط اقارب دماااااار

قلت لها ياحبيبتي انتي جميله ومرتبه والروج هذا نحطه بس عشان
نعلم الناس اننا فرحانات في العرس مو عشان يجملنا

بعدين هذي فلانه اللي قالت لك ان شعرك كشه هي تغااار منك لانك
اجمل منها وتبي تقول لك كذا عشان تصدقين وماتهتمين في نفسك

سكتتت

موقف ثاني قالت لي
ليش تصرخين علي انا ماتكلم كذا لازم نتكلم بهدوء ونتفاهم



تقول اشياء تذهلني وتذهل الناس من صغرها


البارح كنت في بيت ناس واكلت وقلت لها قومي غسلي
الا تعالي معي وآآآآآآآآآ < استفزاز رقم 1

بعدها طلعت للحوش وقلت لها وين جزمتك قالت مابي ادورها
زحمه خلاص اشتروا لي ثانيه
قلت لا مافيه
آآآآآآآآآآآآآآآآ< استفزاز رقم 2

امي نادتها روحي تغدي مع جده جلست تطقطق برجليها
آآآآآآآآآآآآآ < استفزاز رقم 3


وانا عندي اخوها وتعبانه اخر تعب

يابنت الناس اسكتي خلاص لجيتي العالم
ابد ماحولك احد


للمعلومه هي مصادقه بنت تو هالشهر وهي اللي معلمتها هالشي الشنيع

بكاها كان اخف شويييي من كذا وماتطقطق برجليها وماتتعمد تبكي قدام الناس

اضطريت اقطع علاقتها بها


المهم

انا يوم هي تلاحق فيني في بيت الناس وتبكي رحنا عند المغاسل وكانوا قريب منا
نوعا ما

حريم بككككككككككككت وجنيت وضربتها بالشنطه :|

مااااااااااااني مصدقه اني ضربتها واني صرخت عليها
كيف وصلت لهالدرجه

كنت دايما اتحملها واهاوش صديقاتي لما يصرخون على اطفالهم قدامنا واعلمهم ان هذا
خطا


حتى وحده من الحريم قالت لي بشويش مو قدام الناس
قالت لها صديقتي انعكست الايه هي اللي كانت تقول لي قبل ههههه



ابعد ماضربتها بكت وقلت لها لو تبكين زياده بذبحك


المهم رجعت البيت وانا تلفانه اعصابي اصلا ماتغديت بيت الناس
غديتها وبس

قلت لها مافيه اي باد وتقبلت العقاب برضا عشان اسامحها بعد
ماحست بخطاها

وكل مااتذكر اني ضربتها احس بتأنييييييييييييييب الضمير
واتخيلني وحش كاسر

قلت لها في الليل تعالي
انتي زعلتي عشان انا ضربتك قالت لا
بس الشنطه فيها اشياء كثير وعورتني


:|




تعبانه نفسيتي اني سويت هالشي وموقادره انساه
كيف هي !!!!



احيان نغضب ونكتم ونكتم وفي الاخر ننفجر
يعني لو انا نعبر عن غضبنا كل مره يمكن اهون


مره قبل نفس الشي لي شهور كاتمه
وكنت امشط شعرها تشيله من يدي وتروح للآي باد
ولاكأني قدامها
رحت شديت شعرها وصارت تبكي
على طول حسيت بتأنيب الضمير قلت لها تبكين لانك زعلتي اني شديت شعرك
صح
قالت لا تخاف تقول انها زعلت مني
قلت الا زعلتي قالت لا بس قلبي هو اللي زعل :|



انا اعرف ان البكر هو اللي يمشون الاطفال كلهم على نفس سلوكه
ابي اصلحها قبل تدمر الذريه كلها ههههههههههه


مشكله اخرى

ماتدافع عن نفسها الا على الناس اللي تبي ومتى ماحبت
عادي تجي بنت ام سنتين تلعب فيها لعب
واحيان تروح تضرب ولد ابو خمس سنوات


ومتعبه نفسييييييييييييتي بهالشي احيان ابكي وانعزل عن العالم الخارجي
اقول لها انتي عندك يد تضرب مثلهم تقول اخاف يضربوني

وتخاااااااف لما يكون الطفل معاه امه حتى لو جيت لها وقلت لها اضربيه
وامه قالت لها اضربيه

تجلس بس بكا وآآآآآآآآآآآ



واحيان يضربها واحد بعمرها او اكبر تروح تهلك حيله بالضرب

يعني على الناس اللي تمون عليهم او متى ماسمح لها مزاجها






عوضا عن هذا كله وادري اني تعبتكم وانتم تقرون
انا نفسي تعبت وانا اكتب ههههههههه



دخلتها الروضه وعمرها 3 سنوات وشافها يوم زميلها بالروضه وهي تدخل الحمام
وجلس يعيب عليها عند الاطفال انه شافها
وتعبت نفسيتها وصارت تتبول في ملابسها وانتم بكرامه وماترضى تدخل حمام الروضه
وتتبول بالسياره او على باب البيت

يعلم الله اني عااااااااانيت من هالشي ووكلمت المدرسه وقالت مافيه احد يعيب وتبي تنتبه لها

رغم انها عشان تدخل الروضه تعلمت ع الحمام في اسبوعين من حبها لها وللتعلم
صارت حتى بالليل تتبول وهي نايمه من يومها


تشفى احيان من هالمرض واحيان لا



سنه على هالسالفه تروح وترجع يمكن في الاوقات اللي تتعب نفسيتها فيها
من امس تبولت 4 مرات كل مره تنام فيها تبول حتى لو تروح الحمام قبل



تجلس تقول انا اتعلم بس ابول وش اسوي !!!



احضنها وألعبها واحاول اريح نفسيتها من الاعماق لانها ضاهريا مرتاااااحه
بس هالمشكله مالها تفسير ثاني لاني اقومها بنص نومها عشان تروح الحمام ألقاها
خلصت وانتهت


وخذ من الصياح اللي قبل السباحه
تعببببببببببببت انهد حيلي




معليش طولت عليكم بس حبيت انقل لكم المشكله من كل نواحيها

صراحه معاك حق احيانا العاميه افضل بتوصيل المشكله والحل ...
انا ماعندي خبره كبيره
وبنفس الوقت انا من ناحية الاعصاب صعب اتمالك نفسي
اصلا معجزه لو قدرت امسك نفسي واضبط اعصابي

انا احب بس اقولك نصيحه .. وهذا الي خلاني ارد عليك
نصيحه سمعتها من دكتور جا مره في برنامج سعودي الجنسيه

قال كلمه بسيطه _ يقول _ لازم الاب او الام اذا احد فيهم شاف خطأ من احد الاولاد
وصار انفعال واتنرفز .. لازم يتمالك اعصابه مدة ساعات او نصف يوم
ومن ثم يقرر العقاب .. لان الانسان بلحظة الانفعال وقت مايكون الموضوع ( طازه )
ممكن يصدر عقاب خطأ بحكم عصبيته
زي ضرب الوجه فيه كسر للنفس واهانه
حتى الحيوان اكرمك الله ماينضرب على وجهه
او ممكن يكون ترهيب او ضرب بعصايه وسلك زي مايعملوا بعض الناس
او ممكن يكون احراج هالطفل بين الاطفال وتنعكس على نفسيته وشخصيته

لازم ماتصدر اي عقاب وقت المشكله
بعد ما تهدأ ثورة الاعصاب او تروح النرفزه تحدد عقاب
والعقاب اولا مايكون فيه حرمانيه مثل ضرب الوجه
ومايكون عقاب خارج عن المألوف والموضوع مايستاهل كل هالعقاب
لازم من التفكير قبل العقاب .. شيء ضروري

..

والله يخلي لك بنتك وابنك
موفقه خير ان شاء الله

كلامك صحيح
دايما كنت اقرا اية الكرسي وقت اعصب

انا احس اني البارحه خارج النص
يوم ابي احـــــــذفه من عمري


يعني لو ان جاها عمى بسم الله عليها !
ولا صار فيها شي !!


للأسف انا الآن اشوف نفسي مثل الحريم
اللي كنت اشوفهم قبل واشمئز من تصرفاتهم :|



يمكن اجتمع علي اني مواصله وسهر وتعب !


سبحانك لا اله الا انت اني كنت من الظالمين

وعليكم السلام ورحمة الله وبركاته
ما عندي خبرة لكن بعطيك نقاط وطبقيها؛ والله يخلي لك بنتك ويصلحها.
لا تحولوا عناد الطفل في موقف معين إلى تبادل للعناد ومحاولة متبادلة بينكم وبينه للنصر، بل تجاهلوا عناده واطلبوا منه شيئا يحب القيام به

إظهار المزيد من الحب للأطفال أمر في غاية الأهمية حتى يشعر الطفل بالأمان والانتماء والمساندة، وهي مشاعر لازمة لنمو نفسي سليم

من الضروري أن تكون الأم متوافقة مع الأب في سلوكها مع الأطفال، وذلك بعدم تجاهل أي قرارت يتخذها الأب أو التهاون في تطبيقها، والعكس صحيح

العفو عن أطفالكم.. ومقابلة مشاغباتهم وإزعاجاتهم بمزيد من الحب والاحتضان هو الوسيلة الوحيدة لتهذيب سلوكهم بعيدا عن الصراخ والضرب

تميزك الحقيقي هو في تميزك بتنشئة أطفالك على هدي الإسلام وشريعة الرحمن.. فاحرصي على تحفيظ أطفالك آيات من القرآن الكريم ترسم لهم طريق حياتهم

لا تعاقبوا أطفالكم عند الغضب.. بالقول أو الفعل.. ولكن: ابتعدوا عن دائرة الحدث، وعالجوا غضبكم، وفكروا وتصرفوا بحكمة لمعالجة الموقف

الطفل كتلة من المشاعر والأحاسيس ينبغي الحفاظ عليها، وتوجيهها باللطف والإقناع، بعيدا عن رفع الصوت أو الضرب ..

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.

الله يعينك ويسخرها لك
ياقلبي الكلام سهل بس التطبيق صعب عندك انا ولدي صغير توه كمل سنتين وكم شهر بنجن جاب لي كل العقد مريت بتجارب كثيره معاه تصدقين كنت اضربه بشكل مجنون وبالذات يوم حملت وكان معاي مراره ولاشغاله ومشاكل بالبيت وزوجي مايعرف يعاون انهبلت وهو الضحيه

سلوكه عنيد والمصيبه اني انا عنيده وعصبيه ودمي حار اكرهه اذا صوته ارتفع او شلح شرابه او ملابسه اتوسخت او لما ياكل ويطبع الاكل بوجهه ابيه ابداا مايحوس عقدته وجننته وصار خواف وندمت لاني انا حسيت حالي مجنونه تخيلي ابيه يفهمني من عيوني يعني صار ياعمري انا اذا بياخذ شي يطالع فيني اول وهو عيونه خوف كنت اشوف وحده عيالها وبناتها مؤدبين واستشرتها لاني هبله قالت بس اعطيهم نظره تخوف ويفهمون اني معصبه واخذت هالاسلوب الاهبل معااه

ندمانه ودايم اقول للحريم انتبهو من العصبيه والله شافتني وحده بالمستشفى قالت ليش ولدك شكله خواف قالت نظراته طول الوقت عليك قالت نصيحه شجعيه خليه يلعب ويحوس ويضرب ويمارس طفولته ترى بكره بيدرس وبيدخل مع اولاد ماراح يعرف يدافع عن نفسه

والله اني انصدمت يوم قالته استغربت انها لاحظت خوفه وهو ماصلح شي بس فعلا لما يضرب احد كنت اطقه واعصب واجلس طول اليوم اعاتبه
هالحين لو يطقه اي احد مايدافع تخيلي اخوه عمره 11 شهر ويخاف منه اذا شافه جاي يمه بدون مايصلح له شي يبكي
وانا اخاف الصغير يستقوي عليه وتنعدم شخصيته

نصيحه حاوريها كثير واتخذي معاها اسلوب العقاب والحرمان من حاجه تحبها افضل من الصراخ والضرب
انا ولدي اذا ازعجني اقوله روح نام ماتجلس معانا بدون صراخ وطق واحسه صار هادي اكثر من قبل

والله يهدي عيالنا ويصبرنا عليهم يارب

تبغي الصراحة
أنا ماني شايفه اي غلط بتصرفك
انتي ام إنسانه من لحم ودم وأحاسيس وقدرة محدده للتحمل منتي المراه الخارقة اللي مطلوب منك تكوني يا جبل مايهزك ريح

تصرفات بنتك فيها كثير جداً جداً من الدلع وانتي بتعملي الصح تبغي تتلاحقي عليها قبل ما يفوت الوقت
بعض المواقف تحتاج للضرب
بدليل انه لما ما بتضربيها استمرت على نفس التصرفات وصارت اقبح لانه صارت تعمل التصرفات هذي قدام الناس مؤ بس بالبيت

طبعا أنا ما اقصد الضرب المبرح او في كل مره
بس مثلا زي في موقفكم وانتي تسرحي شعرها
هي مؤ رأضيه تسمع كلامك وتثبت عشان تسرحي لها بس لما شديتي شوي شعرها وصلتها المعلومه انه اذا ما ثبت مكاني لما ماما تسرحلي شعري رح ينشد شعري وأتعور

موقفكم قدام الحريم وصراخها وبكاها ردت فعلك جداً طبيعيه والبنت تحتاج لوقفه وقرصة إذن عشان تعمل حساب بعد كذا انه ما اعمل الحركات هذي قدام الناس عشان ماما لا تزعل

ترى المثاليه الزائدة مؤ دائماً تنفع وما تمشي على كل طفل
فيه بعض الاطفال يبغى لهم وقفه حازمه
بس أنا أنصحك انه اذا اضطر يتي تضربيها طبعا بعد ما يكون حالها زايد وتكون مصختها وطرق الترغيب والترهيب ما نفعت يكون على المؤخرة او على كف اليد فقط

الله يهديلك إياها

يا حليلها بنتك

والله حبيتها يا طعمها بس

تشبه للأمورة حقتي ف عنادها و دلعها و حركاتها

و كأنك تتكلمي عن بنتي تماما

انبسطت وانا اقرى مواقفها على قد ما انتي كاتبه و تتنهدين منها

بس انا ضحكت

برجع لك بعدين اقولك حاجات يمكن تفيدك معاها , انا جربتها مع الغزالة

حقتي و نوعا ما تعدلت شويه ..

الله يحفظها لك

__________________

‏
الوعي هو الملاذ ..

أستغفر الله العظيم ؛
( الفردوس غايتي )

شوفي يا ست رذاذ ..

انا والله احس البنات في هذا الوقت متعبين جدا جدا في التربية

يعني عناد على دلع على تقليد كله تلاقيه عندهم و العجيب ان

كل هالحركات تكون قبل المدرسة .. وربي انا لو احكيك

عن بنتي انها جابت لي الجنان في سنواتها الأولى لدرجة ان اخواني يعلقون

على تصرفاتها يقولون ذي بتدخلك الجنة من كثر ماهي الله يصلحها

تعاند وتعابط .. و ماكنت عارفه ايش اسوي معاها .. يعني ضرب

انا بالعاده ما اضرب اساسا وما أؤيده .. عقاب .. عاقبت لين دخت

صارت حتى هي تعاقبني و تعاملني بالمثل ..قالو لي تقفيل الغرفة

جربت قفلت عليها لمده خمس دقايق بس بعدين ماعاد سمعت لها صوت

خفت .. لما فكيت الباب لقيتها مخنوقة من الصياح

الله يحفظها و ربي انها تعبتني كثيير .. وكنت اجرب معها

اي طريقة اسمع عنها و اقرى كثير في التعامل مع الأطفال

ومن الطرق اللي فادت معي شوي .. اني اذا زعلت منها

اهددها بخالاتها ولا جدتها انهم يزعلو عليها و احس نفع معاها كذا

لانها تحبهم وما تبغاهم يزعلون عليها ..

وسالفه العقاب احيانا تفيد معها .. لكن الحرمان .. ابدااا

احس اذا حرمتها من شي تنقلب النتائج عكسية معها

مع ان فيه كثير ينفع معهم كذا ..

الحين بالمدرسة احس انها اللهم لك الحمد اهدا و اعقل

وكل ما تكبر كل ما تركد

لكن انتي ماشالله عليك مو مقصره الله يحفظك ..

بقولك حاجة بس .. هدي بالك عليها الآن و حاولي قدر

المستطاع تصبري عليها وتقربي منها فوق ما تقدري ..

الله يعيينك خصصي لها وقت تجلسي معها .. قد تكون بنتك

محتاجة حنانك اللي شايفته على اخوها و ابوها

احيانا ترى حركات صغيرة نسويها ما نعتبر لها .. والأطفال يلاحظونها

وبنتك زي ما قلتي الله يحميها ذكية واكيد تبغاك عشان كذا تعاندك

و تنبسط على كذا .. و لاحظي ان اخوها صغيير عنها يعني لو كان قريب من سنها

يمكن شوي تلتهي معه .. لكن هي حاطة طاقتها معك

اهم شي يا غاليه اذكرك و اذكر نفسي لا تتذمرين من تصرفاتها تراها أجر لك يوم القيامة

الله يعطيك العافية ويحفظها لك يارب

__________________

‏
الوعي هو الملاذ ..

أستغفر الله العظيم ؛
( الفردوس غايتي )

صحيح
كلامك فيه كثير من الكتب اللي قريتها



هي تستهين يوم تشوف انا وابوها نختلف في عقابها
ف اتفقنا انه لما يعاقب واحد منا الثاني مايتدخل في الموضوع

عشان ماتحس بالتراخي او انا الاثنين ضدها



لاحظت اني مااصرخ الا يوم اكون سهرانه او مضغوطه
النوم المبكر والمريح يساعد نفسياتنا على الهدوء والصبر


السنه الماضيه دخلتها الروضه بدري عمرها 3 سنوات

وكنت فاضيه ورايقه لها ماشالله حفظت 7 سور قصيره
من القرآن قبل ماتعطيهم المدرسه وخافظه الحروف كلها
وتجيب عليها كلمات


وكانت هادئه نسبيا

لكن الحين حتى سورة الكوثر ماتعرفها :|

يبي لها تفرغ





مشكوره الله يعطيك العافيه

للأسف اكثر الاساليب الهدامه لنفوس اطفالنا الترهيب سواء نظره او ضرب

تصدقين نفس الشي مره شفت بنتي غلطانه قلت لها تعالي
والله جات وهي خايفه وساده اذنيها بيدها عشان ماتسمع الهواش


بس الحمدلله اجتزنا هالمرحله وطلعت الخوف من قلبها


في اوقات تكوني هاديه وهو يلعب قولي له تعال ابي اتكلم معك

ابي اقول لك سر


وهو بيفرح لان لو قلتي له سر بيحس انك تثقين فيه وانك صديقته
قولي له انت ولدي وصديقي وكل شي نبي نقوله لبعض

صح ؟

لو حسيتي انه استجاب اسئليه هو متى يزعل منك ؟

ولا
ابدئي بنفسك وقولي له انا اتعب بس عادي لاني احبكم واحب
البابا افرح عشان انا اسوي لكم اكل وتشبعون وتكبرون

واحضني فيه خلي مشاعرك تنهمررررر عليه هههههه


يالله انت قول لي سر مثل انا ماقلت لك


وطولي بالك عليه لانه بيخاف يصارحك
قولي له انا ماحب اضربكم بس الشيطان يخلينا نسوي اشياء
مانبيها

لازم على طول نصير اصدقاء ونطلع الشيطان من بيتنا
لانه يحب البيت اللي فيه ناس مايسمعون الكلام



افضل طريقه انك تنمين ثقته في نفسه

لاعبيه وشجعيه وامدحيه عند اهلك وخليهم يمدحوه

جا البطل شيخ العشيره ههههههههههه
يالله هو بيقرا لكم قرآن



ومن هالاشياء


الله يوفقك ويوفقنا