السلام عليكم




؛



مشكلتي ببساطه اني على علاقه بشخص

علاقه مالها اي اساس وادري انها غلط من منظور الدين قبل المجتمع

ومن قناعاتي ادري انها غلط واخون اهلي اللي عطوني الثقه

صحيح انها علاقه نظيفه لكن تظل وتبقى غلط

هذي النقطه نكون مخلصين منها



بدت قصتي اني تعرفت على شخص عن طريق النت قبل سنتين ونص

كانت في البدايه فقط اعجاب بالاسلوب والكلام

ومن ثم تطورت الى حب من طرفي وكان يقول اني احبك بس كنت اشك بمشاعره لي

طبعاً يعرف عني كل شيء واعرف عنه كل شيء

وطلع الاهل البعاد يعرفون بعض عز المعرفه

انااكبر وحده من البنات واكبر مني الاولاد

تعلقت فيه حبيته يوم عن يوم اكثر واكثر واكثر

صار كل شيء هو بحياتي ومع كذا كنت خايفه مو منه خايفه من شعوره هو يحبني كثر ماانا احبه

وتطورت العلاقه طول هالفتره

كان يقول احبك وابيك زوجه لي علاقتي معك مو عابره او تضيع وقت وكنت استحي اسمع من واطلع منا

وطول الفتره اللي عرفته فيها جاني اكثر من شخص يخطبني لكن كنت ارد لاني ماعاد اتخيل حياتي الا معه

عرفته بداية دراستي الجامعيه وهو كان متخرج من الثانوي ويشتغل بااحد شركات الاتصالات علما هو اكبر مني ب 4 سنوات

قرار ان يكمل دراسته الجامعيه لكن عن طريق الابتعاث صراحه تضايقة جداً جداً ان راح يبعد عني

لكن شجعته لمستقبل افضل ووظيفه افضل قدم استقالته

وطلع يكمل خارج المملكه على حسابه الخاص

كان يقول اول مالتحق راح اجي اخطبك ونتزوج وتجين تدرسين معي هنا

لان صعب اجي اخطب وانا الى الحين اخذ مصروفي من ابوي

لكن اذا التحقت مااحد يقدر يقول لي شيء

وانا المصيبه اني عشت معه الحلم ويقول ويقول

لدرجة الاحلام اللي وصلها اسماء عيالنا

وبنسوي كذا وهالويك اند بنسوي كذا وهالويك اند ننزل لاهلك بالشرقيه

احلااااااااااااااااااام لو اقولها تخسي الافلام التركبه عندها

الولد حاسب كل شيء ومخطط لكل شيء

يقول لو جيت اخطبك اهلك بيوفقون

عاد انتي يبدا دورك قول فرصه وبكمل برا

ولو جيتي هنا ادرسي بالهجامعه وسوي كذا ومادري ايش

يعني يفكر بالموضوع

انا خايفه انها السالفه كذب لكن ليه يكذب وهو مو مطر يكذب علي ولا طلبت منه وعود واحلام زي كذا

هو اللي كان يقولها لي



الولد كبير مو صغير عمره 25 وانا كبيره 21

يعني مو مراهقين نقص على بعض في سوالف زي كذا



الحين انا مااقدر اتخيل احد بحياتي الا هو ذبحتي بكلامه صح اني ماابين له لكن داخلي اموت



جاتني اكثر من فرصه فوق الممتازه للزواج لكن رفضت حبي له وانه بيكون من نصيبي



هو مو قاصره شيء من ناحية شكل واخلاق ودين وعائله

وانا بعد مو ناقصني شيء لا شكلياً ولا اخلاق او عائله





لكن احس دايم معه بنقص انه يحسسني اني شيء مهم بالكلام

مهما كان الواحد يحب يحس بالشعور معه

متى احسه لا تهاوشت معه بشيء قال لي مكانتي عنده



الولد سافر وصارت علاقتنا اقوى واقوى

والولد متمسك فيني اكثر واكثر وانا بعد

وهذا الشيء اللي خلاني احس انه صادق ويبيني لذاتي وزوجه

لانه بعيد مو قريب مني ونيته مو سيئه



لكن ساعات اقول هو بغربه بيحتاجني اكثر لو انه بالسعوديه

انا ماقصرت معه بشيء ووقفت جنبه بكثيرررررررررر من الاشياء

وهو يعرف هالشيء



يعني هو يفكر يطلع بسكن لحاله واقول اخذ لك شقه انت وصاحبك لا تصير لحالك



يرد ويقول الشقه اخذها لا جيتي هنا معي > ياناس يخليني غصب احلم

وجاني على الوتر الحساس دراسه + زواج من شخص احبه





كلام اهله امه واخته وقال لهم ابي اتزوج وابي فلانه قالو شعرفك فيها ليه يعني هذي

قال اخوها اعرفه ومن هالكلام

يعني صرف الموضوع



يعني اهله صار عندهم خبر وامه قالت بشوفها من بعيد لبعيد



قال لابوه انا بتزوج لا جاتني البعثه ابي استقر وابي وابي وابوه يقول له يصير خير





كان يقول تقدرين تعيشين معي يعني وضعك ممكن يصير مو نفس وضعك يوم كنتي في بيت ابوك

تتحملين



اكيد اتحمل لا صرت وياك > لان بختصار احبه



انا حبيته بعقلي وقلبي لا تقولون مشاعرك اخذتك لا وربي

حبيته بعقل قبل القلب







كان كل شيء مع البعثه وجات ولها 4 شهور والولد ماقال شيء

وربي مقدره ظروفه لكن ابي ضمان

واهلي يحنون علي الى متى وانتي ترفضين البنت عمر ويوقف نصيبها





انا ماابي زواج هالفتره او شيء لكن خطبه عشان ارتاح نفسياً انو يصير كل شيء قدام اهلي ولا اسوي شيء من وراهم

عشان ارتاح من امي لا جات تقول شرايك بفلان ولا علان

صرت ماروح زواج او شيء عشان مااجتمع مااحد وتجي خطبه او شيء





سئلت ناس كثير ناس عاقله وراشده عن موضوعي ناس قالو وزاجك فيه راح ينجح لا تخافين وبتعيشي مبسوطه

كلكم من نفس البيئه وعن حب ماخذين بعض

وناس قالو مهما كان راح يضل هناك شك بينك وبينه وياخوفك تتطلقين او تتعذبين لا تتزوجينه مهما كان يضل رجل شرقي ولا عنده هالسوالف الزواج

وانا بين هذا وهذاك

هو يعرفني ويعرف اخلاقي ويعرف كيف تربيتي وهو اعترف انو هو اللي جبرني على هالطريق

لكن مشكلتي الوحيده معه الغيررررررررررررررررررررررررررررره

انا شبه مريضة بشيء اسمه غيره

يعني هو يدرس برا وعندها بنات في نفس الكلاس اخذ وعطا اغار

يسوالف وباخذ ويعطي مع البنات في المنتدى اغار

بالفيس بوك وهالطخ

مو شك الا غيره عليه ماادري خايفه انا اثق فيه لكن خايفه

يعني اقلها يقول لي كنا على البتش نشوي الفجر جو بنتين اجانب ممكن تطيني دخان عطاها قال ممكن ثاني لصاحبتي عطاها

قالت ثانكس وقربت منه وحبته حبه خبيثه على فمه يعني يارجال ابيك

من جد متتتتتتتتتتتتتتتتتتتتتتتتتتتتتتتت قهر وبكي وغبنه يعني عيني عينك

قال يافلانه انا ابيك اكثر منتي تبيني اذا لك حاجه فيني مرا انا حاجتي لك مليون مرا







ودي فيه وابيه وهو يبيني


قبل اسبوع كلمو ناس امي عني وقالو نبي فلانه
وامي قالت لي ومصره تقول ليه ترفضين !! جامعه وبتخلصينها هالسنه
والزواج مو صاير لين تخلصين
والرجال ماافيه عيب كل بنت تتمناه وظيفه كويسه وقريب لي ومن عائلتي واخلاق وكويس
انا قلت ماابي ماافكر في الزواج وامي مصره اني اوافق وقالت بقول حنا موافقين

كلمت الشخص اللي احبه وانا اصيح وقلت له الموضوع كرامتي ماتسمح لي اقول اخطبني او تزوجني هو من نفسه يجي مو انا اقول له

قال لي عطيني 10 دقايق قلت طيب
وكلمني ثاااني
قال امي تسلم عليك وتبي تشوفك
طبعا وهو يمزح لان مستحيل يقول لامه انو يعرفني
لكن كلم امه وقال ابي اتزوج فلانه
اكلمي امها واحجزيها لي لين مااجي بشهر سبعه اسوي خطبه او على طول املك وبعد ست اشهور او 5 ارجع نتزوج وتروح معي

هو قال لي كذا انبسطت وارتحت
قال امي شوفي راي اهلها عشان اقدر اكلم ابوي عن طاري الزواج > امه منفصله عن ابوه
صارت الام تسئل عني عنده اسم امها وابوها وهي وين تدرس

وقال عني معلومات بسيطه عشان ماتشك الام انو يعرفني
قالت ابشر اروح لاهلها بكره لكن قال الولد لاا انتظري لين اقول لك روحي

وقال لي لازم تردين الشخص اللي متقدم لك عشان امي تقدر تكلم امك

شلون اقنع امي واخليها ترفض

صرت بعد اخاف انو ارد هالشخص بعدين الموضوع يبرد ولا تكلم امه ولا شيء

ايش تنصحوني فيه

الموضوع ذا صار له اسبوع الشخص اللي متقدم لي
وكلامه مع امه له يومين
وهو ينتظر ايش صار مع امي وهل ردينا على الناس

تتوقعون الولد صادق !!

قولو شنو اسوي مع امي ومتى ارد له خبر
عشان امه تكلم

ادعو لي تكفون


خفت ايش تنصحوني !!



شلون اعرف اذا هو صادق

هل اقدم على هالخطوه

ابي اجابات رجال هل الرجال صادق لا قال احبك وبتزوجك علماً انو هو كبير وانا كبيره ولا احد ملزوم يوعد احد بشيء زي كذا مااحد جبره يقول لي كذا

هل في شيء اسمه حب صدق > من الخوف ضاع كل شيء

هل اضيع عمري على الفاضي اضيع علي الفرص

وادعي ربي يهديني ويغير حالي

ويكون كل شيء بالحلال



واخاف يصير شيء رسمي وينقلب شيء ضدي وتخترب حياتي معه

وتتحول الى شك وعدم ثقه

ويقول انتي عرفتيني قبل الزواج وتحمليني

وساعت اقول هو اللي بيقدرني ويصوني لانه اختارني بنفسه

وانا ماجبرته على شيء ولان نعرف بعض

والاهل كمان



تكفون ريحوني

وعليكم السلام ورحمة الله


أختي الكريمة

الله ينور بصيرتك ويهدي بالك

صراحة أتعجب لفتيات يضحين بحياتهن لأجل شخص مجهول خلف الشاشة ويربطن مصيرهن بهذا المجهول!!!!

الحين هو قاعد يدرس وحتى يخلص ذيك الساعة، ما في شيء مضمون والله العظيم ما في شيء مضمون لك!!!!!!!! كله كلام،،،، هل معقولة تنتظرينه ، على أي أساس
تنتظرينه لا تقولين بإسم الحب والخرابيط هذه ،،،،،!!!!


يا أختي هو نصيبه لن يقف عليك ،،،، فيه غيرك !!!
أما انت فبتعليق مصيرك به !!!! يقل نصيبك لما ترفضين الخطاب الرسميين ...

فبأي حق تربطين نفسك به وتضعين قرارك بالزواج بيده!!!! ومصير حياتك الزوجية وترفضين الخطاب الرسمين بسبب كلمات ووعود في الهواء ،،،،،،

هل بينكم عقد أو خطبة !!!! بأي حق تربطين مصيرك وتحيرين اهلك كلما تقدم لك خطاب ورفضت من جهتك!!!

ذيك الساعة إذا تقدم لكم وخطبك وصار كلام بين اهاليكم ، وأنه تنتظرون ذيك الساعة اقول لك انتظري
لكن كلام في الهواء ،،،،،،،،،،

أختي تخيلي لو أن هذا الشخص قريب لك ابن عمك أو ابن عمتك أو ابن خالتك مثلاً
وكلم بدون علم اهله وأهلك من ووعدك بالخفاء بالزواج
منك وأنه يحبك بس تتحسن ظروفه، وربط قرارك بأن ترفضي جميع الخطاب،،،،حتى تزين أموره
ذيك الساعة أنا أعتبره غشك ولم يصدق معك ،،،،،
لأنه لم يتم كلام رسمي بين أهليكم أنه تم الإتفاق أنه يتزوج بك ،،،،

فحتى الأقارب فيما بينهم إذا كان فيه إتفاق وكلام رسمي على ان فلان يتزوج فلانة، لكن حجة أهل الشاب لأهل الفتاة أننا نصبر عليه شوي حتى يخلص دراسة ،أو يحصل وظيفة ، أو تتحسن اوضاعه المالية ،،،إلخ

لكن مع ذلك تجدين بعد فترة أن اهل الفتاة يتضايقون من هذا الشيء لأنهم يخافون يأخرون نصيبها ويردون الخاطب الجاهز

ومعهم الحق فهذا وهم أقارب وبشكل معلن ورسمي ومحدد وليس مجهول


فما بالك بغريب !!!!!

فوضعك في خطر وأنت جالسة !!!!

يعني ما في ضمان لك ،،،، بل هو لو تركك بيلقى نصيبه اكثر منك !!! لأن الولد يختلف عن البنت !!!!


وحكمي عقلك جيداً وفكري بعواقب وضعك الذي ظهرت نتائجه وهي - للأسف - ليست لصالحك واقطعي علاقتك به نهائياً


بوضوح شوفي نصيبك، ولا تردي الخطاب واختاري الرجل الصالح




الله يهدينا وإياك





عزوبي بس رجل

__________________

يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين

يالله ................ سبحان الله ~

من جد خطوات الشيطان !!

اول شي اعجاب وبعدين مكالمات وخرابيط والله اني اقرا هالسيناريوووو كل مره تكتب فيها اي بنت عن علاقتها
مع اي شخص تتعرف عليه

ومن كثر ماانا حافظه السـالفه في سطور نطيتها وماقريتها .. عااااااااااااارفه بالظبط اكثر من اسمي وش يقول وش قالت
وش احسـاسها !!


::

يعني مافي ولا شي يثبت لي ان هو صادق !!

يقولك لحظه بقفل شوي واكلمك ..

يروح يتخيل مع نفسه انه كلم امه و يحبك القصه الي تطير مخك .. ويجي يقوولك !!

يــآنه غبي !! موضته قديمه والله ..

ولا يجي يقولك امي وخواتي حبوك ويبونك وقلت لأبـوي ! وابي اتزوج يااااااااااااااليل السوالف السامجه !!

هذا حافظ الدرس صممممم وجاي يسمعه لك ! من جد غبي

يعني بجد بجد .. خليك صريحه معاي ؟!

وش الي خلاك تصدقينه !!


* شوفي انا اسمي دانيتل .. بأذن الله راح اكون متواجده بهالمنتدى الى اخر يوم بعمري اذا ربي عطاني الصحه والعافيه ..

اذا هالأنسان تقدملك ولا بس وصـل باب بيتك ووفا بوعوده .!!

تعالي وانا هنا والله اني محللتك تتكلمين عني لين تقولين ........ بس !

::

واعزميني بعد عشـان تبينين لي اني اكبر غبيه ومغفله !! وان الي تعرفينه هو الصاااااااااااادق الصريح الحبيب الوفي !!

والله اني تعبت من هالموااااااااااااضيع بجد تتعب نفسييتي ..

حبيبتي .. والله اني اشـوف بين الحروف وبين السطور انك انسانه وااااااااااااعيه .. وفاهمه ان الي قاعد يصير شي غلط

بس ابيك تمشين على شي واحد .. ونفذيه ..

كل ماكلمتيـه .. تخيلي بس تخيلي [ ان ملك الموت .. واقف عند راسك .. ]

بذمتك جاوبيني ! مين اغلى عندك ابوك واهلك ؟! ولا هالشاب !!

بأماااااااااااانه من اهم عندك آخرتك ولا دنياك !

بكل صدق .. جاوبيني .. هل انتي مستعده ان تكون خاتمتك وانتي تكلمينه !!

هل انتي مستعده انك تكونين قصه ولا عبره للناس !

حبيبتي والله انك ارقى من انك تفرحين الشيطان فيك .. وتخلينه ينبسط ..

!!

انا متأكده ان الله عندك اسمى واغلى ماتعيشين له بهالدنيا .. وانتي عارفه انك لو تركتيه لوجه الله عزوجل ربي راح يعوضك بأحسن منه ..

تعرفين كيف !!

يعني انتي شايفه ان فلان حنون وطيب ويحبني ويهتم فيني ويسمع مشاكلي !

طيب انتي عارفه ان الله زي ماخلقه خلق احسن وافضل منه !

طيب اذا انا تركت هالشي لوجه الله .. ومن ترك شيئا لله عوضه الله بخير منه !! يعني انا اذا تركته لوجه الله عزوجل
ربي راح يعوضني برجل احسن منه بالحنان والكرم والتفاهم والعلم والثقافه وكل شي !!

انتي مستوعبه كلامي فاهمه ياغلاي ؟!

بس بقولك شي واحد انا ضد شي اسمه حب قبل الزواج !

والله شفت تجارب قدام عيني ..

لثنتين اعرفهم عز المعرفه ..

وحده كانت تحب ولد عمها واتفقوا عالزواج عشق غريب وحب وتخيلي لما يكون حبيبك ولد عمك تصيرين وااااااااااثقه ..

انك راح تتزوجينه وان مافي شي راح يمنعكم !

بس يجي كل شي ضدددددددك يسافر هو ويبتعث ويبعد عنك ..

واخر شي يقولك بعد كل هالحب مافي نصيب !!

ولد عمك من لحمك ودمك يخووون حبك ويتركك ويتزوج غيرك !!

تدرين وش صار فيها هالبنت كانت راح تموت .. والله انها تبكي ليل ونهار ومنهااااااااااره ..

وبعد سنه خطبها رجل ... وبعد ماتزوجته سألتها عن شعورها قالت والله اني اشكر الله عزوجل ان ربي صرف عني ولد عمي
ورزقني بزوجي .. والله اني كنت غبيه بجد ماكنت اعرف وش كان ربي مخبيلي

زوجي رجل بكل معنى الكلمه .. احس ان احلى شي صارلي بهالدنيا ان الله فرقني انا وولد عمي ورزقني بزوجي ..

* والبنت الثانيه ..

تعرفت على شخص .. وهو معروف ومشهوور بس ونفس الحاله حب وخرابيط .. وامها كشفت الموضوع

ودرت بالسالفه .. وتعاملت الأم مع المووضوع بعقليه كبيره وعرفت تحتوي المشكله .. لما درا الرجال اتصل على امها

يبغى يخطبها بس الأم رفضت .. وانتهت العلاقه طبعا الأم رفضت لأنها عارفه كيف يعني بنت تتزوج شخص تعرفه ولها علاقه فيه
ومارضت لبنتها هالشي ابـدا .. وقالت انا عاااااااااارفه انك راح تجيني تبكين ان زوجك يشك فيك ! وراح تتعبين معاه

وصار ان هالبنت ماتركت هالشاب وقعدت متعلقه فيه .,. اكثر واكثر لين تقدم لها شخص وهي ماكانت مقتنعه
لأنها تحب حبيبها مرررررررره

بس لما سألوا اهلها عن الخاطب وجدوا ان كل صفاته كويسه ومايعيبه شي

والأم اقنعت البنت انها توافق .. ووافقت ... والله اني ماانسى كيف ان هالبنت كانت تضمني وتبكي من كثر ماهي متعقله بحبيبها ..

وكانت ماتتخيل انها تتركه والله ان مره اخذناها للحرم عشان تصلي وترتاح وكنت انا جنبها ..

كانت تصلي وتسجد وتبكي بكاااااااااء مو طبيعي .. اول شي ماكانت قادره تفارق حبيبها وغير كذا كانت خايفه من المستقبل مع الأنسان الي راح تتزوجه

وتم الزواج والآن البنت هذي والله بدون مبااااااااااااااالغه تموت تموت تموت بزوجها وحبته بشكل مو طبيعي

لدرجة انه لو بالمزح تجيبي سيرة الموت تقول يارب يومي قبل يومه .. !!

::

الشاهد من هالقصص !

ان الحب وهالعشق والتعلق بس مشاعر فاااااااااضيه والله مالها اي اساس من الصحه .. كذب وخداع

ولو طلع من الـ 100 شخص صادق لكن هالصادق راح يكون اكبر شكااااااااااااك !

وان الحب بالزواج هو اسمى حب .. وارقى حب .. وكيف مايكون كذا وهو الحب الحلااااااااااااااااااااااااااااااااااااااااال ..!

والله اني تكلمت واسترسلت بالكلام بس لأني ابيك تكوني واعيه ..

والله اخاف يجي يوم تندمين فيه انك ضيعتي عمرك على حب كذب بـكذب ..

واخاف يجي يوم تندبي حظك انك كنتي لهالأنسان للتسليه وتضيع الوقت ..

وافقي على الخاطب .. استخيري الله واقدمي ووافقي .. واطلبي رضا الله عزوجل .. وتأكدي من ترك شيئا لله عوضه الله بخير منه ..

حبيبتي / الرجال وحدهم عارفين وش كثر يضحي الرجل بأمواله لأجل سعادته .. واكبر دليل ان في رجال يدفعون اموالهم واوقاتهم على ساااااااااقطات مو حب فيهم ولا لأنه راح يرتبط فيها ! لا والله ..!

بس لأنه هو مبسوط ..! لكن ماان يجد غيرها يدوس عليها ويمشي !

عشـان كذا هالنقطه تفسر كلامك لما تقولين :

هو حتى يوم سافر صار يسأل عني ومايبي يتركني وبس يقولي هالويك اند بنروح هناك وبنجي وبندرس !

هو وش خسر ؟! ولا شي بس عيشك جو بهالخيال الوردي !! واحنا وش مضيعنا غير العاطفه وهالخيال ؟؟

طبعا اسم الله عليك .. انتي راقيه وبنت ناس وتخافين الله وماراح ترضي على نفسك بأي زله ابـدا !

كلامي قلته لك واتمنى من الله ان يدخل الى قلبك وان تقرأيه كل ماأحسستي بالضعف ...

ارجوك كوني قويـه ! على الشيطاااااااااااااااان ..

__________________
{ احبــــ ـــكم بلا استثنـاء ~

قذر جدا و انت ساذجة جدا جدا ..
لو كان يريدك لكلم اهلك منذ زمن و لم يسوف كل هذه الفترة ..
كما انه لا يعرف الله جيدا .. فمن يسمح لنفسه ان تقبله فتاة في فمه لا يعرف الله بحق .. و لا تقولي ان هذا رغما عنه .. بل هذا فسوق و فجور و جحود لنعمة الله .. الخلقه الحسنه ..

و لو اردت ان تتاكدي من صدق كلامي .. اخبريه انك رددت الخاطب المتقدم بينما انت لم تردينه في الحقيقة و لكن اجلي ردك عليه و انتظري ماذا سيكون من شأن أمه .. و اتحداك ان جاءت و طلبتك ..

دانتيل انتي صح

الكلام بلاش يا صاحبة الموضوع

مستعد اصرف لك من اليوم الى بكره وعود وكلام حلو بدون ما اخسر شي

دائماً قبل الزواج قدمي العقل عالقلب و بعده قدمي القلب عالعقل

موفقه

انتبهي لنفسك
والله قريتها الف مرة كلهم اجمعو مافي رجل ياخذ بنت عن طريق الشاشة
اصحي يالحلوة وانتبهي وربي يلعب عليك وبيخرب عليك حياتم
وراح يجي يوم وتتذكرين كلامي
وافقي على الي خطبك لاتضيعين عمرك

استغفري ربك وتوبي اليه هالشي اللي تسوينه حرااام ولايرضي الله ولا ورسوله

اسمعي كلام امك ووافقي على الخاطب اللي تقدم لك

والله يوفقك

__________________
استغفر الله العظيم الذي لا اله الا هو الحي القيوم

شفيكم ؟؟

شوي شوي عالبنت

انا رايي انو تقولين له انك رديتيه وشوفي اذا صدق امه بتكلم امك والا لا



بشريني عنك

أولا : الله يارب يعينك عل أمرك
ثانياً : نصيحتي بإختصار لأني ماحب الكلام الكثير ( إبعدي إبعدي إبعدي عن هالنذل الذي يلعب بعواطفك وصدقيني لا كلم أمه ولا شي ولو يحبك صدق كان ضحى من أجلك وصدقيني إنه ماراح يتقدّم لك ولا شي لأنه ببساطه يفكّر بأنك كما كلمتيه وكونتي علاقة معه بأنك على علاقه بغيره وراح يشك على طول , أقبلي وأنا أخوك بالخطاب اللي وصلو لحد بيتكم وطلبوكي رسمي من أهلك )

وأخيرً / أتمنى إنك ماغلطتي غلطة كبرى وأرسلتي له أشياء شخصية تخصك ( الظاهر المعنى واضح )

في البداية أريدك أن تغلقي بوابة العاطفة وتفتحي بوابة العقل!!!!!!
اتفقنا!!
بسم الله/
ما خلا رجل بامرأة إلا كان الشيطان ثالثهما.. هذا الرجل يريد أن يحقق مآربه منك لكن بطريقة إبليسية توحي إليك أنها طريقة نظيفة وشرعية..
أختي بارك الله فيك.. إني سائلك فصارحيني: هل طلب منك أن يرى صورك؟
هل تحدثتما على الكام؟
إن حصل شيء من هذا فهو فقط يريدك مرتعاً لشهوته في هذه الفترة إلى أن يجد له زوجة ولو قال لك ما قال.. هذه خطوات الشيطان.. وهؤلاء هم الذئاب.
يا أختي كم فتاة عفيفة انكسر شرفها وتحطمت آمالها بمثل هذا الكلام؟
والله الذي لا إله غيره لو كنت على علاقة بفتاة وطلبت مني الزواج .. مستحيل أتزوجها... تدري ليه؟ لأني لن أثق فيها.. تكلمني اليوم وتخونني غداً.
اختنا .. تنبهي قبل أن تزل بك القدم.
احذفي إيميله.. واقبلي من ترضون دينه وخلقه.. أما الذي أنت معه على علاقة فدينه ضعيف.. وأخلاقه معك عالية لكنها في ميزان الشرع ساقطة سافلة..
بل إنه لو صدق في زواجه منك وطلبك من عند أهلك.. هل تظنين أن مهمة الشيطان انتهت بعد الزواج؟ لا. وألف لا. بل إن إبليس سيوكله بمهمة التفريق بينكما وهذه بالنسبة له طريقة سهلة لأنه هو الذي جمع بينكما ولذلك يسهل عليه التفريق بينكما..
قد تقولي : وكيف ذاك؟ أقول: إنه سيبدأ معكما بالشك في بعض. زوجك سيظنك خائنة وسيشدد عليك في كل صغير وكبيرة .. إن تكلمت بالجوال سيسألك من تحدثين وسيشك في كل صغيرة وكبيرة..
وفي نفس الوقت سيأتي إليك ويقول لك زوجك يحادث بنات ويعرف بنات ووووووووو
المهم أن مهمته ستكون سهلة بينكما.. وعلاقة زوجية ملؤها الشكوك لن تدوم...
والله الذي لا إله غيره.. حدثني من لا أشك في صدقه عن شخص تزوج بفتاة عرفها عن طريق الجوال أو الإيميل وبعد الزواج صار يصارح صديقه ويقول والله أعيش في ضيق.. صرت أشك في كل تصرفاتها.. أشك في كل واحد تكلمه في الجوال.. يقول أنا عرفتها بهذه الطريقة ويمكن اليوم تعرف شخص غيري!!!!!!!!
على العموم انا طولت شوي ولربما قسوت في الكلام ولكن كل هذا رحمة بك وحرصاً عليك والمؤمنون نصحة

قسا ليزدجروا ومن يك راحماً ***** فليقس أحياناً على من يرحم

__________________
قرأ وهيب بن الورد رحمه الله قوله تعالى {وإذ يرفع إبراهيم القواعد من البيت وإسماعيل ربنا تقبل منا} ثم بكى! وقال: (يا خليل الرحمن ترفع قوائم بيت الرحمن وأنت مشفق أن لايتقبل منك) تفسير ابن كثير1/167