الـــــــــسلام عليكم ورحمة الله وبركاته
اعرض لكم مشكلتني التي كل ما تذكرتها وليس فقط تذكر بل هي مستمره الى وقتي الحالي
لا اعرف كيف اعرضها بصيغه عامه او اقول كل مافي قلبي من حزن واسئ
انا مخطوبه لي اربعه اشهر و زواجي الشهر القادم بأذن الله تعالى مشكلتي من بداية الخطوبة ان عائلة خطيبي عادي نسوان الاخوه تكشف وجها فتقبلت هذا الشي بحكم ان راح نسكن كلنا في بيت بس شقق راح اذكر لكم اشياء فجرت قلبي زوجة اخيه مره لزقه في زوجي اتذكر ثاني اسبوع من خطوبتنا اتصلت لزوجي تقول له تعال لي بيت اهلي وانا كنت معاه في السياره اشوي الا يقول لها قولي يااعمري هي لو مو متعوده ان تقولها له كان استغربت والا تقول له وانا اسمع لان صوت جواله رفيع الا تقول له ييييااا عمرري من ذيك الحظه بغيت انفجر وصلنا بيتهم وصلها ورجع وياي البيت وانا كلا ساكته امي حست على ملامحي ان فيني شي وانفجرت فيه اقول له ليش تقول لها كذا قال امزح قلت له حتى لو تمزح مو بكلام كذا وقدامي حتى كنت ابي افصخ الخطوبة ياريتني فصختها وقتها لان شفت اشياء اكثر فضاعه راضاني ورضيت ويوم ثاني يجي لي يقول لي مو كل مره تزعلي بجي اراضيك سـلآمات هذا وهو الغلطان طيب موقف ثاني لما مره كنت بشقتهم انا وهو راح هو يعسل وخلاني مع اخوه وكنت اتغطا وهي قامت راحت تعسل مع زوجي وانا مع اخوه الا شوي اسمعه يقول وش اسمها نسيت اسمها يقصدني وهي قالت لي تعالي وهي في مكانها وياه شي ثاني قبل فتره كنا في البر انا واخوانه و نسوانهم كل واحد جالس جنب زوجته الا هو جالس جنبها او منسدح جنبها وانا كاني جدار وفجاءه جلس مثل الدائره المغلقه قبالها وعطاني ظهره وجلس يسولف ويضحك وانا كاني مو موجودة طيب في مكان جنبي ليش مايجلس والله ميته قهر من تصرفاته وكلا مع نفس الانسانه في مواقف كثير وانت تعبت والله كل همي ان هالانسانه تبتعد عن حياتي امس رحنا سوبر ماركت صادف لقيناهم زوجها بالسوبر ماركت واحنا طالعين وهي بالسياره ترك العربه وراح لها وانا مسكت العربه وشفتها بعيني لما جاء زوجي لها السياره مسكت راسه مو حلال عليها رحت بيتنا ونزلنا الاغراض لان الاغراض حق بيتنا قلت له انزل تعشاء قال لا ما ابي قال بتروحي وياي قلت له ايه بس عشان ماتصير له فرصه يجلس مع ذيك المخلووقه المشكله عندها ولد صغير لو ابي اخرب حياتها قلت لزوجها بس انا ما ابي وحرام علي اضيع هالولد رحت معه شقتنا عشان نجلس سواء شوي قال ل اخوه الا هو زوجها بنتعشاء وياكم اشتري عشاء وبدفع النص قال له اوكي قال يلا نروح لهم فوق ااااه خلاص ما ابي اروح لاني عارفه كل مره اروح ويجتمعون هالاثنين اشوف الا يحرق قلبي المهم ركبت الا تقول لزوجي فلان اخوك نسى يشتري مشروب روح اشتري قال لها لا هاتي اول قيمة الشراب قال له اوكي بعدين قال لها بعد حق المشوار قالت والله اعطيك وقفت وقفه مايله مدري كيف اشرحها المهم مو عدله اصلا تسويها بعدين قال لها امزح معك وراح شراء مو مشكلة ان شراء من فلوسه المشكلة بحركتها وهي واقفه طيب جينا نتعشاء اصلا مسافة كلاماتي ذي ابعد عن جلستهم جنب بعض والله اقرب من ما انا جالسه جنبه مره قريبين من بعض وزوجها مايعلق مايقول شي اوف خلصنا عشاء تبغى تقرب من ولدها ولدها بعيد الا مثل تنسدح على جنب قادم زوجي اااااه تنبط كبدي وش اسوي زوجي مندمج وياها وكلا يروح لهم ويتغدى معهم ودايم يلغي المواعيد الا وياي يعني انا اخر همه لاتقولو انا ما اكشخ له اكشخ ومحترمته اليوم قلت له تروح وياي السوق قال لا بعدين اتصل لي قال اوكي بنام وصحيني بعد ساعه اتصلت له قلت له يلا قال لي بخلص وبجيك قلت اوك انا توقعته يطول كالمعتاد وانا استناه بعباتي رحت تروشت بالسريع سمعته يرن هرن اتصل علي مره قالت امي ل اخوي الصغير روح خليه يركب واتصل لي وانا لسه حتى مالبست ورديت عليه قلت له با البس وبجي لك لبست بالسريع حتى مانشفت حالي وشعري ما مشطته ويهزئني تهزئي ويقول لي مره ثاانيه مابجي واذاا اتصلتي لي خليك لابسه عباتك وانتظري برا اصلا قلت له اول مره اتاخر حتى ربع ساعه ما انتظر يمكن 7 دقايق وكلا يهاوشني وش الحل وياه هو وزوجة اخوه على فكرة انا عمري 19 وهو 23 ابي حل كلمته كثير واقول له الا يضايقني احيانا بس هو يقول اوكي ويطنشني



تم تعديل العنوان ليتناسب مع مضمون الموضوع

لابد من وقفة حاسمة جدا
والدتك تكلم والدته أو والدك يكلم والده في جلسة جادة محترمة بحضوركما وحضور أخيه، وتوضع النقط على الحروف هذي اسمها مهزلة
ومر معنا مشكلات خيانة عظيمة بين الزوجة وأخو زوجها هنا في المنتدى
والرسول صلى الله عليه وسلم قال الحمو الموت تنبيها لمثل هذا ..
إما أن يعالج هذا الأمر وزوج هذه المرأة يصحو من غفلته وينتبه لأهل بيته وإلا فانسحبي بهدوء لئلا تجري على نفسك ويلات ما بعد الزواج فالأمر يستدعي التفكير الطويل ، واتخاذ قرارات قطعية . فإن الأمر قابل للتطور مستقبلا .ومن أمن العقوبة أساء الأدب . نسأل الله لهما الهداية .
أعانك الله .

__________________
## مهم ##
هل تتعرضين للابتزاز في الانترنت؟


هنا من ينقذك

كم عمرها زوجة اخوه !!

بما انهم علاقتهم بالعلن امامك و امام اخوه بعلاقتهم اخوية علا الاغلب

زوجي هيك علاقتو مع زوجات اخوته ..بالرغم من انو ببعدني عن اخوته و ما بيسمحلي اقابلهم

هالشي حرام لانو قد ما كان علاقتهم اخوية بس الشيطان شاطر

المشكلة في زوجك وليس في زوجة أخيه.

نصيحه لاتكلمين احد يتكبر السالفه على راسك انتي
والامر بيدك ارفضي رفض قاطع لو يقطعونك ارفضي رفض تام وش الاسلوب وانتي لسى مخطوبين
ارررفضي وربي راح تندميين في المستقبل ومايحتاج اشرح لك الاسباب على تنبوئي
الاسباب ذكرتيها انتي
مرره بينهم ميانه والرسول عليه افضل الصلاة والسلام حذر من الحمو
يطنشك ويدير وجهه لها ولاصق فيها الغلط عليها وعليه والغلط عليك ساكته
اختي وش تبين بعائلة اعوذ بالله الحمو مع الحماه ليس بينهم ساتر

اختي الحمدلله بان كل شي امامك وانتوا مخطوبين
الامر بيدك انت ع البر اتركيه والله يعوضك
اذا ماخاف من ربه مو تاركها ع شانك واذا زودتي المشاكل بيتفق معاها قدامك يكونوا رسميين ومن وراك فررررري
وتكوني زي المغفله المضحوك عليها

شنو عمري وياعمري ويلزق فيها وتوقف مايلة وتقريبا تنسدح قدامه وتمسك راسه و و و ..
لا لا أختي .. لازم ماتسكتي على الوضع ..
اما يتعدل ولا بلاه الصراحة مايسوا عليك بتعيشين في جحيم ..
وزوجها هذا ديوث ولا أيش ؟؟ مايغار مايحس ؟؟
استغفر الله إن بعذ الظن اثم .. بس علاقتهم تثير التساؤل ..
إذا قدامكم كذا .. لو يختلون ببعض شلون تكون معاملته لها ؟؟

استغفر الله وش هالعايلة ...؟



فار دمي ع الصبح ..

هي بعد عمرها في 20 بس اكبر من زوجي اتوقع بسنتين او كذا
انا لما اقول له لاتسوي كذا يجلس يصاارخ علي ويقول ذي مرت اخويي وشوو قصدك انتي ويصارخ ويطلعني انا الغلطانه وانا عارفه شنو السبب الرئيسي ان هي كانت تبغى زوجي خطيب لبنت اختها وهو رفض او بالاحراء امه رفضت

انا بعد مستغربة من حميي الا هو زوجها لهدرجة واثق في زوجته ما ادري شنو شعورة وانا ما ابي اسوي مشاكل لهم بس والله اموت قهر وارجع بيتنا وابكي
آفاق المجد ... والده انسان مايهمه الا نفسه .. ابي علاقتي فيه شبه معدومه يعني ما اقدر افتح له قلبي واقول له الا بخاطري لان غير متفهم .. امي الله يحفظها اقول لها وتقول لي اذا شفتيها كذا ردي عليها قولي لها تراك زودتيها مع زوجي او اذا شفتيها حركات قولي لها تعدل جلستها ما ادري استغفر الله اشك احيانا ان بينهم شي

انا ما اظن اخوية لان من بين الاخوه بس لازقه في زوجي وهي جريئه جداً حتى صوتها مره عالي