السلام عليكم ورحمته وبركاته

صباحكم راحه بال وسعاده واطمئنان ....

وكل عام وانتو بخير ورمضان مبارك علينا وعليكم وعلى الأمه الأسلاميه..

ادري طفشتكم بمواضيعي وغثيتكم بس والله مخنوقه ودي افضفض ..

ومااحب اتكلم عند احد🙈 ماارتاح الا هنا...

الموضوع مافيه انو تلقفت وحطيت رقم جوال ابو عيالي بجوالي ورحت للواتس بشوف حالة ظهوره وصورة عرضه ادري الكل بيلومني بس امر وصار..
المهم ماطلع لي شي لا حالة ظهور ولا صورة عرض استغربت..
قمت مسكت جوال امي وهي خالته طبعا
وحطيت رقمو الا طلع لي كل شي
حالة عرض بتاريخ قديم وصوره عاديه وتاريخ ظهور قبل اسبوع..
المهم انقههههههههرت ..
اول شي انو مو حافظ رقمي عندو لان مسوي الظهور بس لجهات الاتصال واللي كنت اطلب منو يسويها زمان ورافض جدا واللحين مسويها كأن يقولي شوفي ماهميتني كأنو عارف اني بيوم ابحث عنو ويقولي شوفي ماهميتيني حتى رقمك مو موجود عندي..
والشي الثاني التاريخ القديم يعني مسافر او متزوج جديد
وهو اللي مستحيل يغيب عن الواتس...
يارب لذي الدرجه بسهوله يبدأ من جديد لذي الدرجه انا رخيصه..
شككني بعمري حسبي الله ونعم الوكيل
انا مافيني شي ماابغى اوصف نفسي بس اللي يشوفني مايصدق فيني..
صرت اضرب اخماس بأسداس مرا اقول ممكن مو جذابه ممكن مافيني انوثه
وممكن وممكن ...ماخليت فيني عله الا وحطيتها فيني مع انو الكل وربي يمدح فيني ....
تملكني الشيطان وجلست ابكي ومازلت ابكي واسترجع كيف زمان رجعني بقوه وبشروط ومواثيق وبكاء وحلفان واللحين بعد ماشبع مني وبعد مااعطيتو كل شي شاتني شوووته قويه واتبرأ من عيالي حتى..
صرت اقول يارب كنت استخير وقتها كثير ومتخوفه انو ارجع ورجعت
ليه ربي تمم الرجعه لي ورجعت لغدر جديد وبهذله وجحود ...
اوكيه اسأله ببالي..
شو يخلي الرجال يترك زوجته وعياله وهو كان حابها وكان بينهم عشره وهي حابته ومعطيتو كل شي ؟؟
قلبي محرووووق
يظلم ويتبطر ويعيش مبسوط ولا كأنوا سوا شي ...!
انا حاليا صابره ع عدم وجود رجل يلبي رغباتي ويعلم الله وشلون اجاهد بنفسي وادعي ربي يغينني بالحلال عن الحرام وصرت اخاف ع نفسي
لما اخرج الأماكن العامه بحاول مااطالع واناظر خايفه ع نفسي وخايفه احد يفهم اللي بعيوني ..
وهو من زوجه لزوجه ...
اقارن بيننا وغصب عني اقارن ...!!
تقولوا اطلبي طلاقك رافضين اهلي طلاقي خايفين ع عيالي
خايفين اتزوج واخليهم وانا والله ماراح اخليهم ومستعده احرم نفسي ولا اتخلى عنهم...
ووالدي خايف من ملامة عيالي مستقبلا ...
كرهت الخوف اللي عيشوني هوا
مع انو اهلي متعلمين ومستوانا المعيشي ممتاز الحمدلله
وانا وحيدتهم ..
بس برضوا خايفين من طلب الطلاق يقولوا خليها تجي من نفسو..
قلت لهم انا ماراح اسامحكم وذنبي برقبتكم ...
ومشان يسكتوني قالوا لي اعطينا مهله لبعد الحج ...



ماراح ارجع اقرأ كلامي فسامحوني ع الاخطاء الاملائيه ان وجدت لانو لو برجع اقرأه ماراح اعتمدوا...


تم تعديل العنوان ليتناسب مع المضمون

__________________
(سيدة الموقف)
لم ننساك ونسأل الله ان تكوني أنتي وأولادك بخير

لانه ياقلبي ضامنك ولانك تحت سيطرته ...وهذا خلاه يتبطر ولاهمه
عارف انك عايشة تحت رحمته ولا تقدرين تتزوجين

فالحل // اضغطي على اهلك واضغطي لحد ماتاخذين صك الطلاق

صباحك كله خيرو صباحك تفاؤل وآمل بان القدام افضل بكثير
اعلمي ياقلبي بقاء الحال من المحال
احيانا الزوج ينسي كل شيء ويجحد وينكر مقابل هواه لكن لما تكون هناك عشرة لازم من التضحية
لان هديت البيت بعد عشرة عمر ماهي بسيطة ابدا وصعبة جداً والخسران غالبا يقع على الزوجة اكثر
الزوج عادي يطلق ويتزوج خلال شهر وليس لديه عدة يعتد فيها وليس لديه ما يعيبه إلا جيبه
حتى الجيب الان ماحد سال في اللى جاهزة من جميع بس تبي فحل وبس للاسف الشديد
هذا الواقع الذي عجزت ان افهم ليش حنا وصلنا كذا
اعرف واحدة تطلقت من زوجها وكان هو خسيس نذل حق حريم والله تزوج وهي جالسة لها أكثر من خمسة عشر سنة بدون زوج وهو لقي من يأخذه برغم ماضيه الأسود ،،
شوفي يا طعن قلبي انا زوجي تغير علي وحسيت في شيء غير طبيعي به ،،،،وعرفت السبب والله أني صابتني حالة ما ودي أتذكرها واحمد لله على نهوضي من بعد سقوطي
تدرين صرت أبرمج عقلي وقلبي انت لا تعنيني بشيء والله اني تحسنت كثير
لآني وضعت في فكري هذا الشيء وبرمجت عقلي وقلبي على قبول وزدت قرب من الله ولله الحمد والمنة
وسحبت جميع أموري مالية منه وخليته يندم بطريقتي لكن حاطه في بالي ان الطلاق بضاعف خسارتي ويزيدها كثير لذلك عدلت عنه حاليا
تدرين كذلك برمجت نفسي اني أنقذ ما يمكن إنقاذه بقدر المستطاع وبكل الأساليب والحيل وبكذا اخذت حقي وجلست على عيالي وحللت بيتي اللي تعبت فيه وجالسة على محب ومبغض ولا افرح علي أعدائي وشمتهم في وخليهم يغزوا رايتهم ،،،،،،
الحياة ياقلبي تحتاج صبر وشكر ،،،صبر على الشر وشكر على الخير
بعدين الكمال لله والسوق فيه القبيح والمليح والحظ يلعب دوره كثير
الرجل ممكن بغمضة عين يتغير وبدون مقدمات او اسباب لذلك اجعله فيما بينك وبين نفسك عدوك وفيما بينك وبينه صديقك وبكذا تكوني مأخذه حذرك منه لكي تأمني مكره وكيده
ولا تزعلي واستقبلي الشهر هذا صلاة واستغفار وصدقة ودعاء بإلحاح والله سميع قريب مجيب

بعدين كونه ما طلق معناه حاطك تحت إبطه وانه يريدك فممكن اهلك كأنه يطلبون صك طلاقك وهم يحركونه
بطريقتهم فاحتمال يرجع لك فإذا طلب ارجعي علشان عيالك وجربي ماتدرين لو يعتدل او يتغير للأفضل
بحكم أمك خالته كان متوقع أخباره عندكم وتوسط سهل بينكم
أيد الرجوع ولا احبذا الانقطاع كذا

طبيعي يسوي كذا لانه ماطلقك،، ماحس انك بايعته،،حاس انك بيوم ممكن تدورينه لانك ماطلبتي الطلاق..يا اما ارجعي له وعيشي حياة زوجه طبيعيه وتجاهلي نزواته او تطلقي وعيشي الحريه بكل معانيها امساك بمعروف او تسريح باحسان التعليقه اللي انتي فيها مال امها داعي

قرأت مواضيع لك من قبل.. ويؤسفني أن وضعك لا زال معلق..

حل مشكلتك عند أهلك.. طريقة تعاملهم مع المشكلة خلته ياخذ الموضوع كفترة نقاهه وتغيير جو..

لو حزموا معه ووضعوه أمام الأمر الواقع وقالوا بنتنا ما نرضى عليها بذا الوضع.. وأجبروه على اتخاذ قرار وشعر أن خلفك رجال.. لهمه أمرك وحسب حسابك وما بقيت معلقة..

التعليق هو الذي يسبب التعب النفسي لأنك لا تدري ما هو وضعك.. لست متزوجة حقيقة ولست مطلقة حتى تقبلئ الكفء لو أتى..

سيكون الأمر صعب عليه وسيهم ويفكر بموضوعك بجدية لو شعر أنك ممكن أن تتزوجي وتبني حياتك بعيدا عنه.. ولا يعني ذلك أبدا البعد عن أطفالك.. أما وضعك هذا فكأنه وضعك في درج مكتبه ليسترجعك في الوقت الذي يريد..

ووظيفة أهلك تحولت من حمايتك والدفاع عنك ونصرتك.. إلى حفظك لزوجك الذي علقك إلى أن يتنازل ويتفضل بإرجاعك .وكأنك من أجرم بحقه..

الخلاصة.. في نظري أن الحل في موضوعك أن يتحرك أهلك ويشعروا زوجك أن خلفك رجال.. ويضعوه أمام خيارات محددة.. إما أن تتمسك ببنتنا وتكرمها وتعزها وتحسن إليها وتعطيها حقوقها.. وإما أن تسرحها بإحسان لتحدد خياراتها وتبني حياتها بعيدا عنك بالطريقة التي تريد..

الله يوفقك وييسر أمرك ويصلح شأنك..
...
..
.

__________________
سأكتبُ شعريَ الباكي ..... بدمع القلب لا الحبرِ
أُسَطِّرُهُ على كبدي ..... وأتركُ دَفْتَرَ الشِّعْرِ
جراحُ أحبتي في الأرضِ ..... تبعثُ عاصِفَ الفِكْرِ

ترددين انك عايشة حياتك ومستغنية

وتقولين تبين الطلاق

لكنك في الواقع لا زلتي مستميتة عشان تتعلقين باي امل بالرجوع

ومقهورة وكانه اول مرة او شي غريب او جديد تصرفاته وتفننه باساليب التجاهل

القهر تجاوزيه خلاص! الحياة فيها مليون شي حلو!

زوجك مااالي يده منه

خابزك

عاجنك

دارسك

حافظك

وحاطك بجيبه

اكبر دليل تصرفاتك

حتى عارف يقهرك باقل التفاصيل

ليش تراقبينه؟

اول شي وقفي لنفسك! خلاص ستووووب بلاش تعلقين نفسك!

تحررررري.. ليش تعيشين اسيرة ردود افعال ومواقف؟ و"نظرة" من شخص ياما خذلك؟

انتي مانتي فاقدة منه شي ومجربة الحياة بدونه!

ماعطاك الا الهم! خلاص تجاهليه!

تطلقتي او حتى لو ماتطلقتي! سالفته تاكل وتشرب وتنام معاك! لين متى ياطعن ياحبيبتي لين متى؟

حتى اهلك انا متاكدة مليون بالمية ماخذوا موقف قوي لانهم عارفينك

ولو كنتي فعلا مصرة ومقررة كنتي قررتي وضغطتي عليهم

بس انتي اصلا ماتبين!

السلبية هذي بدون اتخاذ موقف لحالها ذل

ياطعن انا احبك في الله وانحرق قلبي عليك.. ربي ماراح يضيع عيالك ولا بيضيعك!

لا تكملين على نفسك وتصيرين السبب باللي انتي فيه حرام عليك!

__________________

اختلافي عنك لا يعني اختلافي معك

ليه حارمه نفسك من الزواج والمتعه وهو مبسوط وعايش حياته بالطول والعرض ويتنقل من واحده لواحده يخ عليه ،، لازم تحطين حد لهذه المهزله اما زواج مثل الناس او طلاق وتشوفي حياتك خليك واثقه من نفسك ما ناقصك شي بس الرجل معروف ماله امان زي الثعلب هههههه اهم ماعليه مصلحته

ما أتصور رجل يهرب من البيت (( في حال وجود أبناء )) إلا بسبب قوي

أما نكد مستمر أو مشكلة بسببها مست كرامته سواء النسيب او الزوجة

طبعا هذا الكلام في حال الزوج طبيعي وسوي

الله يجمعكم علي الطاعة

لو فعلا تبين الطلاق اضغطي على اهلك وحركي عاطفة الابوه تجاهك
قولي كيف ياابوي ترضى على بنتك تنهان وانت حي
هو باختصار حاطك واهلك بجيبه وعارف وش وراكم
ولا لو انه شايف الجد والحزم من اهلك ماتجرأ يعلقك كل هالمده
المهم انتي مقبله على شهر الخير اجتهدي باللجوء لله والدعاء ومايخيب من رجا ربه