اسنان طفلتي الأمامية مسوسه - منتدى عالم الأسرة والمجتمع

22-10-2012, 02:01 PM

سنا نجمة

قلب المنتدى النابض

تاريخ التسجيل: Dec 2010

المشاركات: 519

اسنان طفلتي الأمامية مسوسه

السلام عليكم ورحمة الله و بركاته
بنات اسنان طفلتي الأماميةالأربع فيها حفر غريبة والظاهر انه تسوس
عمرها سنه ونص شسوي فيها
لو عرضتها لدكتور كيف راح يسوي
سمعت انه فـے تخدير كامل و خايفة عليها
ياليت اللي تعرف مستشفى فـے جده و لا مكه خاص للأطفال
و لا الحكومي أذا يسوها
تدلني الله يفرج هم الجميع

__________________

24-10-2012, 06:17 PM

داماس

كبار شخصيات المنتدى

تاريخ التسجيل: Mar 2009

المشاركات: 1,348

رد : اسنان طفلتي الأمامية مسوسه

وعليكم السلام ورحمة الله وبركاته ..

حبيبتي بنتك بعدها صغيره وصعب يسوون لها حشوات فهالعمر ..

لكن يبالك تتأكدين اذا هي تصبغات على الاسنان والا فعلا تسوس ..

بنصحك نصيحه ارجوكِ اعملي بها ولا تهمليها ..

اذا قررتي تاخذينها لطبيب خذيها لمختص ومو دكتور اسنان عام ..

واهم نقطه .. اول مرة او مرتين خذيها زياره فقط ..

واطلبي من الطبيب يكشف على الاسنان وما يعمل شيء للعلاج ابدا ..

هذه النقطه مهمه جدا وكل اطباء الاسنان يعرفوها لكن للاسف كثير منهم ما يعملوا بها

ضروري جدا الطفل يتعرف على المكان ويحس بالامان وما يربط العياده بالالم ..

وسويها مع كل اطفالك .. خذيهم للعياده للكشف على اسنانهم وبكذا ما راح يخافون من طبيب الاسنان ابدا ان شاءالله ..

تعرفين اغلب الناس ما يزورون الطبيب الا وقت يحسون بالالم .. وطبيعي وقت العلاج بيحسون بالالم .. ولذلك يكرهون عيادات الاسنان .. اذا عودتي اطفالك على زيارات دوريه ما راح ياخذون هذه الفكره عن عيادات الاسنان..

المهم نجي للامورة الصغنونه ..

اذا اسنانها فعلا مسوسه .. تسوس بسيط .. ممكن يحطون لها فلورايد .. وحسب درجه التسوس عندها ممكن يكررونها كل شهرين او ثلاث او اربع شهور .. وتعملي تشييك عليهم بين فترة و فتره .. لانه صعب جدا الحفر والحشو في هذه السن ..

طبعا الفلورايد مو علاج قدر ما هو وقايه .. لكن اذا التسوس في بدايته الفلورايد ممكن يمنع تطوره لانه يقوي الاسنان ..

وفي نظام اسمه airflow .. هو عباره عن رذاذ ماء و هواء مضغوط و ماده بيكربونات يشيل التصبغات ,, اصله للتنظيف لكن ينفع مع التسوس البسيط ..

....

واذا كانت تصبغات ممكن تكون من الاكل .. او فيتامينات اذا تعطينها .. او الفلورايد .. وبعض الادويه اذا اخذتيها وانتي حامل ممكن تسبب تصبغات على اسنان الجنين في مرحلة التكوين ..

....

نصائح عامه ..

امنعي عنها الشكولاته والتشيبس والمصاصه او حاولي ما تعطينها الا مرة او مرتين في الاسبوع
ودائما حطي في بالك .. اذا اكلت مرة واحده في اليوم وكميه كبيره هذا احسن من انها تاكل كميات صغيره على فترات في نفس اليوم ... ( يعني عدد المرات اهم من الكميه )

اذا تشرب حليب صناعي .. لا تخلينها تشرب من الببرونه وهي نائمه .. خليها تشرب وتخلص .. فرشي اسنانها و شربيها ماء ثم تنام ..

اذا متعوده على اللهايه انتبهي تغمسينها في العسل او اي شيء حلو ..

شجعيها تاكل فواكه كثير.. وحاولي تعطينها عصائر فرش ..

فرشي اسنانها مرتين باليوم ..

والله يحفظها لك وطمنينا عليها ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه