13-03-2016, 05:13 PM
14-03-2016, 03:42 PM
14-03-2016, 04:20 PM
15-03-2016, 01:46 AM
|
المشاركة الأصلية كتبت بواسطة لماذا نتزوج ؟
جزاكي الله خير على الموافقة واشكرك على اطراؤك الجميل الله يسعدك ويجعلني عند عشمكم فيني مساء الخير اخي الكريم لماذا نتزوج؟ بعتذر عالتأخير العفو وبدون مبالغة ما قلت الا الحقيقة واللي انا شايفته بشخصك الكريم نبدأ بسم الله بسم الله وتوكلنا على الله 1- النشأة : س1- هل وجدتي نفسك كذا بتقولي كلمات حلوة تفاؤليه تشرح الصدر وتشحن الطاقات، ام علمتي نفسك بنفسك؟ للصراحة صعب كتير يحكي الانسان عن حاله بس رح حاول اني جاوب باسلوبي البسيط وبكل عفوية وعيت هيك وممكن لنشأتي يكون الها دور بين أب حنون كتير اقرب الى الصديق وجدة وجد بقمة الحنية يعني اذا بتسمع جدي او جدتي كيف بيحكوا مع بعض او كيف بيحكوا معي عالتلفون او مع زوجي بلحظتها قلبي بيوجعني من السعادة من كلامهن الطيب الحلو اللي بتحسو نابع من قلبهن وبيوصل لقلبي مباشرة وبين اعمام وعمات الكل بيعبر عن عاطفته والكل لسانه حلو وبالأحرى عائلة بابا كلها متماسكة وناس بسطاء وعلى طبيعتهن لدرجة اعمام بابا بعتبرهم متل اعمامي الدرجة الاولى على سبيل المثال انا وصغيرة كان عم بابا بيحضني وبيعطيني قبلة وبسمع منه الكلام الطيب ولحد للآن تعامله معي ما اتغير ونفس الشي اعمام ماما واخوالها وبيت جدي ناحية ماما بس كان صلتي باهل بابا اقرب بكتير وبيعبروا اكتر وهالشي اعطاني اشباع وممكن فائض كمان وزوجي دايما بيقلي من بعد ما عاش بين اهلي وعائلتي انك اخدتي حنان وشبعتي منو كمان بعترف اني عشت طفولة ومراهقة بشكر ربي دايما عليهن ليل نهار لانهم من اجمل ايام حياتي واعطوني اشيا كتير لقدام مع انها كانت حياة بسيطة ومتواضعة ومرات دون الوسط بس كنت حس بالسعادة واتلاقاها من اللي حولي وهالشي ما كان فيني لوحدي فعمتبي اللي اكبر مني بتلات سنوات وقت كانت تكون قاعدة بسهرة تلاقيها تعطي المكان طاقة وحيوية وفرفشة وبيشبهوني الها في خال بابا وابناؤه اذا بتجلس معهن بتاخد تفاؤل وسعادة وطاقة لسنين لقدام من دون مبالغة جلستهن لا تمل عنا مثل بيقول بيشيلوا الهم عن القلب جدتي ام بابا ربي يطول بعمرها كانوا رفقاتي يجنوا فيها كانت تجلس تمزح معهن وكأنها صبية بعمرهن كانوا يخرجوا من عندها والضحكة طالعة من قلبهن كنت انا وعمتي اللي بعمري نقعدها ونلعب لعبة الكوافيرة مع جدتي ونعملها عروس وتصير ترقصلنا جدتي بختصرها بكم كلمة منبع الطاقة ومصدر الحنان وانشراح الصدر وسبب الضحكة المرسومة عالوجه ممكن هيدول كلهن اللي خلوني لا شعوريا هيك فما بعرف هل هالشي وراثي او اكتسبته من طفولتي للآن س2- هل تختاري الكلمات ام تخرج نفسها بنفسها؟ ما في احلى من العفوية بكل شي واخي اصغر مني بسنة واذا بيحيكني بيستعمل معي نفس الاسلوب وكلامه بينقط عسل مع انو نحنا وصغار كنا ما نتفق كتير ببعض الاشياء واخي اللي اصغر بخمس سنوات بحبه كتير ونقطة ضعفي وحنون وخدوم بس ما بيستعمل نفس كلمات اخي اللي اصغر مني بسنة وانا نفس الاسلوب مع اولادي واصحابي واصدقائي وأقربائي والناس اللي برتحلهن وحتى العضوات بالمنتدى صحيح عالم افتراضي بس باخذ عالظاهر ومجرد ما ارتاح لشخص كلامي بيكون صادق معو واللي بقله ياه بيكون نابع من القلب على فكرة بسمع كتير انو كلامي حلو مع اني ضد اللي بيكون ملسن بالكلام ظاهريا وبالداخل ربنا اعلم فيه وبنواياه ما بحب لبس الاقنعة وبنفس الوقت ما بلوم بعض الناس اللي بيلبسوا القناع لانو الناس اجبرتهم على هالشي بشرط ما يكرن بوجهين وبلسانيين س3- هل الكلام صادر من العقل ام من القلب؟ بشكل عام من القلب لانو هالشي بيظهر دغري وبيوصل اسرع لدرجة البعض بيشوفني شفافة واعتبروها سلبية فيني لانو ممكن اللي عم اتعامل معه ما يكون نفس الشي وهالشي بيخلي الشخص الطيب بيتأذى بسهولة فمع الوقت بيصير الانسان يكتسب اشيا وهالكلام مرتبط بالسؤال الاول عن الاكتساب ومن تجربة صارت بتعاملي مع اشخاص لمدة اكثر من عشر سنوات ما استعملت العقل الا من بعد ما وصلت لمرحلة الانفجار واتأذيت نفسيا بس هالشي خلاني بشكل خاص وقت احكي معهن احكي بلغة العقل وقليل جدا بلغة القلب وهالشي ما بريحني بس مضطرة اتعامل معهن لاسباب معينة ومرات وقت احكي عن التفاؤل والسعادة مع العضوات بيطلع الكلام من القلب والعقل معا لانو اوقات الظروف بتخلينا وتجبرنا نكون اقوى منها وتخلينا نسعد انفسنا بايدنا ان ما ااجت السعادة بنفسها ما حلو الاستلام حلو كل شي بوقته وقت الحزن للحزن ووقت الفرح للفرح ما نعيش اسيرين لحالة معينة ونغرق فيها وخاصة ان كانت بتخص الاحباط واليأس والتشاؤوم فاجباري لازم نفكر لنقرر لنوصل لنتيجة ترضيتا او اقل شي تريحنا س4- كيف بتطلع معك هذه الكلمات؟ كيف احساسك ونيتك وهدفك وطريقتك عند قولها؟ صدقني هلئ شايفة صعوبة بالكتابة لانو طبيعتي وقت كون عم احكي مع شخص بحكي تلقائيا وبشكل عفوي ومرات كتير ما بلاقي حالي عندي شي وعلى سبيل المثال بالمنتدى بتطلع على مواضيع بحس انو ضاع مني الكلام بكتفي بالمتابعة بصمت ومرات بلاقي الكلام بيتدفق من دون تدقيق واسلوب منمق واختيار كلمات مناسبة ممكن تشوف بشخصيتي التناقض بكل شي ما بحب اتقيد لانو هالشي بيخنقني بحب كون متل ما انا بسلبياتي وايجابياتي وما عندي اي مشكلة بالاعتراف باي وحدة منهن هالشي مش مثالية بس حالة سلام مع النفس ومتلي متل اي شخص فيني الحلو وفيني العكس بضحك وببكي بنفس الوقت فاحساسي بيكون كتير حلو وقت شوف انو كلامي اسعد شخص اللي عم اتعامل معو وهالشخص بيكون شايفته انسان قلبه ابيض وشفاف وفيه الخير وعنده اشيا كتير حلوة بس ممكن كانت ظروفه بتختلف عن ظروفي وبيئته عن بيئتي فما اتلقى اللي انا اتلقيته وهالشي اثر على طريقة كلامه واسلوبه في التعبير وهالشي ما بيعني انو انا مميزة عنو بس شاءت الظروف كون انا هيك ويكون هوي هيك س5- لماذا بتستخدمي هذه الكلمات الطيبات الحلوين؟ |
16-03-2016, 01:22 PM
16-03-2016, 03:32 PM
16-03-2016, 04:53 PM
|
المشاركة الأصلية كتبت بواسطة mimomea
والله يا اخي لماذا نتزوج على قد ما السؤال واضح وعلى قد ما بتشكرك لانو طريقة طرحك للاسئلة قريبة لاسلوبي ولهجتي وبساطتي بالكلام على قد مش عارفة كيف وصلك الجواب
لانو اذا بسأل حالي انا ليش بستخدم هالكلمات ؟ هل لانو طبعي بيحب المرح او انا من الشخصيات المتفائلة واللي كنت معروفة بايام الدراسة بخجلي مع الاشخاص العاديين وبجرئتي وفرفشتي مع الاشخاص المقربين او اللي بتحب تضل تسمع هيك كلام لانو ربيت على هالشي ولانو هالشي بيعطيها شعور كتير حلو فبتحب تخلي الاشخاص اللي بتتعامل معهن يشاركوها بهالاحاسيس الحلوة او لاني اتعودت اسمع هيك كلام فصرت اعطي هالشي تلقائيا او....الخ بتمنى كون قدرت اعطيتك الاجابة اللي بدك ياها اخي الكريم لماذا نتزوج ؟ واذا حسيت في شي ناقص بتمنى تسألني عن اي شي لهلئ بعد ما وصلك اخي الكريم وسعيدة بحواري معك احترامي |
فسألتها مين؟
17-03-2016, 03:53 AM
|
المشاركة الأصلية كتبت بواسطة لماذا نتزوج ؟
2- التطبيق: س1- هل هي في المنتدى فقط ام مع اناس محددين ام مع كل الناس؟وهل فيه اناس مايستاهلوا كلامك الحلو؟ صباح الخير اخي لماذا نتزوج ؟ وبعتذر منك عالتأخير اسلوبي الحمدلله محترم مع الجميع بس اكيد في حدود مع الناس ومش الكل بنفس الطريقة والاسلوب يعني مثلا في اشخاص بتحس من اول مرة او من بعد عشرة عمر انك المفروض تضل واضع رسمية بينك وبينهم وتضل ضمن الاحترام لانه شخصيتهم هيك وبتفرض عليك ما تتخطى حدودك معهن ولو بالكلام الحلو وفي اشخاص بتحس انهم بيشبهوك فبتتعامل معهن باريحية اكتر والكلمة بتطلع تلقائيا معهن من دون عمل حسابات او مقدمات وهالشي بيصير معي داخل المنتدى او بمواقع التواصل وكل ما يخص العالم الافتراضي او خارجه من عالم واقعي بس الاسلوب بشكل عام دايما لين بالرغم من اني ببعض الاحيان عصبية الا اني مع الناس مستحيل عصب ولا بقدر عصب او يكون كلامي قاسي فحسب عشرتي مع الناس بسمع منهن انو بفوت بالجو دغري وكأنهم بيعرفوني من زمان س2-حسب مافهمت من اجابتك على فقرة (النشأة) ان هذا الكلام الطيب الحلو شيء تعودتي عليه منذ الصغر، طيب مع التطبيق هل اضفتي شي او حذفتي شي؟ صحيح البيئة اللي انا فيها هالشي فيها عادي ومنتشر ومش مستهجن وطبعا ما بيخلى الامر انو في اشخاص ما بتعبر بالكلام وممكن تفكرها خالية من المشاعر او توصفها بالجماد بس الغالب الكلام الطيب منتشر بشكل كبير أضفت ممكن ايه الانسان بكل مرحلة من عمره بينضج فكريا وتعبيريا وبيتطور وبتتطور معو طريقة كلامه ورح تكون في اضافة للاحسن اما حذفت ما بتذكر انو في شي كنت اسمعه او اقوله وبعدين وقفته 3- اثرها عليكي: س1- هل عائلتك (زوجك وابناؤك) مستفيدة من هذه الكلمات ( هل يرون هذا الجانب المشرق والمضي والبلسمي منك؟) وهل لهم نصيب من ذلك ؟ (لانك قلتي قبل كذا انك عصبيه مع عائلتك) اكيد ولو بالدرجة الاولى لانو نفسي صارت نفسهن اذا ما اشبعتهن هالشي انا كيف بدي اتلقى منهن بالمقابل او كيف بدي استحق كلامهن وبالاساس انا بحب نفسي وبحب اسعدها واكيد مستفيدين ورح يفيدوا بعدين نفسهن اول شي وبعدين العيلة اللي رح يأسسوها بعد عمر طويل اذا الله راد وتعاملهن مع الناس كمان وقت اشبع ابني او بنتي او زوجي كلام حلو فتلقائيا رح يعبروا بنفس الاسلوب وعنا مثل بيقول من عاشر قوما اربعين يوما صار منهن او رحل عنهم ما بعرف اذا هالمثل جبته بمحله ههههههههههه بس طبعا انا لامست هالشي مثلا ابني الكبير مع كل عصبيتي وقت كون معصبة ما بتتخايل كم مرة بيحضني وبحضنه بالنهار وحتى بالطريق اذا كنا ضاهرين حتى بيعطي رأيو فيني وبيمدحني من فترة تلات اشهر تقريبا كان عند اولادي تدريب عالتزحلق عالجليد وانا اللي باخدهن اجمالا فطلبت من زوجي يوصلهن وبرجع انا بلحقهن المهم وقت وصلت وفتت صرت احضرهن وصورهن ونطرت لخلصوا فبس ضهرنا ونحنا عالطريق ابني الكبير قلي ماما بتعرفي اول ما وصلتي قلت ماشاءالله كيف كنت طالعة انعجبت فيكي وفرحت انك ماما وحسيت بشي بقلبي ما بقدر اوصفه ما بتتخايل هيدا الكلام شو عمل فيني مع اني بسمع اقوى منو بس وصلني من ابني وحسيت فيه بكل كلمة وكل حرف وكل معنى وبالنسبة لعصبيتي زوجي واولادي واهلي بما انو مستحيل عصب قدام اي حدا مش لانو لازم حافظ على تصرفاتي قدام الناس بل بالاصل انا ما بعصب مع اي حدا خارج نطاق اهلي وبيتي وتلقائيا بكون وحدة تانية العالم ممكن تقول نيالها على حياتها ما في شي بيأثر فيها ويعصبها سبحان الله تناقض بشخصيتي انا ما بفهمه وزوجي لهلئ بيشوفه لغز فالخلاصة اولادي وزوجي واهلي متقبليني بكل حالاتي لانهم بيعرفوا انو بعد شوي انسانة تانية رح تكون وحافظين شخصيتي وحتى ماما اجمالا عصبية فزوجي وقت تعصب مرات بحب يزيد عصبيتها وبعد شوي بقلها شو ما حكيتي بعرف انو قلبك طيب يا مرت عمي وبتنسي دغري يعني زوجي ما عاش من الاساس مع ماما ومتفهم عصبيتها وبيحبها متل ما هيي صهري زوج اختي وقت ماما تكون معصبة بيضمها وبيطبع قبلة على خدها وبيعملها حركات لتضحك بابا دايما بيبرر عصبيتها انو اكيد بتكون متضايقة أمكم او حاملة هم العيلة او انتوا زاعجينها يعني عصبيتي ما اثرت سلبا او بالاصح نفسيا على عيلتي لانو متل ما بعصب في بالمقابل بدلع وبضم وبلعب وبدلل وبكون فرفوشة لابعد الحدود س2- هل هذه الكلمات بتنعكس عليكي؟ ( نعم نريد نشر السعادة مثلك وكسب الحسنات، ولكن هل هناك مردود نفسي لها لنفس الشخص القائل لها؟) اكيد كل شي داخلي بيعكس عالخارج بسميه مراية للشخص ذاته فوقت كون عم قول كلمة حلوة وصدقا بتكون طالعة من القلب ان كانت لعيلتي او لاقربائي او لصديقاتي او للعضوات هون بالمنتدى بكون عم قولها من كل قلبي لانو مرتاحة مع الاشخاص ولا شعوريا الكلام بيطلع الهن مباشر مع انو في اشخاص بعرفهن سنين طويلة ان كان من المدرسة او من اول فترة زواجي بس سبحان الله بضحك معهن وببتسم وبحترمهن وبحكيهن باسلوب لين بس مش متل غيرهن بيضل في حدود لوحدي بوقف عندها من دون ما انا اعمل كنترول على نفسي وكلامي 4- السلبيات س1- هل عانيتي من قولك لهذه الكلمات اي معاناة (غيرة - دللت الشخص اكثر من اللازم وصدق هذه المجاملة وانقلب الى شخص ثاني - فهم خاطئ) ولي عودة بمشيئة الله تعالى للتعليق على اجابتك السابقة وردك الكريم والوافي والطيب |
20-03-2016, 01:59 AM
|
المشاركة الأصلية كتبت بواسطة لماذا نتزوج ؟
ماشاء ولااله الا الله الله يبارك فيكي وفي عيلتك الحنونة فرداً فرداً والله يديم السعادة والكلمة الطيّبة بينكم صراحة انا استخلصت من كلامك انك وجدتي نفسك كذا والظاهر ان اصولك من السهول عشان كذا طلعتي سهلة لينة خفيفة لطيفة وان شاء الله من اجوبتك على الجزء الثاني من الاسئلة ممكن نستشف كيف ممكن ننسخ منكم هذه الصفات الحلوة والظاهر ان غالب اللبنانين كلهم كذا ذهبت في مرة من المرات لزيارة احد اعمامي (وكان متزوج سيدة لبنانية بعد وفاة زوجته الأولى ) سألتني : كيفك ؟ وكيف الوالد والوالدة؟ قلت : الحمد لله بخير وبصحة وعافيه الله يعطيكي العافيه سألتني : وكيفها حبيبتك؟ انا : !!!!! تأخرت في الإجابه متفاجئ من قوة الكلمة وكأنها قالت كلمة عيب! واعتقد اني ماعرفت انها تقصد مين فسألتها مين؟قالت : زوجتك ولو. انا : اها اي والله صح زوجتي المفترض تكون هي حبيبتي هههه، بس تصدقي ياعمة كلمة حبيبتك موقعها هنا جداً صحيح. فوافقتني الرأي شاهدنا من القصة ان الكلمات الحلوة تجري في دماؤكم وان شاء الله نخليها تجري في دمائنا احنا كمان مشوار المليون ميل يبدأ بخطوة |
21-03-2016, 04:18 PM
| مواقع النشر |
ضوابط المشاركة
|
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|
العرض العادي
