السلام عليكم...

يجوز موضوعي أقرب للفضفضة لأني مشحونة جداً
طبعاً الكل يعرف إن بعض النساء " يكفرن العشير "
لكن شنو بخصوص بعض الرجال ؟!!!
اللي لما يزعل.. يبدأ بالكلام الجارح
انتي غلطة حياتي
وانتي كارثة
وانتي مُتعبة
وأنا الغلطان اللي قاعد معاج كان المفروض اقعد في الصالة
وانتي وانتي وانتي ...
في دقيقة وحدة ينسى كل شششيء سويته عشانه!

الغلطة والكارثة والمتعبة صوتها ما ترفعه عليه في أقضى حالات الغضب!
أحياناً اغبط اللي يتكلمون عن مشاكلهم عند أي أحد .. صديقات .. أهل .. جيران .. أي أحد!
أتمنى لو اقدر أتكلم عنه واغلط عليه وادعي عليه!
أتمنى اجرحه بالكلام!
وهو يتكلم ويتهاوش وآنه في داخلي أقول ألحين بجرحه بالكلام و بغلط عليه.. بس ما اقدر!!

الشيء الوحيد اللي قدرت عليه لما بدأ صوته يرتفع رفعت صوتي بجملة وحدة وقلت له : لو سمحت لا ترفع صوتك فقط!

ولما يهدأ يرفعني لسابع سماءءء!
انتي زوجتي المميزة اللي ما استغني عنها ووو إلخ..
والمطلوب مني ان ابتسم واتجاوب
ولا راح أكون النكدية!

تعبت من تجريحه بالكلام! شنو يعني كرهتج عسى ما شر ذابحة عيالك وموزعة جثثهم كل واحد في بلد!
ولا بايقة حلالك!
ولا آنه اللي شريت حق ابوك تذكرة حق يسافر يتزوج
ولا آنه اللي كسرت عظام اختك
أي والله كارثة!!!!
طبعاً الشيخ ( كلمة الشيخ نقولها مثل لما اخوانا المصرييين يقولون سي السيد ) .. المهم طبعاً الشيخ طال عمره ترك كلمة راح اطلقج
واتجه لكلمة " خل نعيد النظر في حياتنا "
طبعاً المعنى واحد .. بس شفتو شلون الفيمتو كثيف نخففه بالماي ؟ بس في كل الأحوال هو فيمتو ما بيتحول كولا!

قاعد يتراكم كلامه في نفسي
فجأة احس ان كرهته..
اليوم من قهري فتحت كل المكيفات وليتات ( لمبات ) البيت والمراوح .. قلت خل فاتورة الكهرباء تتضاعف عليه...
بس عورني قلبي وسكرتهم..
في هاللحظة احس كرهته
واعرف لما ارجع اقرأ موضوعي راح اندم ان كتبت عنه جذي..

شلون اخفف لسعات لسانه ؟! واتجنب انه يجرحني ! لأن كلماته وايد تأثر فيني و في نفسيتي
للأمانة صح ما يشتم ولا يسب ولا يتلفظ بكلمات نابية ..

__________________

حاجة الناس إليكم من نعم الله عليكم ، فـ لا تملوا النِعم ☁✨

والله يا اختي الانسان العاقل
لايرضي الكلام الجارح لشريكة
حياتة فختيار الكلمات لشريك
ذكاء وحكمة وايضا بالمقابل
لايرضي بالكلمات الجارحة منها ابدا
فالحياة احترام وتقدير
الله يعينك
بعدين رجال بلدكم والله خلوقين بحكم
معرفتي بكثير منهم ويختلفون عن باقي
الدول الاخرى المجاورة

__________________
سبحان الله وبحمده سبحان الله العظيم

حبيبتي زين ابيها
بعض الرجال فعلا يكفرون العشير
ومن اي زله بسيطه يطلع الاولي والتالي

هنا نجي لنوعين
اللي يخبص بالكلام.. ويتحسف ويراضي
واللي بعد التخبيص يطنش ويكابر
زوجك من النوع الاول
وهذي بحد ذاتها نعمة
ودليل انه يحبك وعارف ان عنده مشكله
بس مو عارف يتخلص منها

نجي لهدوءك.. ايش معنتاه؟
انك عارفه مكانتك ومقدره نفسك
وداريه ان كلامه ماله اي معنى
يعني باختصار مو ماخذته بمحمل الجد
وهذا ماشاء الله ذكاء ورزانة


عارفه بقول لك شي
الزوج اللي من نوعيه زوجك
غالبا عصبي وبصلته محروقه مع كل الناس
يعني طبع غالب فيه
المصيبه الحقيقية اذا صار مع الزوجة بس
لما مع الناس لسانه ينقط عسل
ومع الزوجة لسانه زي المنشار
والحمدلله ما اتوقع زوجك من هالنوعية
واذا صدق كلامي فاحمدي الله الف مره
معناته الموضوع خارج عن ارادته تماما
هو مو جالس يتعمد استفزازك
اوكي كلامه يضايق ويغث
بس فكري بهالابعاد حتى ترتاحي


اذا هذي مشكلته الوحيده
ماقدامك الا الدعاء
الله يصلحه ويهديه ويسخره لك

الله يهديه و يسامحه
لو بس يهدي اعصابه .. ما فيه احد احسن منه
هم فعلا طيبين و خلوقين
وهو بعد خلوق ...
عيبه اذا عصب كلامه جارح
خصوصا كلمة انتي غلطة .. تقتلني

__________________

حاجة الناس إليكم من نعم الله عليكم ، فـ لا تملوا النِعم ☁✨

مع الكل جذي .. من أقل شيء يعصب و يتنرفز
اعصابه دايما متحفزة لدرجة متعبة
كأني عايشة مع حقل ألغام مع أقل كلمة ينفجر
و في أقل من ساعة يتعامل طبيعي ويبيني اكون طبيعية وانسى الكلام اللي قطه
واذا ناقشته او زعلت وما تجاوبت معاه طبعا بيعصب مرة ثانية وآنه النكدية اللي محد يحب يجابل ويهي
الحمدلله على كل حال ..
بس نفسيتي تتعب
لازم ادقق في كلامي عشان لا يتنرفز
والقهر لما يفرغ عصبيته يقول : حبيبتي ليش تخليني اعصب
!!! تعجبني البراءة !!!! له عين يعاتب...
فعلا اغبط اللي تقدر تجاري زوجها لما يرفع صوته ترفع صوتها
ولنا يجرحها تجرحه ..
على الاقل ما تآكل في روحها مثل اللي يصير لي الحين

__________________

حاجة الناس إليكم من نعم الله عليكم ، فـ لا تملوا النِعم ☁✨

خذتينا بشراع وميداف ههههه


انزين ماقلتي انتي اشقلتيله وخليتيه يعصب !!!!

ما سويت له شيء..
هو منبهني ان اذا كلمني واتس اب ارد عليه
يعني مثلا لو كتب : اليوم برجع من بره الساعة 12
لازم ارد عليه بحيث ان يتأكد ان قريته مو بس فتحته والسلام
لان يحس اهانة لما تقرين وتسكتين
اليوم صار الموقف بالمقلوب .. نبهته عصب
هذا الصبح


الظهر سألني عن بطاقتي الذكية والليسن
قلت فيه في السيارة بنزل البارك اجيبها
عصب على ان ليش شيء مهم مثل هذي تبقى بالسيارة
انزين الليسن طبيعي يبقى في السيارة .. اكيد ما باعلقه على رقبتي وبفتر فيه ..
بطاقتي و ليسني عساني احرقهم أو اتبرع فيهم .. كيفي!

العصر .. كنت مقهورة ان الشغالة سوت شيء وما استأذنت مني .. هو شاف ان نرفزتي مو في محلها ..قلت له ان هذي تقليل احترام لي المفروض تستأذن لان سبق و نبهتها..
عصب ان ليش تكبرين المواضيع... انت شكو .. شيخصك .. شعليك


شخص صعب التعامل معاه
دايما هو الصح اللي ما يغلط .. اعوذ بالله
آمنت بالله...
بس ليش تغلط بالكلام .. ويدور الكلمات اللي يعرف ان تجرحني
وسبق و نبهته عليها

__________________

حاجة الناس إليكم من نعم الله عليكم ، فـ لا تملوا النِعم ☁✨

تدرين ليش ماتقدرين ترفعين صوتك وتردين عليه
لانك انسانه متربيه زين الله يسعدك ويحفظك
اما زوجك اختي العصبيه هذي طبع في بعض الناس
لكن العصبي اغلب الاحيان قلبه طيب ويندم بسرعه
عكس اللي يكتم بقلبه وينفجر مره وحده
فـ انتي اعرفي كيف يكون تعاملك معه

اقري سورة البقره يوميا يازين
ماتاخذ اكثر من ساعه
وفضلها وبركتها عظيمه
وتبعد عنكم الشياطين الي تسبب بالمشاكل

اكره هالنوعية من الناس انا شعلي من قلبه اذا لسانه بذيء

الرسول صلى الله عليه وسلم حذّر ونبه من سلاطة اللسان

في ما معنى الحديث ان شر الناس مجلسا يوم القيامة رجل تركه الناس اتقاء فحشه

والله لا يحب الفاحش البذيء


مادري شنو ممكن اقدر تفيدج فيه
بس فعلا هالنوعية تنرفزني ....

__________________
لا اله الا انت سبحانك اني كنت من الظالمين