بسم الله الرحمن الرحيم


انا في مشكلة تكاد تقتلني ولم اجد لها حل سألت مختصين مالقيت حل لمشكلتي
حتى اقرب الناس لي لا يستطيعون تقديم النصيحة لي

اتمنى الآقي الجواب الشافي


تزوجت عمري 18 سنة والشخص اللي تزوجته اكبر مني 7 سنوات

عشت حياة مهينة جدا في منزل اهلي

ابي قاااااااااسي جدااا علي وعلى اخوتي وكذلك امي

كان الحل السليم لي ولأخواتي الزواج والخروج من المنزل حتى لو كان الشخص غير مناسب

ابي قاسي لدرجة اني الى الآن اخاااااافه لدرجة غريبه

تخيلوا عمري 28 سنة اخاف من والدي لدرجة اتصبب عرق اذا سمعت صوته وقلبي يخفق بشدة

اصاب بخووووف من سماع صوته او حتى لو نظر الي .. لدرجة اني احس اني اكرهه استغفر الله العظيم والله من شدة تعذيبه لي ولأخوتي ولأمي الله يصبرها ويجزاها كل خير على ماتحملته لأجلنا انا واخوتي ..






المهم ..

انا بطبعي رومانسية كثييير هــادئة خجولة
حياتي كلها خيالات واسعة واحلام يقظة من سن المراهقة الى الآن



تقدم قريب لي قرابة شديدة لخطبتي اهلي وافقوا عليه وانا بعد وافقت عليه
وفي فترة الملكة (عقد القران ) واستمرت سنة احببته حب جنوووني
حب لا يوصف ولا يقدر لدرجة اني اصبحت مريضة بحبه
وذلك لأني رايت فيه فتى احلامي الشاب الوسيم الحنون الرومنسي ......الخ

بعد سنة تزوجنا واكتشفت من اول زواجي انه مختلفين لدرجة كبيرة
طريقة كلامه اسلوبه تصرفاته كأنه شخص ثاني مو اللي عرفته لمدة سنة كاملة
سألته انت متغير مو انت اللي عرفتك قبل ؟انت كنت هادئ حنون رومنسي تحتويني وتأسرني بحنانك

فكان رده لي بكل سخريه السمكة اذا حبيتي تصطاديها وش تعملي لها ؟؟
سكت وصرت اطالع فيه بإستغراب
قال: اكيد تحطي لها طعم صح ؟ انا احبك وما كنت اعرف كيف اوصل لك ولمن سألت عنك
قالوا لي لينا رومانسية مره وعايشة في قصص الروايات العاطفيه
كلمة احبك مع وردة حمراء عندها تسوى الدنيا ومافيها فعرفت الطريقة المناسبة اللي اكسبك فيها واخليكي توافقي على الزواج مني....
احسست بإختناق اطراف يديني ورجلي تقلصت وصارت تألمني وهذي الحالة
كانت تصير لي فقط اذا والدي جرحني بكلامه او ضربني..
جلست ابكي كثير لأني كنت انتظر الفرج من حياة العذا ب اللي كنت اعيشها

قلت في نفسي هو يحبني وهذا يكفي راح احاول اغير من طبعه اخليه يستمتع بالهدوء وبالنعومه
اخليه يحس بمعنى الحب ويشعر فيه

المهم قلت الصبر من عندك يارب اول زواجي كله مشاكل ضرب اهانه اهمال
قلت يارب طفل ينسيني كل همي وانشغل فيه

مرت سنه والثانيه وما انجبت رحت لكل الأطباء ماخليت دكتور مارحت عنده وكلهم قالوا مافيني شي يمنع الانجاب
ومن كثر ما تعب من الذهاب المستشفيات وكثر ماصرف ماديا
قال لي في سر خبيته عنك قلت خير ان شاء الله
قال بصراحة انا عندي سكر وضغط هو سبب لي ضعف وغير كذا
عملت عمليه من زمان قبل الزواج والدكتور قال لي انها راح تمنع من الانجاب
لكن ينفع نعمل اطفال انابيب وافقت وعملت سبع عمليات طوال فترة زواجي
كنت اشوف الوان العذاب فيها والله العظيم كنت اتعذب وهو سهر واصحاب ولا يدري بعذابي وتعبي
وكان حملي يستمر شهرين فقط وينزل

فكانت الصدمة الثانية والأكبر
اتمنيت اموت ولا اسمع اللي سمعته

استشرت جدي قال يابنتي تطلقي منه والله يعوض عليك
فكرت بالموضوع لقيت انه صعب ارجع لبيت والدي صعب ارجع للجحيم مره ثانيه
كان بالنسبة لي جحيم زوجي اهون من عذاب والدي


قلت بأصبر ...وبشر الصابرين

شغلت كل وقتي دراسه جامعه ومعهد ودورات طول وقتي دراسه وقرأة

بعدها زوجي صابه فشل كلوي والله وحده يعلم بحالي

واربعة سنوات وهو يعني من المرض كان طريح الفراش حتى الحمام اعزكم الله مايقدر يروحه



المهم الدكتور قال لازم عملية زراعة مستعجلة وكنت اول المتبرعين له

لكن طلع فصيلة الدم غير متوافقه

فتبرع له ابن عمه ....

فترة العملية والعلاج والمستشفيات والحمية وفترة النقاهه والسفر خارج البلاد كلها كنت معه لحالي لا اخ ولا قريب ولا صديق

كل يوم يبكي يقول لي سامحيني اعرف اني عذبتك وخدعتك و...و...و....و....و....الخ عرفت قيمتك وانك اهلي واحبابي واصحابي وكل حياتي..

بعد كذا قام بالسلامه والحمد لله عملت عملية اطفال انابيب وحملت للشهر السابع ونزلت الطفلة ميتة
والحمد لله على كل حال لكن ربي عوضني بطفلة يتيمة رضعتها وهي بالنسبة لي نور عيني


وطوال فترة زواجنا العشر سنوات الى الآن العلاقة الجنسية بينا تكاد معدومه...حاولت كثير معه بدون فائدة
بالنسبة لي العلاقة الجنسية مو مهمه .. المهم عندي العلاقة العاطفية احب انه يدللني يتغزل فيني
يحبني ويتفنن بحبي هذا اللي اتمناه منه وبس

كنت كثير اجي عند رجوله ابكي اقوله اهتم فيني شوي انا احتاجك وصرت اخاف على نفسي من تفكيري

لدرجة اني صارحته اني اخاف على نفسي من الغلط اترجيته يهتم شوي فيني

وكان رده لي اعرف تربيتك انت انسانه ماتعمل الغلط ابدا ..

المشكلة اني الحين ابي اطلق منه اعصم نفسي من الخطأ
وفي نفس الوقت والدي ممكن يذبحني ويموتني لو جبت طارئ الطلاق
مره والدتي فاتحته بالموضوع قال اموتها ولا تتطلق ماعندي بنات تتطلق
طبعا وخوفي منه يمنعني

حلم الطفولة والفارس الشهم لازال يطارد خيالي

ارجوكم ابي حل تعبت اراجع عيادات نفسية وتعبت من القلق والأرق اللي صابني
صرت ما انام الا بمنومات
الدكتور يقول لي اني مشكلتك انك عاطفيه زيادة وحساسه وتعيشي حياة الطفولة المراهقة الى الآن
حياتي كلها احلام وخيالات لدرجة اني اخترعت شخصية من عقلي وسميتها بإسم
تكلمني واكلمها وكل اللي احب اسمعه من زوجي واتمناه يعملوا وحارمني منه
هذي الشخصية تعوضني تهون علي احيانا اتخيل انه يدللني يحضني يقول لي احبك واعشقك
احبها واتخيل انه يعشقني عشق قيس لليلى

اعرف اني طولت عليكم لكن حبيت تتعايشوا قصتي وتنصحوني بحل


ارجوكم ماتبخلو علي انا احتاج مساعدتكم ومالي غير الله ثم ارائكم


اختكم
لينــــــــا

السلام عليكم ورحمة الله وبركاته

اختي رقة اشكرك على مرورك ومحاولتك لمساعدتي لو بكلمات
الله يجزاك كل الخير ويعينك على تعبك ويهون عليك مشاكلك


انا كلمت زوجي من فترة قريبه جدا صار نقاش بينا وبعدها قلت الأفضل لنا ننفصل
قال اموتك ولا تكوني لغيري اخر شي تفكري فيه اني اطلقك ..

سألت شخص في هيئة الارشاد بين الزوجين وقال لي يابنتي انتي من حقك الطلاق
واذا رحتي لي قاضي راح يطلقك منه هذا من حقك شرعا ؟..

لكن المشكلة مو كيف يتم الطلاق المشكلة خايفة ارجع بيت ابي
والدي كان يعاملني معاملة جدا سيئة ضرب وتجريح وحرمان من كل شي هذا قبل ما اتزوج
كيف لو اني رجعت عنده مطلقة..؟؟



((واظن ان والدك سيتفهم موقف زوجك وشهامتة ...وحاولى انك تفاجئى ابيك بانك طلقتى))

والدي يرفض فكرة الطلاق ودائما يقول لزوجي وازواج اخواتي خذوهم لحم وارمهم عظم
المرأة اذا تدلعها تسيطر عليك ....الخ يعني يحرض ازواجنا علينا
ابي عارف اني اعاني من مشاكل نفسية واني تحملت اللي مايتحمله انسان
لكن وصلت لمرحلة اني تعبت والله العظيم ماصرت اقدر اتحمل اكثر


اختي الكريمة الله يجزاك كل خير ويجعلها في ميزاين حسناتك
اشكرك على كلماتك ودعائك لي
وانا بإذن الله راح ادعي الله العلي القدير يحل كل مشاكلك


تعبت من كثر التفكير
حتى اخصائية المساعدة الاجتماعية تقول اول مشكلة تمر علي مالها حل

واتمنى الاآقي حل يريحني


لينــــــا

اهلا بك اختي الفاضلة صدى اصيله اشكرك على مرورك وردك الكريم

وفعلا كلامك صحيح انا حاولت اغيره ماقدرت
وبالنسبة لموضوع جدي ليته كان موجود كان اقلها ساعدني لكن الله يرحمه توفى من عدة شهور
واعرف اني كبيرة وسني يعطيني الأحقية اتخذ قرار
لكن اني اوقف في وجهه الكل ماراح اقدر تعرفي ليش ؟
لأني اخاف من والدي اخاف من ضربه .. والله ضربه لي كان ضرب متوحش
صرت اخاف يطالع فيني ... اذا طالع فيني اجلس في حالة قلق وتوتر افكر انا وش عملت ؟؟؟
وامي الله يعينها على مابلاها ماتقدر تقول او تعمل شي ضعيفة ومغلوب على امرها
كل ماعزمت فعلا على اتخاذ قرار اشوف تصرفات والدي اتراجع
واخر مره رحت بيت اهلي وكنت ناويه اتجرأو اكلم والدي لقيت اختي اللي ساكنه في منطقة بعيده شوي عننا موجوده عنده وجالسه تبكي
سألت خير وش صار قالت كنت نايمه وجا صحاني من النوم وقال لي ليش عندك جهازين جوال ردت عليه قالت زوجي هو اللي شاريه لي وهو راضي فضربها ليش ترد عليه
خرجت من عنده افكر اذا هي متزوجة وزوجها موجود وضربها كيف لو رحت اعيش عنده مره ثانيه ؟
غيرت رأي ورجعت بيتي





ادعي لي اختي عسى يفرجها علي يارب

الله يجزاك كل خير
لينــــا

السلام عليكم ورحمة الله وبركاته



أخوي يوسيبوٍس اشكرك على كلماتك لي وكلامك صحيح وعين العقل

بس انا ما كنت اطلب شي مستحيل

انا قبلت فكرة انه مايكون لي اطفال بدليل اعيش معه عشر سنوات الى الآن

يعني موضوع الأطفال مو هو سبب تفكيري بالطلاق

وموضوع حقوقي الزوجة تنازلت عنها من سنين لأني اعرف عدم استطاعته ولا احب احرجه

حتى موضوع مرضه تعايشت معها وصرت اعرف وش اللي ينفعه ويضره

وحريصة كل الحرص انه يكون بخير سواء كنت موجوده معه أو لأ ؟

اقسم بالله اني احيانا افكر فيه اقول لو رحت عنه راح يتعب لأنه معتمد علي في كل شي

مواعيد الأدوية الابر الحمية هذا ممنوع وذا غير ممنوع ...الخ

هذا كله مو مشكلة بالنسبة لي


اللي اطلبه مارح يكلفه شي ابدا اطلب اهتم واحساس بالحب

الكلام ماراح يدفع عليه فلوس

الابتسامه في وجهي ماراح تكلفه شي

الكلمة الحلوة الرقيقة مايحتاج لها شي

كل اللي اطلبه بسيط لكن حتى هذا مو قادر عليه

طيب ليش اصلا اعيش ؟ اعيش ممرضة وخادمة وبس

ومشاعري واحاسيسي احلامي .....الخ

الغي وجودي ليته بعد هذا كله يقدر لي ذلك

اتمنى اموت ...ولا احس اني شي ماله اي معنى




الله المستعان

لينـــــــا