السلام عليكم ورحمه الله وبركاته
حابة استشيركم في طريقة تعاملي مع زوجي في الفترة هاذي
زوجي طبيب اسنان قبل تقريبا ثلاث شهور جاءه مريض مدمن سابق ًٍ(سجين) واثناء معالجته اتمزق القفاز واتجرح
رجع هدالك اليوم من الدوام وهو انسان تاني
طبعا هو وسوس من انه يكون الشخص هذا معاه امراض متل الايدز والكبد الوبائي او غيرها من امراض الدم ويكون المرض اتنقل له من الجرح
ومن هذاك اليوم وهو حاله اتغير في حاجات كتير معظمها ايجابي
متلا اتقرب الى الله اكتر من اول زمان كان يصلي في البيت لكن بعدها صارت الحمد لله صلواته كلها في المسجد وصار يحرص عالنوافل
معاملته ليا صارت زي ما كنت اتمنى واكتر (كانت بيننا مشاكل واختلاف وجفا ) لدرجة ما كان يرضى ينام الا وانا جنبه
وصار اكتر حنان على بناته واكتر خوف عليهم
صار يفكر كيف يئمن مستقبلهم وكيف حيعيشوا من بعده وكدا
صار دايما يسالني اذا صار فيا شي من الجرح حتسيبيني ؟؟
طبعا انا من يوم صار معاه كدا وانا والله في فرحت لانه اولا اتقرب لربنا اكتر ولانه اتغير معاملته معايا وحتى صرت اقوله والله بتعاملني زي ماكنت اتمنى واكتر بس كان اللي منغص علينانظرته السوداوية وانه اكيد اتنقله شي لدرجة من يوم ما اتجرح فوق خمسه مرات سوا تحليل دم والحمد لله مافي شي "" واذا دخل الحمام يقعد كتر من نص ساعة يفتش في جسمه اذا فيه اي اعراض طلعتله من اعراض الامراض ديك من يوم ما تطلعله حبه عادية في جسمه خلاص يعتبرها نهاية الدنيا ويقعد مكتئب
انا الحمد لله في الفترة هديك احتويته قد ما اقدر وقدرت مشاعره وخوفه وكنت دايما اقوله انشالله مافيك شي وانصار لا قدر الله ماراح اسيبك ومن دا الكلام
المهم قعد عالحال دا تقريبا شهرين قبل رمضان باسبوعين اتقلب حاله معايا انا وبناتي لكن الوسوسه والاكتئاب موجود بس الحمد لله صلاته زي ما هي في المسجد
صاير عصبي ماصار يحتمل البنات لما نخرج مشوار بالسيارة وتعرفه الصغار يتاقروا يقعد يصرخ ويخاصمهم و" انتو طفشتوني وانا ما عاد اشيلكم اي مشولر ومن دا الكلام " اما معايا فرجع زي زمان وصار يتمشكل على اقل الاشياء ليش مارفعتي ليش ما شلتي دا الشي ليش ماسويتي كدا وعلى دا الحال ليومك هادا
طبعا مع بناته مو كل الوقت معصب لكن معظم الاحيان
اما معايا طول الوقت حتى. لدجة العلاقة الخاصة اول ما صار معاه كدا ما رضي يقربني نهائيا وما قر الا بعد ما استخار وخلاني استخير وكدا وصارت ينكم مرتين بس
طبعا الامراضاللي خايف منها لها فترة حضانه تكون في الجسم عشان تبان في التحليل
والاطباء يختلفوا في هادي الفترات في مين يقول انها بعد اسبوعين لو حللت خومافي شب خلاص ومنهم 45 يوم وزي كدا كل دكتور وكل منظمة صحبه لهم مدة معينة لكن معظمهم متفقين انو اقصى شي اذا حللت بع 3شهور ومافي شي اكيد انشالله مافي
طبعا زوجي حلل في كل فترة مكتوبة لدرجة المختبر بعد تالت مرة قله ان جيت معد حسويلك انت مافيك شي لكنه راح مختبر تاني وسواها
المهم انه الين يصير تلات شهور يكون نص شوال تقريبا
فانا حابة اعرف كيف اتعامل معاه حاليا وارجعه زي اول ما صار معاه
وكيف لو بعد 3شهور برضه موسوس
وكيف لو لا قدر الله طلع معاه شي
وتحياتي
*