السلام عليكم
بقولكم موجز عن معاملة امي لي ماعندي اي مخلوق في العالم افضفضله غيركم ومابي منكم غير الدعاء.
من اول ماولدت وامي تكرهني ماعرف وش السبب يمكن لانها كانت تتمنى ترزق بولد وخاصه اني رابع بنت وعلى قولتها ماطاعت تروح المستشفى لماجتها الام الولاده وجدتي هي اللي غصبتها و كل فتره تذكرني بولادتي وتعترف انها ماهتمت فيني و جدتي هي اللي سمتني واعتنت فيني
والله مادري اذا قلتلكم اني ماتذكر في طفولتي شي غير الضرب والتعذيب بتصدقوني او لا بس عشان تحكمون بحكيلكم المواقف اللي صارتلي في طفولتي وهاي نقطه من بحر فقط لاني مابخلص لو كتبت كل شي
مره كنا انا واختي اللي اكبر عني نلعب برا يمكن عمري كان اربع سنين كانت اختي تجيب البيض وتكسره وتخلطه بالرمل كانها تسوي كيك امي جت وشافت الموقف كله وشافت اختي هي اللي تكسر البيض مع هذا خلتني انا الغلطانه وضربتني ضرب اجرامي ذاك اليوم لدرجة اني اتذكر طعم التراب وهو في حلقي وشالت اختي وباستها ودخلتها داخل وقفلت عني الباب وخلتني برا في الصيف في عز الظهر بدون نعال وتميت تحت الجدار قاعده الين مافتحتلي الخدامه الباب
وموقف ثاني مره كان عمري خمس سنوات على الساعه سبع ثمان الصبح وكنت العب ويا اختي كالعاده وتعرفون شقاوة الاطفال في هالعمر والظاهر انه امي ضحكي ازعجها شفتها جايه صوبي حاولت اهرب منها بس كانت اسرع ضربتني ضرب وبعدين شالتني من الصاله الين سريري واهي ماسكتني من رقبتي وانا احاول اتنفس بصعوبه ورمتني ع خشب السرير ودوخت من قوة الضربة ونمت.
ومره وقت الظهر بعد الغدا كان عمري ثمان سنين نادتني قالت تعالي ابيك تهمزين رجولي تميت اهمزها وفجاة قامت من مكانها وجابت سلك الاستشوار و ضربتني ضرب بدون سبب وانا اصيح ليش وانخشيت تحت السرير وهي تحاول تسحبني
ومواقف كثيره ف طفولتي لو كتبتها مابخلص. كل اللي اذكره منها وانا طفله الضرب ثم الضرب ولا شي اخر
كبرت وكبرت مشاكلي معاها ومره من المرات وانا عمري 12 سنة كنت في اختبارات نهاية الفصل وكنت انتظر الباص الصباح برا البيت عند الباب وامي واقفه جنبي اطالعني بنظرات حاقده بدون سبب وتعلق على شكلي ولبسي تعليقات تحطيميه وانا احاول الطف الجو بيننا جا الباص وانا ماشيه ابا اركب فجاه جرتني من شعري وعطتني كف باقوى ماعندها قدام كل البنات في الباص من الاحراج جريت داخل البيت وتميت ابكي واصرخ عليها ليش تضربيني انا وش سويت وماصدقت اني رفعت صوتي جريت وراي الين الحمام حاولت اقفل الباب عنها بس كانت اقوى مني والله اني ماذكر وش سوت فيني بالضبط من كثر الضرب بس اللي اذكره انها مسكت راسي وضربته ع زجاج الشاور وانكسر علي وانجرحت جرح بسيط وبللت ملابسي وانتوا بكرامه من الخوف اول ماوقفت ضرب جريت جري الين المدرسه وانا ابكي وهي تدعي علي باعلى صوتها بالرسوب وبالحادث والحمدلله وصلت على وقت الاختبار .
ولما كبرت شوي ووصلت سن المراهقه كانت تقذفني بشرفي بدون سبب وتقول اشياء استحي اقولها وانا ساكته ومارد عليها وخلت البيت كله يعاديني ويكرهني وانا ماغلطت عليهم في اي شي ويوم من الايام جت بنت خالي عندي كانت هي صديقتي الوحيده دخلت امي
علينا وقالت تعالي بقولك عن بنت عمتك وش علومها وسبتني سب قدامها وخلتني شيطانه واني مقاطعه البيت كله وما اكلم احد ومن هذاك اليوم بنت خالي قاطعتني وامي على هالحال من تشوف احد من البنات جا يكلمني تسبني قدامهم
كبرت وكنت كل ماروح زواج ولا مناسبه الحريم يمدحني ويقولن بنتك جميله ومن هالكلام وهي ترد لا وين مو لهدرجة وتعلق على عيوبي ولما نرجع البيت تقولي الحريم اليوم كلهن خطبن اختك وانتي محد جاب طاريك. ومرت الايام وجماعه من اهل ابوي خطبني وتمت النظره الشرعيه واليوم اللي بعده وانا راقده طفت المكيف وقذفتني في شرفي وقالت انتي وانتي و فضحتينا عند الرجال انتي هندي مابيقبل فيك وين هالناس اكيد من اول يوم بيرجعونك بيت ابوك وكلام كثير يوجع القلب والله اذكر انه مخدتي كلها دموع من البكي والحمدلله بعدها بشهور تمت الملكة وقرب العرس وفي اخر يوم قبل العرس جبت فلبينيه تسويلي بدكير وخواتي كلهن سون معي ولما خلص دوري وانا رايحة غرفتي اجيب الفلوس ماحصلتهن سالت خواتي وين فلوسي قالن امي خذتتهن قلتلها امي ماعندي غير هالفلوس وين حطيتيهن عطتني كف باقوى ماعندها شفتوا في حياتكم ام تعطي بنتها كف في ليلة عرسها خواتي الصغار شافن الموقف وخبرن ابوي وجاء وعطاني الفلوس والحمدلله عدى الزواج على خير والله عوضني باطيب زوج وام زوج في الدنيا والحين انا حامل والحمدلله وان شاء الله بعوض عيالي باللي ماشفته من امي ومستحيل اعيشهم اللي عشته ولا لحظة ابيكم تدعولي الله يتمم حملي على خير يرزقني من واسع فضله ويعوضني عن طفولتي كل خير والله يحفظكم.
22-04-2019, 06:15 PM
ضوابط المشاركة
العرض العادي
