حبيبتي رويدا .. تعرفين زوجي كان مثل زوجك لما ازعل كان يطنش .. ويطلع من البيت وينشغل خارج البيت
ولا يتصل لين يرجع البيت .. لكن الفرق عن زوجك انه كان يحترمني وما يغلط علي لاني بس ابكي ما استفزه
ولا اتناقش معاه بصراخ ... ويوم يرجع البيت يرجع عادي جدا يسولف ويمزح ولا كأن صار شيء وانا فايره
بعدها لما تكلمت معاه اكتشفت ان هذا طبعه .. يبتعد علشان ما يزيد النار حطب .. قال : اذا جلست معاك وتناقشنا
ونحن زعلانين بتكبر المشكلة كلمة مني وكلمة منك وبتنشب الحرب فلازم اكون الاعقل وابتعد الى ان تهدأ الامور ..

بعدها وصلت لفكرة والان نطبقها صار لنا 11 سنة والحمد لله اتفقنا على ان اذا صار زعل ما يستمر اكثر من 10
دقائق مهما كان حجم المشكلة وبعدها ان بغينا نتناقش فيها او ما نتناقش هالشي راجع لكل واحد منا .. وكل هالسنين
عمرنا ما حطينا راسنا على المخدة ونحن زعلانين ما شاء الله ..

فالافضل انك تتفاهمين مع زوجك وتتفقين معاه على طريقة ما تخلي الزعل يستمر بالايام .. لانها مع الاستمرار
تصير عادة .. ابتعدي عن اللوم لما تتناقشين معاه تناقشي معاه كرجل عاقل مو طفل محتاج لعتاب وتوبيخ ..
او انته غلطان وانا ما غلطت .. فهميه ان العلاقة اللي بينكم اكبر من ان تضعفها امور تافهة
يا اختي والله الانسان لو يفكر شوي بيندم على كل لحظة ضيعها في زعل وحرق اعصاب وعلى امور تافهة بعد
نعم نزعل على سلوك او تصرف معين لكن ما احرق عمري وازعل بالايام
ونصيحة من مجربة عودي زوجك على فعل الخير بالتعاون معك بإذن الله ما بيكون في مكان للمشاكل في حياتكم
فأعمل الخير والعبادات تطهر الروح والنفس وتلين القلوب وتريح البال

ربي يسعدكم ويهنيكم ويجمعكم بالمحبة والخير

حبيبتي انا كنت مثلك بالضبط .. ابي شرح ونقاش وتبرير في نفس الوقت .. ولما اشوف طلع وطنش افور واحترق
من الداخل وما ارتاح لين اطلع اللي في خاطري وتكبر المشكلة ..واحيانا يغمى علي من الزعل انا حتى العصبية
ملت مني ..
بس يوم عرفت طبعه ارتحت فاعتقد زوجك مثل زوجي لما يلاحظ ان المشكلة بتكبر يبتعد علشان يهدأ الوضع
اما زعله فحبيبتي زوجك تعود على طول فترة الزعل لانه حتى لو يرجع ويبي يلطف الجو بيشوفك زعلانه
بيكمل الزعل لانه يعرف انك ما بتكتفين بالاعتذار لكنك تبين تبرير وشرح ويرجع الزعل
لكن جربي تستقبلينه عادي ولا كأن صار شي .. وبعد ما يهدأ جربي فكرة تحديد وقت الزعل .. وتفاهمي معاه
وقولي له : انا لي طريقة نتفق عليها اذا صار زعل ما يستمر اكثر من 10 او 15 دقيقه وان شاء الله
تنجح الطريقه ... جربي كل شي حبوبه .. اذا ما نفعت فكرة بتنفع غيرها .. بس لا تيأسين ابد ..
وتذكري دايما ترا الناس تختلف بطبعها واساليبها وشخصياتها .. انتي مثلا لما يزعل زوجك تلصقين فيه وتراضينه
وما ترتاحين لين يرضى لكن زوجك اكيد اسلوبه في الارضاء او تهدئة الوضع غير ..

غلط الزوجة او اغلب الزوجات انها تبي زوجها يعبر عن اسفه او حبه او شوقه او مشاعره بشكل عام بطريقتها
يعني انا اقدم له ورده تعبيرا عن حبي ليش هو ما يسوي نفس الشي ؟ انا اراضيه اذا زعل ليش هو ما يراضيني ؟

تقبلي من حولك ومنهم زوجك مثل ما هم حبيبتي مع المحافظة على شخصيتك واسلوبك ..وبترتاحين بإذن الله
وإياك والسكوت على الاهانة والمذلة او الاساءة بالقول او الفعل .. ترا اذا احترمتي وحبيتي نفسك كل من حولك
بيحترمك وبيحبك ..

الله يسعدك ويهنيك يالغاليه