السلام عليكم..


اخواتي العزيزات ..

( الحياة الزوجية ) عباره أكبر من أنها تتفسر أو حتى تنحصر بتجربه أو أكثر ,
عالم يخص أجناس مختلفه لها أعمار متقاربه أو حتى متباعده ,
تعيش في نفس المكان والزمان وتخضع لتجارب وظروف مختلفه , تبين مدى ترابط هالجنسين ببعضهم ,
وتتأثر بمحيطها وظروفها , لكن هل لناالحق نحكم بتجربة ناجحه لزواج شخص ما ,
وبأن الزواج دائما ناجح ؟؟ والعكس صحيح !!
من هنا حبيت أشاركم حبيباتي بهالموضوع اللي هو شغل أي بنت بسن الزواج , وحتى الصبيان
لكن قبل لا أبدأ , أتمنى اذا أحد يبي يقرأ الموضوع يقرأه من أوله لآخره وخصوصا اذا يبي يعلق
ويرد !! , وله مني جزيل الشكر ....

************************

محد يخفى عليه أنه موضوع الزواج يشغل أي بنت بسن الزواج – وحتى اللي فاتها القطار-
مهما كابرت وقالت ما أبغى أعرس !!
لكن مهب هذا هو موضوعي , موضوعي يختلف تماما عن هذا
<<<<<<<<<<< أجل وكل هالمقدمات عشان أيش !!!!

صبركم وراح تفهمون

************************

طبعا الكلام اللي بقوله الحين يخص الفتيات, واذا الشباب يبون يشاركونا حياهم الله

**************************

لاحظت من خلال مجالساتي لأنواع مختلفه بالاعمار والطبقات من البنات
أنهم يناقشون موضوع الزواج في حياتهم اليوميه مالايقل عن 3 ساعات يوميا
هذا اذا ماكان 24 ساعه بث على 24 ساعه بث من MBC - FM
نعود لمحور حديثنا ,,


لكن مهب مهم كم يجلسون وهم يتناقشون بهالموضوع
الاهم ويش يتناقشون عنه !!!
وأنا راح أقولكم تفكير 90 % من البنات ونظرتهم للزواج
الزواج = ( حريه + رومنسيه + سفر + تتعشى بالمطعم + تلبس وتتمكيج )
للأسف أنه نادرا ما تلقى بنت تأخذ موضوع الزواج على محمل الجد
تظن الحياة الزوجيه محصوره على ( خطبه + ملكه + زواج فاخر + وشهر عسل)
بس هذا حدود تفكيرها بالحياة الزوجيه ,
تفكر بس باللحظات الرومنسيه
وتنسى أو تتناسى دورها الحقيقي بهذا العالم !!!
وأجزم أنه هذا هو السبب الرئيسي في فشل حياة البنت بعد الزواج
لانها رسمت بخيالها عالم مليء بالورد والشموع وكلمات الحب
وبعد الزواج تتلقى صفعه محترمه تصحيها من وهمها وخيالها اللي
مايتحقق إلا لسندريلا !!


- طيب خلنا نفرض أنه فيه نوع من الحريه بدل ماكانت متقيده بأسرته
هذا ممنوع وهذا عيب تسوينه ؟؟؟ ,
لكن حريتها الجديدة تختلف تماما عن اللي تتمناها ,
راح تكون حريه مقيده برغبات زوجها وطلباته
وهنا البنت ماراح تتقبل الوضع الجديد بعد ماكانت تظن أنه الافضل !


- وخلونا نفرض أنه الزوج فيه قمة الرومنسيه والشاعريه , يشبع مسامع

زوجته بأعذب الكلام , لكن بعد ماينتهي هالجو الرومنسي الى جو واقعي

الى المطالب الزوجيه , الى الاعباء والمشاغل ! , هل ياترى راح يعجب

البنت الوضع هذا ؟؟


- وخلونا بعد نفرض أنها تزوجت واحد ماهمه غير يسافر !
هل ياترى كل ماحزم شنطته بيقول يله أمشي معي !!!
طبعا لا , بيقولها انثبري عند اولادك وبيتك كلها كم يوم وراجع
وهالسفر مو للعب للشغل ! ,, وحتى لو سفرها معه مره ,, ماراح
يسفرها المره الثانيه , فاضي يجرجر حريم !!


- وخلونا كمان نفرض أنها تزوجت واحد راعي طلعات , عسى مايفتح مطعم إلا ويركض
ويعشيها فيه !! , لكن اذا عشاها مره ماراح يعشيها باقي الشهر , كان يفلس !!

*********************************

هل أنا نظرتي واقعيه للحياة الزوجيه بزياده وعلى قولة صديقاتي
( أنتي معقده وتكبرين الموضوع )
وإلا هم اللي رومنسيين بزياده ولا يبغون يعيشون بأرض الواقع !!

***********************************

مثلا: انا أفكر بالحياة الزوجية بس بالواقع والجدية يعني لما نعيش
أنا وأياه تحت سقف واحد , مطلوب مني أعامله أحسن معامله , أخاطبه
بأفضل أسلوب , ألبس أفضل ماعندي وأكون دائما حسنت المظهر
أهتم ببيته من ترتيب وتظيف , وطبخ وغسيل وغيرها !!
.. وطبعا الرومانسية مطلوبة ولازم موجوده بس مو بكل وقت ..
واقدر أوفق بين حياتي الدراسيه وبين بيتي خصوصا
لاني مااؤيد وجود الخادمة !!
أحاول ما أطلب منه طلب فوق طاقته أو طلب بوقت غير مناسب
ماأتعبه بكثر هذري , وبنفس الوقت لازم يكون بينا نقاش راقي
أحرص على فهمه والوصل الى درجه تفكيره وأسلوبه في المزح والكلام
( وأعتقد هذي أصعب شىء )
أحرص أني أوصله اهتمامي فيه , ولا أبخل عليه بأي مشاعر
( وهذا يعتمد برأي على اسلوبه معي )

0
0
0
والكلام يطول حول الاهتمام بالزوج والاسرة
ممكن تفتح أي كتاب أو منشورات أو منتدانا عالم الحياة الزوجيه
وتلاقي ألف طريقه وطريقه لنجاح العلاقه ..!
الكلام سهل أنه الواحد يسوي ويسوي ويقول ......
لكن التنفيذ على أرض الواقع مع الجنس الآخر صعب للغايه
وبعض الاحيان يكون مستحيل !!
وأعتقد هذا هو السبب الرئيسي اللي يخلي البنات مايناظرون للزواج
بشكله الحقيقي ويحاولون يفكرون بالاشياء الرومنسيه حتى تحببهم فيه

*******************************

زبدة الكلام :

الحياة الزوجيه تعتمد على التفاهم والاخلاص من الطرفين
واذا كان من طرف واحد راح يتعب والطرف الآخر مايحس !
فاذا قدر زوجي خدمتي له وأنه أول وآخر رجل بحياتي
ويتفهم كلامي ويقدر مشاعري , وعرف أنه شمسي بالنهار وقمري بالليل
وهو صاحب الكلمه والمشوره والاب والاخ والصديق والزوج
اذا فهم كل هذا ,,
فهذا غاية مناي , وله مني أكون العبد الذي لا يعصي أمراً لسيده
واذا ماحس بوجودي ولا قدرني , وظن أني كأي شيء مكمل للمتعه والرفاهيه
فهذا الشيء لااقبله !!

************************************

هذا هو رأيي وأتمنى أسمع أرائكم ؟؟


ودمتم عزيزاتي سالمات..

صــــــــانـــــع المعـــروف لا يــقـــع..وإن وقـــع وجـــد متــكـــئــاً

تحيــــــاتــــــي & احتــــرامـــــاتــــي